II Timothée 3 - New Testament in Mitsogo

Ndéône éamôyusumédu

¹ Ewe Timothée, ômbiabômu mbe gô pitsi yamôyusumédu gôngaba ndéô didagani.

² Engaba te nane. Oma angaba na guma n’onzôô okiti, na nyemo na bôpeeo. Angeenza Nzambé na asangagobeda iyee yaô na tétee yaô. Angaba na bôkôsô. Asangaditéda Nzambé na mabégô medi.

³ Mitéma miaô mingaba ga mataé. Asangeena akaô ngeba. Akea agiangana na matsuavi. Angaba oma akéé na dibaga. Angadudu mane mamisôba.

⁴ Angaba asi gévééa na buembe. Asangasinga ndongi. Angakaaô na bôpeeo. Angootéa ényôngéô migangu miatsengene na asanganyôngéô mane mamuene Nzambé.

⁵ Gô ndéôye dine, oma angagésangana gô gésôga ti eembe andé gôégobeda Nzambé tambô asavamba na ngudi yedi. Kina évamba n’omee amônongoe ône.

⁶ Avo va gatse aô angeengéa na waada na gô yebaye gôévooto ageto asaba n’ekena na andé na mitéma mimayôa na mabégô mabévani agémbana gô nzéa diyekani gô mane mabutahngô.

⁷ Agetoe ane ookô meekédume moma muetso génigôgéô ta na ébégô évo na géôngôé émenya mane mapandôéda we mapie gandéké Nzambé.

⁸ Gameenda Jannès na Jambrès pégôani na Moïse, te gangeenda omee adua pégôani gô mabégôme mane maNzambé mapie. Angô te oma amatasa mamagéngôgani. Gô mabégô manzéa éaJésus étôkéani édué eenda te makanégéda.

⁹ Ivô ngudiye yaô dingaba te g’ôkana apitsi na vane oma angamenya mônongoe waô gamamenyanganô mônongoe amôgôôe abaé ane, Jannès na Jambrès.

Ndongi yamôyusumédu

¹⁰ Géé éwe Timothée, ôndé gôéyeta gô matambé mami évo, évo. Osabômu meekédu mami, na mônongoe wami, na môvinéné ami, na ôsabômu gandé me gétsumé Nzambé paga, na ôbibôe wami na étondoe éami na gakea me gépongé gô nzéa éaJésus.

¹¹ Osabômu dôta gékuanô na maguga mamatubédu me. Omeena mônongo amaguga mamatubédu me gô Antioche na gô Iconium na gô Lystre. Ah mônongo agékuanô gémakuanô me. Osabômu mbe Kumu Nzambé amakuséda me gô mangô metso.

¹² Endé te nane. Muetso anyôngéô édigaa na égobeda Nzambé gô vitoone éndé wa n’anyô na Jésus‐Christ, angeena gékuanô.

¹³ Ivô oma abévani na abôki amangônzô angakea gésikamé gô mabégô mabévani. Abôméda akaô na angabôméda te n’anguene.

¹⁴ Géé éwe Timothée, sipéda môtémoo gô mane mameeka éwe masatsumewe paga. Osabômu mônongoe amôékédine woo.

¹⁵ Bandôa g’ôanéngée woo ômeekédu Matendeo MaNzambé na te mangô mandé na ngudi gôétsa éodo évôni. Eodoe éne ébuéda môma gô géobogeo gédiiangô veetsangô Jésus‐Christ môtémedi wetso gémôtsumé paga.

¹⁶ Matendeo metso maNzambé mamatendu te gamavumbéa Nzambé modie wedi gôétévéda oma. Mangô mandéké ngu gôétsigéda môma gô mabégô mapie na gôékoa matasa moma amabômuni, na gôétsimaméda ébévee éamôma, na gôétévéda angô wene mônongo amonyo ômatsimamani.

¹⁷ Gô mangô môma aNzambé angaba amabôngamani na angaba na ngudi na asangabutadô sôma gôémangôa mayanzame metso mamisôba.