II Corinthiens 12 - New Testament in Mitsogo

Miôtô mimeena Paul

¹ Buéyé mbe ésaba éamôsôba gôndé môma gôébatéda amuene, me naabatédi memuene gookiô anye n’atsatsee gô gésangô gegé. Nangatsika vita mane, nanganônigôa miôtô mimatubédu me na Kumu Nzambé gôétsutsua mane medi masimenyanganôni.

² Gôndéké môma aChrist andé na me n’evamba na Jésus. Amatsuaô na gô ngongo g’ôba amôtatô. Okô mbe na gô pie amatsuaô g’ôtô edi géé kaka g’ôtô tsamenya ivô te amuene Nzambé asabômuni. G’étsuéô angô gôka nzima na mipuma minayi.

³ Ii, tsatsuma paga mbe mômôgôô nône asibuéé na gôdigaa Nzambé. Noomba énônigôa mbe ôkô mbe na gô pie amakea n’otô edi vo ameena môôtô me tsamenya ivô te amuene Nzambé asabômuni.

⁴ Gô ngongo g’ôba gône gôdigaa Nzambé, mômôgôô nône amookô mabégô masiôngôé angô énigôa. Gôndé môma gôénigôa mangô‐môge.

⁵ Me naakuméda memuene gôndé mômôgôô nône. Tsaakuméda gô mane mamemuene buétsé te gô mane matubéda gasaba me na ngudi.

⁶ Nandéké na mabégô mayekani mapie moongôa me éaabatéda gééndô mbe, avovo ga tsôga. Ivô tsanyôngéô mbe oma amenya me gô kumane éamemuene. Nanyôngéô mbe amenya me gôenahngô mônongoe wami na mavoviame mami na môdigédie wami.

⁷ Gômatsutsuédu me na Nzambé mabégô mavôni mav’esooe maseenanô n’oma ayekani, Nzambé asanyôngéô mbe nabé na nyemo gô mangô. T’ebangô nameetsô g’ôtô ami ébeea éapievia étsoko me ga tséndé éviga gôndé Satan gôétubéda me panda na ésugéda me kabaga naba na nyemo.

⁸ Kuka ditatô namaduka Kumu Jésus gô ébégôe édué mbe adôngéda me na akuséda me gô panda yedi.

⁹ Kumu amaabéa me mbe: Aé. Tsagônôtôa tséndé nene. Ivô gô tsina ebégô édagani éne, nandéké n’ewe gôégôsipéda. Ombiabuta sene sôma. Okô vasaba éwe na ngudi, dine yami dingeenanô na vede gôndé éwe. Kumu amavovo te nane. Me Paul nanôbeenda mbe nootéa étsôkéa g’ôpôpée wami buta mbe ngudi yaChrist dingeengéa pepe na gôndé me.

¹⁰ T’ebandô natsôkéa ôpôpée wami, na matokime maakasô na pandaye n’ekuanôe éetso, na magugame metso meena me gôndé me môsi Jésus‐Christ. Vandéké me vipôpéa te gaka me na ngudi.

Mikebanganô mimiba na Paul gôndé asi mbumu éaNzambé gô Corinthe

¹¹ Anye nôbakéga me gôévovo ga môma andé tsôga. Anye mbe nôsungéa me‐géé nane, nôsungéa te avo avôni aviga na gôndé anye apata mbe: We tômatômu na Christ. Buéyé vasaba me môma môvôni tsaba gô tsina ahngô.

¹² Mane mamayanza me va gatse anyô n’obibô na môvinéné na gétabé, mamatubéda mbe na gô pie namasevou na namatômuku na Christ. Mayanza mami te émbégéa éangudi yaNzambé na mayanza maGédidi sedi, na mabégô mamisôba matsapéô môma masoongôa angô énigôa.

¹³ ?Tambô tsinônyepeda anye asi Corinthe gamanyepeda me dipo mbumu yaNzambé‐a? Na gô pie tsinôduké soma. Kokooye anye, ôkô nanôbévédi gô éne.

¹⁴ Nôéni me navigi na gôndé anye môtôô amôtatô. Ivô tsangaba môgenda anyô. Nanyôngéô te anye, kaka dode yanyô. Endé te nane. Kaka anéngé ayanza gôédiia dode gôékenea iyee na tétee. Te tétee n’eyee ayanza dode gôékénéa anaô.

¹⁵ Gôndé me nangeena buedi gôékaba éami eétso na gôndé anye. Nakabéyee béye na memuene muetso gôénôwedéa. Vangeenda me nane, ényôngéôe éami gôndé anye ébata te bataga, ivô éne éanyô gôndé me ésugéa te sugéa. ?Ebégôé éne ékegea nayee?

¹⁶ Anye nôsabômu mbe ngu na deo noo me kaka égumba gôndé anye. Ivô ane andé na paga va gatse anyô nôvovo mbe: Tôwemani na Paul. Gôndéké yene ébégô évooto angô wa n’anyô. Aseendô gôébômedu oma.

¹⁷ ?Nanôbômédu nayee? ?Te gômakudégéa me anye eekédi‐a?

¹⁸ Namatôma Tite na gôndé anye. Namakudéga dôta n’edi muana aTétee môvo asabômu anye. ?Tambô me te nanôtsôgéda bobo‐a? ?Tite asanôtsôgéda bobo‐a? Bonokoni wa n’edi tôndé te mônongovo. Meekédume te mavo na matambéme matôyetani te mavo.

¹⁹ Me tsabuta éatsimaméda memuene va miso manyô gatasa avo oma. Navovo ganyôngéo Christ va mabene aNzambé. Mane mavovo me n’anye wee yami, te gôéweseda anye gô nzéa éaNzambé ékeanye.

²⁰ Me Paul nakebangana mbe kabaga tsanôdenga gaténdéda me. Na kabaga me dôta tsaba n’anyô gamaténdéda anye gôndé me. Mavooe kabaga nadenga dôta va gatse anyô masaganéda, na ngusu, na dipisa, na tatô, na matoki, na matsuavi, na dienza, na mabégô masagô.

²¹ Vangoomba me étsiga va gatse anyô namenya mbe Nzambé angasugéda me va mbene anyô gôédéa gôndé ayekani ameenda mabégô mabévani va mbeegô géniké gôésingéô kokoo gô ésima éaô éevindô na gésasô setso gémayanzahngô.