II Corinthiens 8 - New Testament in Mitsogo

Itsani na gényônga

¹ Ana aTéta, we eekédi tônyôngéô mbe nôôkô tsangô éene émayanza Nzambé gôndé asi mbumu éedi gô Macédoine. Tsangône te angeba yaNzambé.

² Asi mbumu éaNzambé gô Macédoine amakanégu na maguga mameenahngô. Ivô gô tsina amaguga maô andé na gényônga gévôni, na ahkaba éne éaô éetso gébé na guma, buéyé mbe gandé ahngô misuga.

³ Me madeo tsiena geenda akasô. G’ôsugee waô eetsa éne éndé n’ahngô. Na oomba ékôndéga na yene éombangô énunga. Me tsibakégé ahngô.

⁴ Ti anguene, ameetsa na amagondo me mbe: Singéa we tôkudéga n’ewe ôkabôe wasô na gôndé asi mbumu éaNzambé eena panda gô Judée. Tônyôngéô éwedéa ahngô geenda mbumuye yetso yaNzambé.

⁵ Na me, namaasingéa. Me tsimenya mbe éngaba nane. Ivô kaka g’ôkiti ôtévo. Ahmapanga éahdeekeda anguene na gôndé Kumu Jésus. Vane amadeekeda anguene dôta na gôndé we eekédi. Nzambé eena buedi gô mônongoe waô.

⁶ Veena we mate maNzambé mandéké gôndé akasô égô, tônyôngéô mbe na mangô mabaké dôta gôndé anye gô Corinthe. T’ebandô tôtôma Tite mbe: Kiaka, mangôé éyanzee éoo gôndé asi Corinthe mbe n’ahngô dôta eetsa na gényônga ôkabôe waô.

⁷ Anye gône nôndé n’okiti ôvôni. Anye nôsatsuma ngudi na ina aNzambé paga. Nôndé na migôô miitsô anye na Nzambé gôépandôéda mavovia medi, na gôésupua ébégô mbe môma angayavôga éôkô éangô. Nôndé na tsôvé éana aTétee n’anyô agô mbumu éaNzambé. Nôndé étômbiatômbia gô mabégô mema metso tambô tévédani akanyô dôta nzéane gô mane makabanye n’ana aTétee n’anyô asi mbumu éaNzambé.

⁸ Gô ébégô édué tsanôtôma tômaga. Nanônigôa éne éénda akanyô. Na me tsabômu mbe n’anye gô ényônganéô éndé n’anye nônganyôngéô éénda te mônongovo.

⁹ Anye nôsabômu éne émeetsô wa n’anyô na Kumu Jésus‐Christ ôbiia. Amabaka gékiti. Amakoga môsuga te mbe wa n’anyô tôkoga ékiti.

¹⁰ Oôkéôni étasa éami. Ebégôe édué émabandôa n’anye gô Corinthe éka môpumovo, na madeo ésigôga. Tambô mangôani éangô. Anye te étômbiatômbia gôékabanéa n’akanyô.

¹¹ Nômbiatsika gésimage sekaba. Anye nômabaka na gényôngage gévôni v’ebandô te géne gémeetsanye étasa mbe: Tôkabékéni n’akasô. Tambô bakani na sangô v’ekôdéô gôéomba ékaba.

¹² Okô môma eetsa géenza gébé na ninga, Nzambé asinga géne géetsiôni. Nzambé asabono éne ésaba na môma gôéétsa. Abono te éne éndé na môma mbe eetsa éangô.

¹³ Vakabanye n’akanyô, anye nôyuua angô gô édukue éosuga. Bakani n’ekena kabaga nôviagana gô édukue éyuuyi anye akanyô. Veetsanye na vadiia akanyô, buedi mbe bakani muetso ôkanovo.

¹⁴ Pitsi yedi nôdugédiô ôkitie ôvôni gébuté sôma, buedi gôéwedéa akanyô abutani andé g’ôsuga. Ovô enya, ôkô anye nôndé g’ôsuga akanyô dôta g’ôkiti, ahngô anganôwedéa te mônongovo. Vane nôngaba ôkanovo.

¹⁵ Te éne étônigôu na Matendeo MaNzambé mbe: One amakôkéga éyékani ésiôtéé éyeka na ône amakôkéga vipesu, asivée.

Ebégô éaTite na géômbé sedi

¹⁶ Nakuméda Nzambé gôébégô angô amakoa Tite aka na gényônga gôndé anye mônongovo gandé me na gényônga gôndé anye.

¹⁷ Amasinga môtômee wami ômatôma me angô gôébuéa na gôndé anye. Mbe tsamôtômeyee, amuene Tite amabaka n’etasa gôéviga na gôndé anye.

¹⁸ Tônôkudégéa Tite na môkedi ône amookanô kumane na mbumuye yetso yaNzambé. Kumane te gayanza angô gô Tsangô Eamôsôba éaJésus‐Christ éékédangô.

¹⁹ Môma nône amasevou na mbumuye yaNzambé yetso gôékénga n’ami tungu yetso dikôkégu dibiia gôéétsa ane andé gô panda. Dibiia yedi dikuméda ina aKumu Jésus na ditubéda ganyôngéô we éwedéa akasô.

²⁰ Vatsua we dodeye diitsanye diyekani, tôkénga wa n’edi abaé kabaga oma atsuava me mbe asakondo ébongo gô yangô.

²¹ Tônyôngéô mbe éne éénda we éagébé n’oési va mbene aKumu Nzambé, ébaké dôta gébé n’oési va mbene oma.

²² Tônôkudégéa na muene, muana aTétee. Tôsabômu angô. Na tômani éena mônongoe wedi amôsôba na ékasôga éndé n’edi. Ti pitsi yedi andé n’ekasôga évôni gôébuéa gôndé anye gômookô angô tsangône yanyô.

²³ Gôndé Tite, nôsabômu mbe te wa n’edi tôyanza géômbé gôndé anye. Géé avo aviga n’edi madeo nôsiena ahngô, menyani mbe ahmakudégu te n’asi mbumu éaNzambé gôékuméda Jésus‐Christ gô éyanzee éaô.

²⁴ Tubédani ahngô ékasôga éndé n’anye éne émookô mbumu yetso yaNzambé tsangône émakuméda me anye. Nômbiatsika me na tsoyi.