II Corinthiens 5 - New Testament in Mitsogo

¹ Tôsabômu mbe yôtôye yasô n’anyô te yeba yebandé didigaa we va tsina. Vangapanzô yebaye yebandé éedi, tôndé na yene yag’ôba dikenea Nzambé gôndé wa n’anyô. Amuene amayanza yangô na mogo medi na disangadôboo.

² Wa n’anyô va tsina tôbisa na panda gô yebaye yebandé dindé n’asô éedi, na tôbénga te yebaye dindé g’ôba dingadigaa édidi éasô n’anyô.

³ Menyani mbe wa n’anyô g’ôba tôngaba na yôtô na tôsangaba ga gédidi gésaba n’otô.

⁴ Pitsi yasô yetso yava tsina tôbisa na panda gô gatse ayeba yasô n’anyô yebandé gôébégô yangô te magumba. Kaka mbe tôkina yôtô yedi yamagumba, ivô tôbénga te dine diôtéa ényepani yag’ôba. Buedi mbe yebaye yamonyo ôsakôdéakani didimbanéda dine yebandé yowa.

⁵ Te gamatôvangô na Nzambé v’ebandô mbe tôngakou te nane. Na amatôditéga môkodie, te Gedidige sedi gémeetsangô wa n’anyô. Môkodie ôtômenyeda mbe na gô pie tôngadenga mane mamisôba mamakuégéa angô wa n’anyô.

⁶ T’ebandô wa n’anyô tôsagogo éenéa éne émavanga Nzambé gôndé we. Tôsabômu mbe vatôdinga édigaa na yôtô yedi yava tsina, tôndé gôdagôda na dine dikenea Kumu gôndé wa n’anyô.

⁷ Tôdigaa pitsi yetso mitéma miasô mindé gô éne éseenanôni ti eembe éenanô.

⁸ Na mitéma miasô misanika gévii. We tôndé ga môma andé g’ôgenda madeo asitsiga gô ebedi. Tôôtéa ényôngéô étsika ôtôe ôdôô gôékea gôédenga ône ôndé na Kumu.

⁹ Tônôtôgéyee, tôsanôtôgéyee gô yôtô yedi, tônyôngéô éénda éne ényôngéô amuene Kumu Jésus.

¹⁰ Gô éne éyanza we tôdônga na yôtô yedi tôngatsundédu vatema we va mbene aChrist. Tôngadiia, môma na môma, éne éndé kuanakue n’edi buéyé mbe mane mamisôba vo mane mabévani gamayanza wa n’anyô gô yôtô yedi.

Christ amanikéa étôvambéda na Nzambé

¹¹ Wa n’anyô tôsabômu égobeda Kumu na gomo. T’ebandô tôtévéda oma mbe akoa matasa maô. Nzambé asabômu we v’ebandô na v’ekôdéô. Me Paul naténdéda mbe gô mitéma mianyô anye dôta nôsabômu me.

¹² Kaka mbe tôomba éakuméda wéene va mbene anyo. Ivô tônyôngéô mbe anye nônyemôga n’ekasôga gôndé we eekédi, gômbe nôngamenya éaabéa ane anyemôga gô mane meenanôni. Nôngaabéa ahngô gô mane maseenanôni mandé gô mitéma.

¹³ Okô mbe we tômavétsu môkambô, tômaavétsu te gôéyanzéa Nzambé. Okô mbe we tôndé ti ékenge, tambô tôndéké te gôéyanzéa anye.

¹⁴ Gôébégô étondoe éndé na Christ, te éangô étôma wa n’anyô. Wa n’anyô te ane asaba na paga mbe môvo amawa te gôndé muetso. Evéndégéô mbe wa n’anyô muetso tôwéyi ôwoovo n’edi.

¹⁵ Amawa gôndé muetso gômbe ane adôngani asangadigaadô gô monyoe ônyôngéô anguene. Ivô ahngadigaa gô monyo te gôndé ône amawa na amakunduga gôndé ahngô muetso.

¹⁶ T’ebandô tôsangadôbono môma gô éne éenanôni éotô. Vamapanga tômamenya mbe Christ te môma, tambô deo noo tôsamôenadô mbe, môma.

¹⁷ Okô môma aka monyovo na Christ akou pepe, aka wene mônongo amôma. Metso mane mamabaka n’edi mambeego mamadimbana. Na mane mandéké n’edi te mamanza mamisôba.

¹⁸ Metso mane tômadiia gôndé Nzambé. Angô Nzambé amanikéa évamba na wa n’anyô oma gô ngudi yaChrist. Angô Nzambé amatôma wa n’anyô gôéweseda akasô na gôndé angô mbe na ahngô muetso anganikéa évamba na Nzambé.

¹⁹ Endé te nane. Nzambé amayanza na Jésus‐Christ gôénikéa évambéda oma n’amuene géboné ébévee éasô n’anyô oma. Na amatôtôma tungu yetso gôénigôa tsangô éevamba émavangangô.

²⁰ We gébika saChrist tôvovo n’anye, ti eembe te amuene Christ avovo n’anye. Tônôbambéa ti eembe te amuene Nzambé anôbambéani. Tônôgondo gô ina aJésus‐Christ mbe singani angô gôénikéa évambédu évambevo na Nzambé.

²¹ Jésus‐Christ asibaké n’ebéva ivô Nzambé amakoa angô aka môbévi gô ébévee éasô n’anyô. Wa n’anyô dôta tôsibaké n’etsimama ivô Nzambé amakoa we tôka tômatsimamédu gô étsimamee éaJésus.