II Corinthiens 6 - New Testament in Mitsogo

¹ T’ebandô we eekédi tôyanza évévé éyanzevo na Nzambé, tônôtôma mbe: Nômbiasinga édimbanéda ngeba dimeenanô anye na Nzambé.

² Nzambé atônigôa gô Matendeo medi mbe: Me namookô ôgie woo, te gô ndéône éami éangeba na éetondo. Me namagôwedéa te gô nyee agéobogeo. Nôeni, ndéône ébuéyi éne ésingéô ngeba na étondo éaNzambé. Deo noo te nyee agéobogeo.

³ We eekédi tônyôngéô édigaa na éyanza gô mônongo amôsôba gômbe gôsangaba môma angeetsa we ôési gô môdigédie wasô. Tôsanyôngéô ékuéséda môma ta n’ebégô évo.

⁴ Tônyôngéô étubéda oma muetso mbe we te ayanzie aNzambé. Tôbibéda ti bibéda magugame na panda na mabégô madagani maminongo mietso.

⁵ Tômabitô na mibitô na tômeengédu na gô eba atsôgôô. Oma amatuba n’asô misoso miagébé n’ebandô. Tômayanzédu tsôgôô we gébé n’oési. Oma asienede we éso avio, na asiitsé we môyakô amookedu we nzaa.

⁶ We tôtubéda mbe tôndéké ayanzie aNzambé gô môdigédi asô ômagôgéani, na gô ngeba yasô na gôndéké we na ngudi yaGédidi SaNzambé, na gôndéké we na étondo ésapenganani,

⁷ na gô éékéda we mane mapie gô ngudi yaNzambé. Ekeeyie étsôpa we gôégenya n’akasô, na gôéebakanéda wéene, te ékeeyi ésabévéda môma.

⁸ Tôkumédu na tôtsuavô. Tôséngu na tôdetu. Tôéndô mbe apati, tambô tôvovo ti mane mapie.

⁹ Atôdeta mbe ?ône avigi gôni? ?ône ndaa? ga môma abobo, tambô tôndé oma amenyanganôni. Akanéga we ga gétséké sanzumbi tambô we tôndé ti adôngani, na anye nôsabômu mbe tôndé t’ekenge. Oma asiséda we ivô asangoongôa étôyôha.

¹⁰ Miso masô te keba, ivô gô mitéma tôndé na gényônga. Tômenyanganô mbe misuga, tambô tôdôngéda ayekani n’okitie ôndé n’asô. Tôsaba ta na dode épo mbe tôsômba sôma, tambô tôsabuta sôma.

¹¹ Me Paul navovo n’anye asi Corinthe, gésuégé ébégô. Napandôéda mane mandé gô môtémami metso gébé na buembe vandé anye.

¹² We eekédi tôsakukéga mitéma miasô gôndé anye, géé anye nômakukéga mine mianyô. Me nandé na géviôviô gôndé anye. Anye gôndé me ?nôndé nayee?

¹³ Me Paul navovo n’anye ti eembe anye te anami. Nyôngéôni we eekédi mônongovo ganyôngéô we anye. Pandôédani mane mandé gô mitéma mianyô vandé we eekédi.

Nômbiavamba n’ane atsuma Christ paga

¹⁴ Nômbiavamba n’ane atsuma Christ paga. Esaba kuanakue gôndé môma aChrist gôévamba n’ane akina Christ. Tasani ?éne ématsimamani éngavamba n’ene ébévani nayee? ?Na gévede géngavamba n’evitsi nayee?

¹⁵ ?Christ angookanéô na yabédé nayee? Na vane ?ône ameetsa Christ môtémedi angaba n’etasevo n’one atsuma Christ paga nayee?

¹⁶ ?Eba ôkumédu Nzambé ôngavamba na mbumba ditoko Nzambé nayee? Gôébégô wa n’anyô tôndéké eba aNzambé ône ôdôngani. Amuene Nzambé amavovo mbe: Nandé n’ebami, nadigaa va gatse omami. Me te Nzambé éaô, ahngô dôta te anami.

¹⁷ Te gamavovo Kumu Nzambé mbe: Anye omami, nôtôgani aaganani n’ahngô Nômbiabanda ta na bandaga, mane maô mevindô Me nanganôwanyéda omami na gényônga.

¹⁸ Me nangaba Tétanyô N’anye dôta te anami amôgôô n’anami ageto. One avovoni te me, Kumu angudi yetso.