II Timothée 2 - New Testament in Mitsogo

Baka môgode abôkédé aJésus‐Christ

¹ Ewe Timothée muanami agô mbumu éaNzambé, odeeda môtémoo gô ngudi yamane meetsô we gô évamba éndé wa n’anyô na Jésus‐Christ.

² Mane mamookô éwe me neekéda va pingô yoma amookôni, éwe dôta ikéda mangô gôndé oma amavômani. Na ahngô dôta angakea angaba na ngudi yeekéda n’avo oma.

³ Indaka geenda môgode abôkédé aJésus‐Christ gôégésangana gô maguga mainedi.

⁴ Môgode atsengene anyôngéô étubéda môtômi edi gényônga gô éyanzee éedi te ône asagésangana gô monyoe oma asingaséni.

⁵ One akea matsaé na akina ékea pitaye gône gôtévédiô angô asangadiia sôma. Okô akeyi gôtévédiô angô angadiia.

⁶ Gégaabi satsaga amatsogo n’eyanza, te ône angapanga émbata môyakôe.

⁷ Tanganéda mane mavovi me éva, na amuene Kumu Jésus angagôétsa yôkia gôénigôgéô.

⁸ Ewe Timothée, kôngéda Jésus‐Christ, ône amakunduu na Nzambé g’ôwa gôéba na monyo. Angô te muana aDavid. Te gapandôéda Tsangô Eamôsoba, éne éékéda me oma.

⁹ Vandé me gôéékéda oma Tsangô nene Eamôsôba, te ébandô me nandé gô maguga, na t’ébandô namakatô gô panga gakatô môsi môkôbé. Ivô oma asoongôa ékata Mane Mamavovo Nzambé na panga gôéema mangô.

¹⁰ T’ebandô nasinga maguga mema gôndé avo oma, buta mbe ane amasevou na Nzambé angeengéa gô géobogeo géndé gôndé Jésus‐Christ. Na angeengéa dôta g’ôndômbee ôsakôdéakani ag’ôba.

¹¹ Mavoviame maNzambé éma kaka meetsuma paga. Masangakoga. Mangô mbe: Okô mbe tômawa n’edi ôwa ôvo Tôngadigaa n’edi dôta monyo ôvo.

¹² Okô tôsipi gô maguga, Tôngadigaa n’edi g’ôkumaka. Okô tôkini angô, Angô dôta angatôkina.

¹³ Buéyé mbe we te oma agébé na mavôma Angô te Kumu amavôma. Gôébégô angô asangoongôa épenganéda mônongoe wedi.

Baka môyanzi aséngu ôséngu

¹⁴ Natôma éwe Timothée mbe: Bangôéda na ikéda oma va miso maNzambé mbe asasaganédana gô mavoviame na mavéndégéôme. Masaganédame mamônongo ône madaga na mapatsa ane ookôni.

¹⁵ Ewe Timothée, gényôga gôéétsô na Nzambé ôséngu ôétsô môyanzani asaba na tsoyi gô éyanzee éedi gôébégô eekéda ti kuanakue Mane Mamavovo Nzambé mandé n’edi.

¹⁶ Gônga masaganédame mabobo gôétongonéa na mangô, mapengana na nzéa éaNzambé. Ane avovonédana gô mangô, mapengana na nzéa éaNzambé. Ane avovonédana gô mangô awesea kuka yetso pesu pesu na gô nzéane ématatôana ahngô na Nzambé.

¹⁷ Mane meekédahngô akaô, magono na muétso ôsadôngakani ôpékôgani. Gô géômbége saô gôndéké amôgôô abaé, Hyménée na Philète.

¹⁸ Anguene amadimbanéô nzéane éamabégô mapie, na aduta oma ayekani gôégéngôgéda mbe atsika mabégô mapie. Avovo n’ahngô mbe: Nyaa agékundugéô sowa ômamana éôta.

¹⁹ Buéyé veendahngô nane, diboboye dimavumba Nzambé gôésipéda ôbôgee amabégô medi mapie, disipa ti v’ekôdéô éasipaga. Na gô yangô gômakuétu béndaye mbe: Kumu Nzambé asabômu ane andé omedi. Na dôta dimakuétu mbe: One avovo mbe: Me te môma aNzambé aviié mane mabévani metso ngima.

²⁰ Gô eba ôvôni gôdenganô épedee émakônzu na dodo na épedee éosunu ôvôni. Ivô kaka éangô étévo. Gôdenganô te na épedee éapéndé émapakôni na épedee éakiekie. Ene éadodo n’osunu ôvôni te épedee éokumaka na éasueti. Ene dôta éapéndé na éakiekie éyééô te pitsi yetso.

²¹ Okô môma agôgéda môtémedi gôéaagana na mabégô mabévani metso magôbeendi me angasevou gasevou gépedee sokumaka gôéyanza mane mavôni masoongôa muetso éyanza. Môma nône, gandé angô môtémedi ômagôgéani wetso gôndé kooko edi, eenanô n’edi mbe andé na tsoongo. Angamôyanzéa ésaôe éetso éamisôba éngatômu angô.

²² Tôngonéa pita pita na mane meenda akoo gô tsôvé yonzambu, mbe ôbusuga mangô. Wesea gôédigaa gétsumé Nzambé paga. Odigaa gô étsimama na gô étondo éapie na gétabé. Ovamba n’ane andé na mitéma mimagôgéani gôéneegeda Kumu Nzambé.

²³ Kina éaa mitangôtangô miadiyunga. Osabômu mbe miangô mikôdéa te gô masaganédana.

²⁴ Tambô môyanzi aKumu Nzambé asasaganéda na môma. Buedi mbe abaké na gényônga n’oma muetso, na abaké ngu gôéékéda kuka yetso na môvinéné.

²⁵ Gôndé ane atsuma meekédu medi paga, buedi mbe anigôé na gényônga gébé n’opisa. Vane mavooe Nzambé angayanza gôékoa atsumie apaga mitémamie, n’ahngô angatsiga émenya mane mandé mapie.

²⁶ Omee ane vangakogahngô mitémamie miaô ayuéga gô pagô dimatambéô ahngô na yabédé. Gôébégô gômabakahngô gôégobeda yabédé amamanaka éahkubéda.