II Corinthiens 11 - New Testament in Mitsogo

Paul na eekédi adiboe

¹ Singéa me navovo ga gégiô gôéakuméda memuene. Oôkôni édué.

² Me nakenea anye gakeneo tômbô ématetedu gô yômba, na ésangabongu na muene. Môkeneyi edi ookô mangongo vabonu angô na muene mômôgôô. Te gookô me mangongo gôndé anye. Na mangongome mangô maviga te gôndé Nzambé. Me nakenea anye ngu na vangaviga mômé anyô Jésus‐Christ gôénôbongo.

³ Me nandé na mikebanganô gôndé anye kabaga matasa manyô mabunzéga na kabaga nôgéngôga gôékina Jésus‐Christ na kabaga nôbômu gamabômédu Eve n’oboe ômapata nyogo.

⁴ Ane oma agésingiasingia nôyavôga ésinga nyene tsangô ééndô mbe éaJésus. Na éangô ésaba éapie. Nôsinga na sene gédidi gésaba saNzambé, na mavo mabégô masaba maNzambé. Metso mane masawanya na mane meekéda we anye. N’anye nôsamenya ésevoa.

⁵ Anye nômenya mbe ane aviga gôénôékéda mabégôme mane te eekédie enyanga évôni. ?Tambô me Paul kaka môékédi môvôni‐a? ?Me tsitômu na Jésus‐a?

⁶ Mavooe gôévovo nandéké inzua amaama. Géé gôémenya mabégô metso maNzambé tsaba inzua amaama. N’anye nôsabômu gamanigôa we mangô kuka yetso.

⁷ Vameekéda me anye Tsangô Eamôsôba émakudéga Nzambé, tsinôduké ta na sôma. Namasugéa memuene gôétômba anye. Mavooe namabaka n’oési gôéénda nane.

⁸ Asi mbumu éaNzambé gô dipo mbôka amawedéa me, géé anye, me tsinôduké sôma. Namagoomboo akanyô asi mbumu éaNzambé gô dipo mbôka gôédôngéda anye.

⁹ Vamadigaa me n’anye gô Corinthe me tsikeneo n’anye kumu yambôka. Namakeneoko n’ana aTétee amaviga gô Macédoine amatsuéa me éetso émabuta me. Gôébégô me tsinyôngéô éba gôndé anye ga égumba. Ngu na deo noo éndé te mônongovo.

¹⁰ Me tsoongôa épata gôébégô mane mapie maJésus‐Christ mandé n’ami. Nanôbeenda na gô pie mbe me neena buedi gô tsenge éaGrèce. Me nabôngôa te memuene gébone miso mami gôndé anye asi Grèce.

¹¹ ?Me navovo nane gôndé¿ Tambô me tsanônyôngéô‐a? Esaba nane. Nzambé asabômu ganyôngéô me anye.

¹² Mane meenda me tsangatsika mangô. Neenda mangô gôékitsa makôdô mane adigaa n’anyô wene mônongo na aakuméda anguene akanéga mbe: We te eekédi ga Paul.

¹³ Amôgôôe ane te eekédi adiboe. Apatéda éne éyanzahngô na abômédu anye mbe: We tômatômu na Jésus‐Christ.

¹⁴ Tôsoongôa étsapéô gô mônongoe waô. Amuene Satan avéngôga aka ga môsi g’ôba n’obébayi ti eembe aNzambé, gôébôméda oma.

¹⁵ Tambô na ayanzi edi eenda te mônongovo, ahngô abévani akanéga mane mamisôba. Esaba ébégô éatsapéô. V’ekôdéô angeetsô kuanakue n’ene éyanzahngô.

Panda dimeena Paul gô éyanzee édi émasevou angô na Nzambé

¹⁶ Gô mane mavovo me nanôbeenda mbe me tsavovo sagôsagô ga tsôga asamenya mane mavovo angô. Okô nôtsumi paga mbe: Paul te tsôga, te buedi, vovokoni ganyôngéô anye. Me naakuméda memuene.

¹⁷ Kumu Jésus asanyôngéô mbe naakuméda memuene te geenda me Paul mbe navovo ga tsôga gômbe anye nôngookô.

¹⁸ Gôébégô avo eekédi aabatéda anguene gôéséngu n’oma ôséngu, tambô na me nangaabatéda dôta memuene te nane.

¹⁹ Anye nôndé n’eodo na gétabé nôsadagéô môsi tsôga.

²⁰ Nôsabômu metso ?nayee nôsinga avo aviga na vandé anye gôénôtôma ga avéga? Na anôtsogeda bobo, na anôbôméda na anôbono va tsongo eeso gôédeta anye, na anôkunéga. N’anye nônyôngéô eekédi amônongo ône.

²¹ Me môékédi abobo, tsibé na dienza gôénôénda nane. Tambô me nandé na tsoyi gôébégô anye nootéa ényôngéô oma adienza. Ivô ôkô mbe gôndé môma andé ngu gôéabatéda amuene, te me Paul navovoni ôdôô. Navovo ti eembe, tsôga.

²² ?Ane asingana n’anye te asi ôgi aHébreu‐a? Me dôta tsavovo gémbéta, me to môsi ôgi aHébreu. ?Ahngô te asi éongo éaIsraël‐a? Me dôta te môsi éongo éaIsraël. ?Tétaô te Abraham‐a? Na me muetso, téta te Abraham.

²³ ?Ahngô te ayanzi aNzambé‐a? Oôkôni édué, navovo ga môma amadinga g’ôtsôga. Me nootéa ahngô gôéyanzéa Nzambé. Namootéa éyanza n’ahngô asiyanzé. Kuka yetso namabaka gô eba atsôgôô gôékéda me mabégô maNzambé, n’ahngô asiengé. Namabômôu kuka yetso, n’ahngô asibômôu. Kuka diyekani namavétsu n’owa, n’ahngô asivétsu n’owa.

²⁴ Kuka ditayi namabitô na môbitô ôndé na Ajuif gandé ahngô na gésima saô sebita môma nzima ditatô na mibitô mitenaminayi kukepo.

²⁵ Kuka ditatô namabômôu na asi môsenge aRome. Kukepo namatumu na mataé mbe ayôha me. Mitôô mitatô mimakea me gô mubu, mbôngône ématondoméa. Na kukepo namabénza pitsi amôbongo gô mubu gôéenéa mbôngône n’ane amaviga gôébuta me.

²⁶ Gô mitôô miyekani mimakea me nameena panda na éningô, n’asi môkôbé. Nameena panda béyé n’Ajuif n’ami. Nameena panda n’ane asaba gô éongo éAjuif. Nameena panda gô misenge mivôni na gô tungu émagasani gôsaba oma. Nameena panda gô mubu. Nameena panda va gatse ane abévani apata mbe: Wa n’anyô muetso te oma aChrist.

²⁷ Namayanzédu mayanza madagani. Nameena maguga mamootéani. Pitsi diyekani oma asisingé me neeboga vio. Namookô nzaa na sôé. Kuka diyekani oma asidugédu me môyakô. Namookô sodi na tsibé na mikanda.

²⁸ Na va mbene éametso mane, nandé na mikebanganô gôékenea asi mbumu éaNzambé gô tungu yetso.

²⁹ Okô va gatse asi mbumu éaNzambé môvo abé vipôpéa na me dôta nangaba te vipôpéa. Okô movo akuéyi gô mabégô mabévani me nookô pievia gô môtémami.

³⁰ Okô nônyôngéyiô mbe me naakuméda memuene geenda avo, tambô naakuméda memuene gô mane masaba me na ngudi.

³¹ Nzambé Tétene éaKumu Jésus te gémoni sami gésabômu mbe me tsapata. Te mbe inedi ékumédu môbô na môbô.

³² Vamabaka me gô Damas môtômine amôsengee ameetsô ôtômu na kumu atsenge Arétas, amatôma migode gôéwema gô nzéaye yetso gôétsôpa me mbe kabaga nabusuga gô yangô.

³³ Ivô namawedéô n’akasô. Amakuséda me gô épôdéké gô ngongo amôgômbee. Amasutuméda me na gô tsina gô gésambi na vane namabusuga.