II Pierre 1 - New Testament in Mitsogo

Mikudéga na ditimôgi

¹ Oô te me Simon Pierre, môyanzine amatômu na Jésus‐Christ. Natendéa ane ahmeetsô na Nzambé ngudi yeetsa angô mitéma miaô gémôtsumé paga mônongovo gameetsa me. Ngudi yedi tômeetsô yangô gô étsimama éaNzambé na éaMooboyi asô n’anyô Jésus‐Christ.

² Mate medi na gétabé sedi géaangané n’anyô minya mietso gôébégô anye nôsabômu Nzambé na Kumu asô n’anyô Jésus.

Nzambé atôsevoa na atôbambéa

³ Ngudi yaNzambé dimatôétsa éetso étôdugéda gô monyo eetsimama agégesanganéô samitéma miasô n’anyô na Nzambé. Ngudi yaNzambé dimenyeda wa n’anyô ône amatôbambéa gôédengana n’edi g’ôndômbedi na gô géneega samuene.

⁴ Ene étômenyeda divanga yamisôba dipôni dimeetsô wa n’anyô na Nzambé te ôndômbee wedi ne géneega sedi. Tômeetsô sangô na Nzambé te mbe tôngagésangana gô môanga aNzambé te gôtôkumba manyima mabunganani magô tsengene.

⁵ Butani gôéba môangovo na Nzambé. Vamapanga, nômeetsa Nzambé mitéma mianyô gémôtsumé paga. Vane gényôgani gôékôndéga éôdo éamôanga amôsôba.

⁶ Gô éodoe éne kôndégani gôébangôa mane mamisôba. Gô gébangôéôge géne kôndégani gôékina manyima mabévani. Gô gékinéôge géne kôndégani ôbibô. Va ngongo obibôe kôndégani gôénanama na ngaa na Nzambé.

⁷ Va ngongo éenanama na Nzambé, kôndégani étondo éana aTétee agô mbumu éaNzambé. Va ngongo étondo éana aTétee kôndégani tsôvé oma.

⁸ Okô mabégôme metso mane mandé gôndé anye na mayekegea, mangô makoa anye nôka oma angudi, gôéyanzéa na gôémenya Kumu asô n’anyô Jésus‐Christ.

⁹ Ivô ône asaba gô mabégô mema andé ga môsi pogu asamenya gôvigangô na gôkeangô. Angô asamenya mbe: Me namagôgédu ébévee éetso éambeego.

¹⁰ T’ebandô ana aTétee gényôgani na ngudi gôésipa gômaabéa anye mbeeane émabambéô anye na Nzambé na gô gésevôéôge sedi gémasevou anye. Okô nôénda nane, anye nôsangapônga ta na pesu.

¹¹ Te gô éne mbe nôngaba na mitayi gôéengéa g’ôkumu amôbô na môbô aKumu asô n’anyô na Mooboyi asô n’anyô Jésus‐Christ.

¹² Buéyé gamenyanye mabégô mema, buéyé gasipanye gô mabégô mapie mameetsô anye, me noomba énôbangôéda mabégô mema.

¹³ Me neena mbe te buedi vabangôéda me anye mabégô mema nagédôngaka kabaga nôbômu.

¹⁴ Gôébégô me tsabômu mbe nangatsika ôtôe ami ôdôô n’atsatsee. Buéyé Kumu Jésus‐Christ ameevéda me ébégôe éne.

¹⁵ T’ebandô neenda ékena buéyé mbe nawéyi, gô ngimami nôngabangôa mabégô mema gô ndéôye yetso.

Ane ahmeena ôndômba aChrist

¹⁶ We eekédi tômamenyeda anye gamaviga Jésus na ngudi yedi dipôni na gô tsina. Tôsibeendu gô matangôtangô mavaka oma. Ivô wéene tômeena ôkumaka aJésus na miso masô na kiaa.

¹⁷ We tômabaka vangô vameetsô angô na Téta Nzambé ôbébayi ôtubéda ôkumaka aNzambé. Tômadenganô vamookanô ôgi aKumu ondômba wetso ômavovo mbe: Odôô te Muanami amôtôma amiso. Namônyôngéô na nzoo na gô môtéma.

¹⁸ We tômookô ôgie ômaviga g’ôba vamabaka we gô ngongo amôkôdi ômasevoa Nzambé.

¹⁹ T’ebandô we tôsatsuma paga gô mavovia maNzambé mamatsikéô we n’apandôédi ambeego amatasa maNzambé. Buedi gôndé anye gôévôtanganô mangô. Gôébégô mangô mandéké mônongovo ga dambi étana gô tungu éevitsi. Keneani mangô ngu na vangagiia nyee na vangatana mônangee ava magéô gô mitéma mianyô.

²⁰ Kôngédani ébégô évôni édué. Gôsaba môma angoongôa ésupua amuene mavovia maNzambé mandé gô Matendeo medi mamatsikéô we na apandôédi ambeego.

²¹ Gôsaba évovia éaNzambé ta n’evo émaviga gô ngudi yamôma amuene. Mangô mamabundugana gô ngudi yaGédidi SaNzambé mbe môma avove mane manyôngéô Nzambé.