II Pierre 3 - New Testament in Mitsogo

Génikéô saKumu na gô tsina

¹ Anami amôtéma, nôeni gésangô samôbaé génôtendéa me. Gô gésangô samapanga na samôbaé nabuta étimôa matasa meetsimama meedidi éanyô gô éne ébangôéda me anye.

² Nanyôngéô mbe anye nôbangôa mabégôme mamapanga mamavovo apandôédi amatasa maNzambé mbeego. Bangôani dôta mige na mitôma miaKumu na Mooboyi asô n’anyô mimeekéda ane amatômuku na Jésus.

³ Pangani émenya mbe gô pitsi yamôyusumédu gôngaba asi ékeengi na deti éaô. Angadigaa gô manyima maô mabévani. Asi ékeengi ahngavovo n’anye mbe:

⁴ Jésus amavanga mbe: Nanganika na gô tsina. ?Angôni? G’egudéa tétee yasô gébémi. We tôena tsengene éndé te mônongovo gamavangô yangô v’ebandô.

⁵ Asi ékeengi ahnyôngéô ééba n’osôbee waô mbe gô mbeego ôgi aNzambé ômakana tsina n’oba. Tsinane émaviga gô meba, na yangô émakanô va gatse ameba.

⁶ Na te gô ngudi yamebame mane magéningô gévôni mbe tsinane éambeego émabungana.

⁷ Ivô tsina n’oba éndé n’asô n’anyô deo noo, ékeneo te n’ogi aNzambé ône ngu na ndéône éngayôédu yangô na soto. Ekeneo ngu na gô nyaa amôtsundu ôngabunzu oma abévani.

⁸ Anami amôtéma nômbieeba ébégô évo édué. Gô étasa éaKumu Nzambé pitsi épo atanga mbe môtônisa ema. Na môtônisa ema atanga mbe pitsi épo.

⁹ Avo oma atasa mbe Kumu adinga édugéda éne émavovo angô. Kaka nane. Ivô Jésus anôenea. Angô asanyôngéô ta na môma môvo abungana. Ivô anyôngéô mbe muetso akoa mitéma miaô gôédiia géobogeo.

¹⁰ Gévigéô saKumu géngaba ga gévigéô samuisui. Gô nyee angô ôba ôngadimbana na nzongodi épôni. Yômee yetso éag’ôba éngayôa na soto. Tsinane ne éetso éndé gô yangô éngayôa.

¹¹ ?Va tôena mbe éetso éne ébandôa éwesea gôébungana, midigédi mianyô mingaba nayee? Buedi mbe ôdigédi anyô ôbaké n’etsimama môtémovo na Nzambé.

¹² Vavéngéa anye na môvinéné nyee ôngaviga Jésus indakani éetso éôngôa anye éénda buta mbe ayavôga éviga. Gô nyee angô, ôba ôngayôa na soto na éetso éag’ôba éngakanzôga n’epiô éasoto.

¹³ Géé wa n’anyô tôvéngéa ôba atsatsee na tsinane éatsatsee te gamavanga amuene Nzambé. Wangô gôngabaka te étsimama.

¹⁴ T’ebandô, anami amôtéma vavéngéa anye gényôgani gôédenganô na Jésus gébé n’etodi, gébé n’oési, gôédenganô n’edi n’evamba éagétabé.

¹⁵ Menyani mbe vadinga Kumu asô n’anyô éviga te mbe muetso tôdiia géobogeo. Te gamatenda muana aTétee n’asô n’anyô Paul gô éodo émeetsô angô na Nzambé.

¹⁶ Te éne étenda Paul gô miganda mietso minigôa angô mabégô mema. Gôndéké gô miganda miedi mabégô madaga éôkanôni. Avo oma ahsaba n’ekena na ahsisipé gô mabégô maNzambé ahsanigôgéô mavéndégéôme kuanakue. Buéyé mavo Matendeo MaNzambé amayungéda te nane. Abunganéda te anguene.

¹⁷ Anami amôtéma, anye nômani éevédu. Wemani anyene kabaga nôkudungana gô nzéa éoma abévani na kabaga mitéma mianyô minika ngima.

¹⁸ Oodoni gô mane mamadiianye gô ngeba yaNzambé na gô mane mamenyanye maKumu éasô n’anyô na Mooboyi asô n’anyô Jésus‐Christ. Ondômba ôbaké gôndé angô n’atsatsee na gô môbô na môbô. Amen.