II Pierre 2 - New Testament in Mitsogo

Eekédi abévani adiboe (Bono na Jude 4–13 )

¹ Va mbeego va gatse ambumu éaNzambé vamabaka eekédi adiboe. Te mônongovo va gatse anyô vangaba eekédi adiboe. Ahngô ahtsongonéda meekédume mooboe gôébunza mane mapie. N’ahngô ahkina Môékédi môvôni ône amooboo ahngô. Eekédi adiboe ahngakudungana anguene gôébungana tsina na tsina.

² Oma ayekani ahngadeka n’ahngô ésima ébévani. Na gô éne éngeendahngô oma ahngadeta nzéa éamabégô mapie.

³ G’ônzôô waô adiiaga ahngavooto anye na meekédu maô mooboe mavakangô, buta mbe ahngô ahtsôbôga vakambi ahngô. Môtsundédi aô andé va magô bandôa va mbeego. Môbunganédi aô andé ti gôévéngéa ahngô.

⁴ Aanakani geenda Nzambé. Buéyé asi g’ôba, ayanzi aNzambé vameendahngô ébégô ébévani Nzambé asiene ahngô ngeba. Ivô amadigunya midikidiki gô mbenge yevitsi gôkeneo angô ngu na nyaa amôtsundu.

⁵ Buéyé ane ahmapanga na tsinane Nzambé asiene ahngô ngeba. Nzambé amavigéda géningô gémootéaka éningôe éetso gôébunga tsengene émayôaka n’ebéva. Nzambé amooboo oma génana, te gévia saNoé môékédine amabégô maNzambé.

⁶ Na buéyé misenge mibaé mivôni, Sodome na Gomorrhe, amamieséda amamiyôéda na soto. Te gémbégéa sene éngabuéa gôndé muetso abévani.

⁷ Nzambé amooboo Lot, môma amamôgobedani. Amabaka na môtéma ôditani gô môdigédi akedi ahsigogeke éyanza mabégô matsoyi gô ndéô nene.

⁸ Lot, môma etsimama amadigaaka va gatse aô. Môtémedi ômabôngamani ôsisuméké te gô metso mameenakangô na mamookôkô angô gô mayanza maô makéé.

⁹ Kumu asabômu éoboo omedi gô éne ékanégu ahngô. Kumu asabômu ékenea oma abévani ngu na gô nyaa amôtsundu.

¹⁰ Kekee ti gandé ane anyima tsôvé dibévani yotô na ahkeenga ényangee éaNzambé. Eekédi adiboe ahndé n’obagaa na nyemo. Ahsookô gomo gôédeta asi g’ôba.

¹¹ Asi g’ôba ayanzi aNzambé andé na ngudi n’ongaa, na ootéa n’enyanga eekédie adiboe. Béyé nane asi g’ôba ane, asaba gandé eekédie adiboe abuanya ane abévani andé va mbene aKumu.

¹² Ivô eekédi adiboe ahgono na nyama yagô pindi diinda minongo miaô mimeekaganô n’ahngô. Nyamaye dine dimabôtu te gôétsôpu na gôéyôhu. Eekédi adiboe ahbuanya mabégôme masookô ahngô. Ahngô angabunganédu ga nyama yagô pindi.

¹³ Maguga matubédahngô akaô, anguene ahngavéndu mangô. Eekédi adiboe eena gényônga gôédeekeda yôtô yaô gô tsôvé yetso dibévani n’omanda ôvénza. Te ebégô évôni éatsoyi vadenganô ahngô gô suetiye yanyô. Gô buembe waô ahtsôkéa.

¹⁴ Ngéngé yaô dindé mitie gôékea gésasô. Ahndé na vinavina gôéénda mabégô mabévani. Eekédi adiboe akubéda ane asoongôa ésipani. Mitéma miekédi adiboe mimeekaganô n’onzôô adiiaga. Ahngô ahndé gô tsina odoku aNzambé.

¹⁵ Amanôtôga gô nzéa éetsimama. Ahmaanda nzéane émakea Balaam, muana aBosor, ône amanyôngéô ôkiti ôngadiiangô gô mayanza medi mabévani.

¹⁶ Ivô amasugégu gômatsumangô ndongi yaNzambé paga. Nyama ésavovokoni étetu mbe ânesse, émavovo ga môma gôédékéda Balaam matasa medi masinyôngéô Nzambé.

¹⁷ Eekédi adiboe ahndé ga mbéyi disaba na meba. Ahndé ga dibôngé ditsuaô n’opunga. Nzambé amakônzéa ahngô tungu éevitsi éabangata.

¹⁸ Ahvaka mitangôtangô mianyemo. Ahngô ahbuta ékubéda oma ahkogi n’atsatsee, dipo pagô yeesima ébévani. Ahbuta éakubéda gô manyima mabévani mamôtéma gamabôtu angô.

¹⁹ Eekédi adiboe ahbeenda oma mbe: Nônganzeegedu. Tambô, anguene andé g’ôvéga esima ébévani éebunganani. Gôébégô môma na môma andé môvéga ene étôma g’ôtô edi.

²⁰ Te vane ôkô oma ahmani éaagana na mabégô mabévani matsengene gôvambangô na Kumu na Mooboyi asô n’anyô Jésus‐Christ, na ahngô anikéa éadeekeda anguene gô mabégô mabévani na yôtô yaô divoo pepe. Ebévee éaô éamôbaé éôtéa ébévee éamapanga.

²¹ Mbe ahsimenyeke nzéane éetsimama mbe teamôsôba. Géé ti vamamenyahngô yangô na mitômamie na migemie mietsimama mimakitséô ahngô, na gôéoma émitsika te édagani.

²² Ene éndé gôndé ahngô, te éne égunyu gô tsava mbe: Ene éogi inzua anika éaa éangô. Na, ngudu éôvôuni émanika gôépatsaméa gô gétékétéké.