II Jean 1 - New Testament in Mitsogo

Mikudéga na ditimôgi

¹ Me pene agô mbumu éaNzambé nanôkômbôa yaa Kyria môgeto ômasevou na Nzambé. Nakômbôa éwe n’anoo. Nanônyôngéô na gô pie. Kaka memuene môtévo nanônyôngéôni. Te n’ahngô muetso asabômu mabégô mapie anônyôngéôni.

² Gôébégô mane mapie mandé gô mitéma miasô n’anyô na mandé gôndé wa n’anyô môbô na môbô.

³ Te mbe Téta Nzambé na Kumu Jésus‐Christ Muana aTéta Nzambé, atôétsa mate medi na gésingéô sakokoo, na gétabé sedi. Vane mane meetsahngô wa n’anyô tôngaba na mangô gô gényônganéô sasô n’anyôene na gô mabégô metso mapie.

Mane mapie na mane metondo

⁴ Me natsôkéa vamadenga me mbe anoo avo adigaa gô mabégô mapie gamatômu wa n’anyô na Téta Nzambé.

⁵ N’atsatsee nagôbeenda yaa Kyria tônyônganéôni wa n’anyôene na wa n’anyôene. Môtômee ôdôô ônôtendéa me kaka atsatsee, te môtômee ôndéké n’asô n’anyô bandôa vamapanga.

⁶ Etondo ékegea mbe môma adigéé gô mitôma na mige miaNzambé. Môtômee ôtôvovoni te ône ômookô wa n’anyô v’ebandô. Te mbe gô mabégô metso étondo étômé wa n’anyô.

⁷ Gôndéké eekédi ayekani adiboe aka gô tsengeye yetso. Ahngô asangoongôa ésinga mbe: Jésus‐Christ te na gô pie amakoga môma. One asoongôa ésinga nane te môsi oboe na te Môvingi aChrist.

⁸ Tambô wemani gôndé anyene kabaga nôdimbanéda éne ékusa gô mayanza manyô. Buedi mbe nôdiia misenda mianyô mietso.

⁹ One asadigaa gô meekédu maChrist akôndéga na mane maamuene, agésa na génôngô te ône asamenya Nzambé. One adigaa gô meekédume asabômu Téta Nzambé na Muanedi Jésus.

¹⁰ Okô aviga na gôndé anye gétsué meekédu mema, nômbiasinga angô eengéa na gôndé anye gôésambanéa n’angô.

¹¹ One asambanéa n’edi aka te môvo n’angô gôémôwedéa gô mane mabévani meendangô.

Mabégô mamôyusumédu

¹² Mabégô mandé n’ami gôénôbeenda ti mayekani tsanganôbeenda mangô gô gésangô. Memuene nanyôngéô éviga gôévovo n’anyô va miso manyô gômbe wa n’anyô tôngatsôkéa muetso.

¹³ Anee amônôô, angô dôta amasevou na Nzambé, ahngô agôkômbôa yaa Kyria.