II Timothée 4 - New Testament in Mitsogo

¹ Me Paul natôma éwe Timothée, ébégô édué évôni. Nagôtôma éangô va mbene aNzambé na va mbene aJésus‐Christ, môtsundédine ane adôngani n’ane amawani. Nagôtôma gômbe génikéô saChrist na ôkumue wedi génganeegedu.

² Môtômee te mbe: Ikédaka Mane Mamavovo Nzambé. Nigôa mangô na gébaki gô ndéô yetso. Ndéône ényepeyee, ésanyepeyee, suméaka ikéda gôékoa oma matasa maô. Semba ahngô. Kasôgéda ahngô. Ikéda ahngô na môvinéné ôvôni.

³ Menya mbe ndéône éwesea, éne éngakina oma éôkô meekédu mapie. Matô maô manganyôngéô éôkô mabégô masapengana na tsôvé yayôtô yaô. Angakénga gôéévôa eekédi ayekani ngu na vangadenga ahngô môékédi anigôa mane manyôngéô matô maô éôkô.

⁴ Asangatambéa matô maô gô mabégô mapie. Angagéngôga gô matangôtangô masaba na tsoongo.

⁵ Ivô éwe, Timothée, sipaka. Ombiasinga mbe matasa moo mayungédu n’omee ane. Bibéda gô maguga. Yanza mayanza moo mamôékédi aTsangô Eamôsôba. Kôdéda gésaô soo ngu na v’ekôdédô.

⁶ Géé gôndé me, ndéône ébuéyi, éne éngadeekedu me ga ôgondoku. Ndéône yami ébuéyi gôéwa.

⁷ Me namani égenya ébadi étôgenyani. Me namani étsiga v’ekôdeô éatsaéne étôkea pita. Me tsatsuma ône ameetsa me môtémee paga.

⁸ Ene ényangiô gô ébadi éndé gôévéngéa me deo noo gô mbene anzéa. Eangô te gépôkôdô setsimama géngaatédu me na Kumu Jésus môtsundédine asapenganani. Asangaatéda sangô memuene môtévo, te na muetso ane andé gôéenéa na gényônga génikéô sedi.

Ndongi gôndé Timothée

⁹ Gényôga gôéviga na gôndé me pitsi yedi.

¹⁰ Gôébégô Démas amatsika me. Angô amootéa ényôngéô mabégô matsengene, te gamakeangô na gô Thessalonique. Crescens dôta amakea na gô Galatie. Na Tite amakea na gô Dalmatie.

¹¹ One andé n’ami éva te Luc amuene. Oviga na Marc, angô asabômu éwedéa me gô gésaô saNzambé.

¹² Namatôma Tychique na gô Ephèse.

¹³ Vangavigewe ôtsua me ngoyine éami épipani ématsika me gô eba aCarpus gô môsenge aTroas. Otsua me dôta migandamie miami, nootéa ényôngéô te mine mimavutégu kongogo.

¹⁴ Alexandre, môgubane, amatubéda me mabégô mayekani madagani. Amuene Kumu Nzambé angamôétsa éne éndé kuanakue n’edi.

¹⁵ Ewe Timothée, baka n’ekena gôndé angô, gôébégô angô eenda mavovia masô n’oo pégôani.

¹⁶ Vamanigôa me kukane éamapanga ébégôe éami gô eba amisoso, gôsibé ta na môma môvo gôésungéa me. Muetso amatsika me. Naduka Nzambé mbe: Ombiétsa ahngô ôési gô éne.

¹⁷ Ivô Kumu Nzambé amabaka n’ami gôéoodeda me. Ameetsa me ngudi gôénigôa na vede mabégô medi. Mangô mookanô na muetso asaba Ajuif. Namayuu ga môma awatô gô mônya agémbungu.

¹⁸ Kumu Nzambé angayuua me gô maguga metso gôéengéda me gétabé n’ekenge g’ôkumu edi ag’ôba. Ondômbee na ôkumakee wetso ôbaké môbô na môbô gôndé angô. Amen.

Kômbôye yamôyusumédu

¹⁹ Kômbôa gô inami Priscille na Aquilas, na ebee wetso Onésiphore.

²⁰ Eraste amasanéa gô Corinthe. Namatsika Trophime gô Milet te gômabeeakangô beeaga.

²¹ Gényôga ébuéa égô ndéône éasodi madeo ésibuéa. Ane agôkômbôani te Eubulus, na Pudens, na Linus, na Claudia n’ana aTétee n’oo muetso agô mbumu éaNzambé.

²² Te mbe Kumu Jésus abaké n’ewe. Na mbe mate maNzambé mabaké gô mitéma mianyô muetso.