II Corinthiens 10 - New Testament in Mitsogo

Paul anigôa éyanza émasevou angô na Nzambé

¹ Me Paul nanôgondo mbe kokooni yanye, ôôkôni éne énganônigôa me. Avo nôvovo mbe vadigaa Paul vandé we éva andé ti môsiki edi na gétabé. Ivô ti mane makudégangô andé gôdagôda te matsakiméda môtéma amôma. Me Paul nanôgondo gô ngeba na gô divooti yamuene Christ mbe

² nômbiabakéga me kabaga navovo pepe vangaba me va gatse anyô. Okô nôbakégi me nôngookô gangavovo me n’avo va gatse anyô. Amenya mbe nanôongô ndongi gô ngudi yamemuene môma, gébé n’eodo éaNzambé.

³ Na gô pie ôtôe wami te amôma, ivô ébadi égenya me tsagenya ga môma asamenya éne ééndangô.

⁴ Ekeeyi égenya n’ami kaka éne éamôma atsengene. Ivô te ékeeyi émeetsô wa n’anyô na Nzambé éndé na ngudi buéyé gôébunza mayanza mayabédé. Tôndé gôébunzéda nzéa yadiboe divaka oma gôékanéga éwesea na gôndé Nzambé.

⁵ Na mayanza maô, oma asaa môgômba ôebakanéda môma gôémenya Nzambé. We tôndé gôépanzéda môgômbee ône gôékukua nzéane gôndé oma gôémenya Nzambé. Na ékeeyi éétsa Nzambé me, nagenya gôétsôpa matasame moma gôémakeda gôéneegeda Christ, gatsôpu môsi tsôgôô.

⁶ Buedi mbe nôgobeda ndongi yaNzambé gôébégô me nandé na ngudi yeetsa tsôgôô gôndé ane asagobedani.

⁷ Anye nôndé na gésima sebono éne éenôni. Tambô tôbonékéni wa n’anyô muetso. One eenda mbe: Me te môma aChrist, atanganédé dôta mbe we muetso te oma aChrist mônongovo gandé angô.

⁸ Me tseena tsoyi buéyé ganyemôga me gô ényangee émeetsô me na Kumu. Enyangee éne éndé na me gôénôweseda na gôndé Nzambé kaka gôénôbunganéda.

⁹ Tsabuta émenyanganô mbe: Paul te ône atatéda we n’esangôe yedi.

¹⁰ Tsabômu éne évovo avo va gatse anyô. Avovo mbe: Mavoviame mesangô étenda Paul madaga, na maduméda we mitéma. Ivô vatema amuene va miso masô, andé ti gédebe na asoongôa évovo.

¹¹ Anye nôvovo nane, menyani mbe éne étendea me anye gô gésangô nandé gôdagôda n’anyô, na éne éénda me vandé anye, ébégôe te évo.

¹² Na gô pie me tsangoongôa éakuméda memuene geenda avo oma aabatéda anguene va mbene anyô. N’ahngô eenda ôdungé. Akina ôkana ômeetsô ahngô na Nzambé. Ahndéké môma na môma na wedi ôkana. Andé na dikana diyekani yamanyepa maô.

¹³ Géé gôndé me Paul tsoongôa éénda mbe nootéyi ényepee g’ôkanee ômeetsa Nzambé. Okô naabatéda memuene te gô éyanzee émeetsô me na Nzambé. Gô éyanzee éne nangaviga na gôndé anye.

¹⁴ G’ôkanee enyangee émeetsô me na Nzambé, nandé n’otômu gôndé anye gôébégô te me namatsuéa anye Tsangô Eamôsôba éaJésus‐Christ.

¹⁵ Me tsabuta ôséngu gô mane mamayanza akasô va gatse anyô. Me nanyôngéô mbe anye gô meekédu mameetsanye mitémamie nôngawesea gô mbene na gô mbene gôémenya mane maNzambé. Na mbe nangoomba éba n’eyanza évôni va gatse anyô ganyôngéô Nzambé. Gôébégô Nzambé eetsa môma na môma môkabô atsaga éngayanzangô gékôndé na gô éne éamôkedi.

¹⁶ T’ebandô nandé na ngudi yetsua Tsangô Eamôsôba éaJésus‐Christ na gô ékôô éanyô, gébuéé na gô tunguye diyanza akasô mbe nanyemôga gamayanza we wangô.

¹⁷ Endé te gatônigôu na Matendeo MaNzambé mbe: One anyôngéô éakuméda amuene akumédéké te éne émadugédu angô na Kumu Jésus.

¹⁸ Endé te nane. Okô môma asénga amuene, ôséngue ône ôsaba na tsoongo. Oséngue ôndé na tsoongo te ône ôséngu môma na Kumu Nzambé.