II Corinthiens 3 - New Testament in Mitsogo

Tôndé ayanzi atômu n’evamba éamanza awene mônongo

¹ ?Tambô vavovo we eekédi mbe tôndé na mbôngane éamôsôba émeetsa Christ tôakuméda weene‐a? ?Wa n’anyô tôngadukana wa n’anyôene na wa n’anyôene ésangô étubéda mbe ôdôô môma aNzambé‐a? Te ga eenda avo.

² Anye nôndé na gésangô gô mitéma mianyô vamayanzéa we anye. Gésangôge géne te géne géenanôni na gétanga oma muetso.

³ Eenanô na vede mbe anye te gésangô gématenda amuene Christ na we eekédi tômagékuya gôndé anye. Gésangôge géne gésitendu na mbii éamôtondo ivô gématendu na Gédidi SaNzambé géndé monyo. Nzambé asikuété sangô gô ôkadô etaé. Amakuéta gésangô sedi gô môtéma ôdôngani amôma.

⁴ Tôvovo mabégô mema gôébégô tôsatsuma Nzambé paga gô éne éyanzangô gô ina aJésus‐Christ.

⁵ We eekédi tôsabômu mbe wéene tôsaba na ngudi gôéyanza mabégôme mavôni éma. Ngudiye dindé n’asô gôéyanza diviga te gôndé Nzambé.

⁶ Te Amuene Nzambé amatôkoa tôka ayanzi edi eevamba éamanza éawene mônongo évambéda Christ. Evambee éamanza éne ésasipa na mige mimatenduni, ivô ésipa na Gédidi SaNzambé. Mige mimatenduni mibuéda ôwa na gôndé oma. Gédidi SaNzambé géétsa oma monyo.

⁷ Mige miaNzambé mimakuétu bénda na bénda gô dikadô yamataé. Obébayi ôtubéda ôndômba wetso aNzambé ômeenanô gô ndéô ématsiga migemie mine na gôndé oma. Gédimô saMoïse gématana na memayi. Asi Israël asiôngôé émôbono. Mige mimatsiga n’obébayi ondômba aNzambé va gatse oma, ivô ôbébayi ômadimbana. Okô mbe mige miaNzambé mine mitubéda môma ôwa na mimabuéa n’obébayi wetso,

⁸ tambô asani ga ootéa ôbébayi na ôndômba ôviga na Gédidi SaNzambé vatôma sangô.

⁹ Môtômine amaviga gôéeséda oma amabuéa n’obébayi ondômba. Tambô na môtômine aviga gôétsimanéda oma va mbene aNzambé ?asangaviga n’obébayi ôôtéani ôtubéda ôndômba wedi‐a?

¹⁰ Obébayi amapanga ôgono n’one angondene. Tambô ône amôbaé ôgono n’one akômbéne.

¹¹ Ene émabaka na ngudi g’ôtangô apitsi émabaka n’okumaka edi. Tambô tasani g’ôndômbee ôndéké na éne éndé éamôbô na môbô.

¹² Tsoongone éasô n’anyô éndé te gô éne éamôbô na môbô na we tôsaba na buétsé, tôndé na bôkédé.

¹³ We tôseenda gameenda Moïse. Amapika môtsé edi na môkanda kabaga asi Israël eena vadimbana ôbébayi ôtubéda ôndômba aNzambé, ôdimbana gô gédimô sedi.

¹⁴ Mitéma miaô mimabaka géôngôé enigôgéô éne émeenahngô. Ngu na deo noo mitéma miaô mindéké gamimapikô na môkandee ône vatangahngô Matendeo MaNzambé mevamba éambeego. Môkandee ône ôwatô na ôgunyu te vavamba môma na Jésus‐Christ.

¹⁵ Buéyé pitsi yedi vatangahngô miganda mimatenda Moïse, mitéma miaô mindéké mimapikô na môkanda géôngôé émenya éne étangahngô.

¹⁶ Ivô te gatônigôu na Matendeo MaNzambé mbe: Vakoa môma môtémedi na gôndé Kumu, môkanda ômapika môtémedi ôwatô na ôgunyu.

¹⁷ Menyani mbe vatôôkô éva mbe: Kumu, événdégéô mbe Gédidi SaNzambé. Gô tungu édenganô Gédidi SaKumu, wangô gôdenganô dôta na mitéma mimakusa gô évitsi.

¹⁸ Wa n’anyô muetso tôsaba gamabaka Moïse na gédimô gémapikô na môkanda. Tôndé na édimô éasô n’anyô éava vede étana n’obébayi ôtubéda ôndômba ôndé na Kumu. Na wa n’anyô tôndéké tômakoamani tôgono na amuene Kumu. Ondômbee n’obébayi wedi aNzambé ôndé n’asô n’anyô deo noo, madeo ôsigono n’one ôngaba n’asô n’anyô. Eetso éne te éyanza éaGédidi SaKumu gô mitéma miasô n’anyô.