I Corinthiens 1 - New Testament in Mitsogo

Mikudéga na ditimôgi

¹ Oô te me Paul namasevou gamanyôngéô amuene Nzambé. Namakudégu na Jésus‐Christ. We tôvovoni, te me Paul na Sosthène muana aTétene n’anyô agô mbumu éaNzambé.

² Gésangô gegé te sanyô asi mbumu éaNzambé nôndé gô môsenge aCorinthe. Gésangôge te gôndé anye nômabambéô gôéviia mane matsengene ngima gôéba môvo na Nzambé gô pitsi yanyô yava tsina. Te anye nômasevou gôéba oma amatsimamani ambumu éedi. Gésangôge te na gôndé muetso andé gô tsenge yetso ane asabômu ébambéa ina aKumu asô n’anyô Jésus‐Christ. Te Kumune yaô na te Kumune éasô n’anyô.

³ Te mbe Tétasô n’anyô Nzambé na Kumu asô n’anyô Jésus‐Christ anôétsa mate medi na gétabé sedi.

Mane mamisôba matôdiia gôndé Jésus‐Christ

⁴ Me Paul nakuméda Nzambé ami gédundé gô ébégô éanyô na gô metso mane madiianye gô ina aJésus‐Christ ôbiia.

⁵ Endé te nane. Gômagésangananye môtémovo na Christ ône amasevou na Nzambé, anye nômadugédu na Nzambé migôômie mietso. Nômootéa ékôndégu te mine miesupua ébégô mbe môma angayavôga éôkô.

⁶ Mane manigôa me anye mbe Christ anyôngéô éénda va gatse anyô, neena mbe amani ééndéa anye mangô.

⁷ Nôsivee ta na môgôô ôvo aNzambé. Tambô anye véngéani na ngudi yetso génikéô saKumu asô n’anyô Jésus‐Christ na gô tsina.

⁸ Te amuene anôsipéda gébé n’oési ngu na v’ekôdéô. Kabaga môma anôtsundéda nyee ôngaviga Kumu Jésus‐Christ mbe: Nôsindé kuanakue.

⁹ Nzambé asavétsua divanga yedi. Nzambéne te épo, ône amanôbambéa mbe: Bakani môvo n’ami gô pitsi yanyô yava tsina nômagésangana môtémovo n’ami gô évambevo na muanami Jésus‐Christ.

Tatô gô mbumu éaNzambé

¹⁰ Ana aTéta gô ina aKumu asô n’anyô Jésus‐Christ me nanôongô mbe: Bakani na ésinganéa gébé na tatô. Bakani n’évambevo n’etasevo gôékea nzéepo.

¹¹ Endé te nane ana aTéta. Me namabeendu n’asi gévia saChloé masaganédana manyô.

¹² Oôkôni éne énôévôa me. ?Anye nôvovo môma na môma éedi ébégô nayee? Môvo mbe: Me te môsi géômbé saPaul. Na môvo mbe: Me te môsi géômbé sApollos. Na môvo eenda mbe: Me te môsi géômbé saPierre. Na môvo eenda mbe: Me te môsi géômbé samuene Christ.

¹³ ?Anye nômenya mbe gôndéké Christ diyekani‐a? ?Tasakani ône amawa va gésumu sowa gôndé anye, te me Paul‐a? ?Anye nômeetsô batemene te gô ina ame Paul‐a?

¹⁴ Nakuméda Nzambé mbe me tsinôétsé bateme, ta na môvo buétsé te Crispus na Gaïus.

¹⁵ Vane gôsaba môma angeenda mbe: Nameetsô bateme gô ina aPaul.

¹⁶ Ah, neebéiki. Namabatésa na gévia saStéphanas. Tsatasadô mbe namabatésadô muene.

¹⁷ Christ asitômé me gôétsa oma bateme. Amatôma me gôéékéda Tsangô éedi Eamôsôba. Ameenda mbe tsanganigôa Tsangône yedi na mavoviame na éodo ébôtu na môma kabaga ôwa ômawa Christ va gésumu sowa ôôkanô mbe ôsaba na tsoongo.

Eodo na ngudi yaNzambé éénanô gôndé Jésus‐Christ

¹⁸ Meekédume mowa aChrist gô gésumu sowa masanyônganéô n’ane akea gôébungana na eenda mangô mbe: Matsôga. Géé gôndé wa n’anyô tôndé gô nzéa éagéobogoe, meekédume mane matômenyeda ngudi yaNzambé.

¹⁹ Endé te mônongovo gatônigôu na Matendeo MaNzambé mbe: Me nangabunzéda éodo éoma eodo évôni Na gôndé ane asabômu mabégô metso nangakina mane mamenyangô.

²⁰ ?Vane môsi éodo angamenya évovo‐ma? ?Na môsi géneenga gévôni angamenyadô ébégô‐a? ?Na ône asabômu mabégô metso angeenda nayee? Nzambé amapatéda éodo éatsengene mbe éka te éatsôga.

²¹ Ekegea te nane, oma atsengene na éodo n’ebagé éaô ahsiôngôé émenya Nzambé. Asiôngôé émenya na mane matsutsua éodo éamuene Nzambé. T’ebandô Nzambé amatasa gôéoboo ane eetsa angô mitémamie gô meekédume matôékédani éma maseka môma mbe matsôga.

²² Ajuif anyôngéô étubédu émbégéa éangudi yaNzambé, te mayanza manyônganéôni masangoongôa môma ésupua gôémenya na gô pie mbe Nzambé andéké. Agrec dôta abuta éodo gôémenya mabégô metso.

²³ Géé wa n’anyô tônigôa mbe: Christ amakomedu va gésumu sowa. Tsangô nene te éatsoyi ékuéséda Ajuif na te tsangô éatsôga gôndé ane asaba gô éongo éAjuif.

²⁴ Géé gôndé muetso ane amabambéô na Nzambé, na Ajuif n’ane asaba Ajuif, Christ amenyeda ahngô ngudi yaNzambé na éodo éaNzambé.

²⁵ Môma eeséda Nzambé mbe: Nzambé asimenye. Buéyé n’odungé ône ôétsa môma Nzambé vavovo angô mbe: Nzambé asimenye, ôôtéa éodo éamôma. Môma eeséda Nzambé mbe: Amagogo. Menyani mbe ékôdéô éegogoe éne étsuavô Nzambé na môma, éôtéa ékôdéô éangudi dindé na môma.

²⁶ Tasani ana aTéta agô mbumu éaNzambé, ane amagésangana n’anyô gô géômbé saNzambé. Gômabôtu angô, gôsaba ayekani oma eodo. Gôsaba ayekani oma angudi. Gôsaba ayekani andé na kinde oma avôni.

²⁷ Nzambé amasevoa ane eendô gô tsengene mbe asi tsôga gôétubéda tsoyi gôndé oma eodo. Nzambé amasevoa ane eendô gô tsengene mbe oma asaba na ngudi gôétubéda tsoyi gôndé oma angudi.

²⁸ N’ane eendô gô tsengene mbe oma abobo na ane adetukuni na asekukuni, Nzambé amasevoa ahngô gôébunzéda mane meendô n’asi tsenge mbe, mabégô mavôni.

²⁹ Endé te nane. Tôena mbe gôsaba môma oongôa éakuméda amuene va mbene aNzambé.

³⁰ Nzambé amanôgésanganéda monyovo na Jésus‐Christ. Gô ngudi yaNzambé, angô Christ te éodo éasô n’anyô. Gôndé angô Christ, tômatsimamédu gébé n’oési va mbene aNzambé. Na tôka môvo na Nzambé tômaviia mane matsengene ngima gô pitsi yasô yava tsina. Gôndé Christ tôndéké tômoobouni.

³¹ Gô mabégôme metso mane te gatônigôu gô Matendeo MaNzambé mbe: One anyôngéô éakuméda, akumédéké te éne émeendéô angô na Kumu edi.