II Corinthiens 7 - New Testament in Mitsogo

¹ Wee yami, ôvangee ône ômavanga Nzambé mbeego ôndé na ngudi gôndé wa n’anyô deo noo. Tambô tôbaké n’ekena gôébusuga mane mevindô kabaga tômagônga gôébévéda ôtô na gédidi gagônga môma mbéka éambii. Tôadeekedéni wa n’anyôene na gôndé Nzambé gôédigaa monyovo n’edi na gomo gôémôgobeda.

Ekasôga émabaka na Paul

² Indani me Paul naba na tungu gô mitéma mianyô na gô matasa manyô. We eekédi va gatse anyô tôsibévédé môma. Tôsinyamanganédé môma. Tôsivoote môma mbe nyepa tôdiia éne éndéké n’edi.

³ Tsavovo nane gôénôeséda. Te gamani me ébeenda anye kuka yetso. Buéyé mbe nawéyi, buéyé mbe nadônga, môtémami te gôndé anye.

⁴ Tsatsuma anye paga. Nanyemôga n’ekasôga gôndé anye. Gô tsina amaguga mameena me Paul, môtémami ôsanika gévii ivô ôndéké ômayôa na gényônga gévôni gôébégô éanyô.

⁵ Menyani mbe vamatsiga we eekédi gô tsenge éaMacédoine tôsibé na gévogiméô ta na pesu. Tômawanya na panda na gésa na gésa. Gône tôsépa nzinziye, gône tôkebangana.

⁶ Ivô Nzambé asô n’anyô te ône akasôgéda môma amadeeda môtéma. Nzambé amayavôga ékudéga muana aTétee n’asô n’anyô Tite na gôndé we gôétôkasôgéda.

⁷ Gévigéô sedi gémakasôgéda we. Na dôta tsangône éanyô asi Corinthe émakenea anye Tite émasuméda we mitéma. Amanigôa we mbe: Asi Corinthe anyima éwe, Paul. Anyôngéô éena éwe. Asi Corinthe ageesiô vamookô ahngô tsangône éapanda dimeena éwe, Paul. Gô tsangône émaviga na Tite, môtémami ômayôa na gényônga.

⁸ Okô mbe gésangôge gématendéa me Paul na gôndé anye asi Corinthe, gémaditédanye mitéma na gématubéda anye tsoyi gô tsembôye yami, medô tsaba na mikebanganô gô sangô. Namabaka na mikebanganô gômadagéô anye na sangô gô vipesu viandéô.

⁹ Ivô deo noo natsôkéa na gényônga gévôni, kaka gômaditanye mitéma ivô gômakou anye mitémamie na gésangôge géne. Gômaditanye mitémamie Nzambé amanôweseda na gôndé amuene. Gésangôge gésibévédé anye ivô gémanyepeda anye te nyepeda.

¹⁰ Nzambé asakina môma andé na môtéma ôditani na tsoyi. Tsoene ényôngéô Nzambé mbe nômiôkô te éne ékôva gékogeo samôtéma gôédiia géobogeo saNzambé. Géé tsoene éatsengene ékôva te ôwa.

¹¹ Vamadita mitéma mianyô na tsoyi, eenakani gamayanza Nzambé na ngudi gôndé anye. Mbeka mbe anye nômeena tsoyi na gésangôge sami, anye mbe nôsibé na tsambu gôéyavôga ékônza ébégôe émabaka n’anye. Nômakuadima na gomo mbe: ?Môma môbévani angadigaa va gatse asô nayee? Nômanyôngéô éôkô ndongi yami. Nômaba na géviôviô gôétsimaméda mbumu éaNzambé. Anye nôsiene éso avio gôéeséda mômôgôô nône môbévani. Gômeendanye metso mane nômayuéga gô ébégôe ébévani éne.

¹² Buéyé mbe me nanôtendeke kaka gôndé ône môbévani na ône amabévéduni. Ivô namanôtendea gômbe we eekédi tôngamenya gandé anye na gényônga gôndé we va mbene aNzambé.

¹³ Gômasinganye na gényônga ndongi yasô na gésangôge setso, we dôta tômakasôgédu. Ene ématsôkéa we égo te gôsikiné anye ndongiye. Na tômakasôgédu pepe vamanigôa Tite na kuma épôni gô éne émeendéanye angô gôémôkenea.

¹⁴ Namanôkuméda mbeego vandé Tite, n’anye nôsitsiké me na tsoyi. Vavovo me n’anye tsapata. Na kumane yanyô émookô Tite ésipaté.

¹⁵ Ti vavigi Tite gôndé anye tsangône éanyô épaa na gényôngage géôkô angô anye. Asatsika énigôa gamagobedanye ndongiye yedi na gamatsôkéa anye gétsigéô sedi na gôndé anye.

¹⁶ Me Paul tsabadô na mikebanganô gôndé anye. Te gényônga gétévo.