II Corinthiens 1 - New Testament in Mitsogo

Mikudéga na ditimôgi

¹ O te me Paul namasevou na namatômuku na Jésus‐Christ gamanyôngéô Nzambé. We tôvovoni te me Paul na muana aTétee n’asô n’anyô agô mbumu éaNzambé, Timothée. Gésangô gegé te sanyô asi mbumu éaNzambé nôndé gô môsenge aCorinthe na gô tsengene nyetso éaGrèce.

² Te mbe Tésasô n’anyô Nzambé, na Kumu asô n’anyô Jésus‐Christ anôétsa mate medi na gétabé sedi.

Paul akuméda Nzambé

³ Tôkumédéni Tétasô n’anyô Nzambé na Kumu asô n’anyô Jésus‐Christ. Angô te Tétee atôétsa éetso gô ngeba yedi gébé na ninga. Angô te Nzambé atôsuméda mitéma gô ndéô yetso.

⁴ Angô atôsuméda mitémamie gô maguga metso meena wa n’anyô gômbe na wa n’anyô tôngamenya émogeda akasô mbe asuméda dôta mitéma miaô gô maguga meenahngô. Vane wa n’anyô tôkea tôkewanyéda n’ahngô moonga gô mane mawedéô wa n’anyô na Nzambé gô ndéô émabaka wa n’anyô na panda.

⁵ Mônongovo gandé wa n’anyô gô maguga mamabaka Jésus‐Christ, mônongovo dôta amuene Christ atômogeda gôéwanyéda n’asô n’anyô moonga gô magugame mameenakangô.

⁶ Menyani mbe ébandôe éamagugame matôenani te mbe tôngasumédu mitémamie na tôngeetsô géobogeo na amuene Christ. Okô mbe we eekédie tômogedu na Nzambé gôésumédu mitémamie, te mbe we tônganômogeda dôta na anye nôngasipa na ôbibô na môvinéné gô magugame manyô, te mavo na mane meena we éva.

⁷ Vane we tôndé ti na gényônga gôndé anye gôébégô vagésangananye maguga mavo n’asô, anye nôngagésangana dôta évo n’asô gô éne ésipédu we.

⁸ Ana aTéta asi mbumu éaNzambé, we tônyôngéô mbe nômenya tsangône éasô éapanda dimeena we gô tsenge éAsie. Pandaye dine dimabaka ga magumba maditani masoongôa môma étômba. Na we tômabaka gô tsina ayangô ti eembe tôwéyi.

⁹ We tômaniki émenya mbe maaki we makôdi. Tambô émabaka nane gôétôtubéda mbe môma asoongôa ékusa gô panda amuene, ivô ngudiye yetso dindé na Nzambé, ône akundua ane amawani.

¹⁰ Te angô Nzambé amatôoboo gô pandaye dine dimabambanéda we n’owa. Na te angô andé na ngudi gôétôomba éoboo. Ii, na gô pie miso masô mabono te angô mbe angatôoboo gô panda kuka yetso.

¹¹ Na anye nôndé gôéwedéa we vavovo anye na Nzambé gôndé we. Te nane Nzambé aabéa disambôye disambéda oma ayekani gôndé we. Gô éne éamôsôba éyanzéa Nzambé we, ayekani dôta angamôkuméda gô éangô.

Paul amakoa éne émavangangô gôéénda

¹² Bononi éne éndéké n’asô eekédi gôényemôga na ékasôga gôndé anye. Mianga miamitéma miasô mitôtsundéda géesédé we môdigédie wasô na mônongoe wasô ônyepani va gatse ane asavamba na Nzambé na dôta va gatse anye. Tôdigaa n’oma muetso na mavôma maviga gôndé Nzambé gébé na buembe. Te éodo émeetsa Nzambé we étôtévéda nzéa, kaka éodoe ébôtu na môma.

¹³ Gô ésangô étendéa me anye tsavovo na ôvôgôvôgô na tsasuéga anye te n’ebégô évo, tambô tangani na vôtanganôni éne éenanye gô ésangôe. Nanyôngéô mbe wa n’anyô tôôkanéôni.

¹⁴ Oôkôni édué. Gô nyaa ôngaviga Kumu Jésus nônganyemôga n’ekasôga gôndé we eekédie anyô, mônongovo dôta ganganyemôga we n’ekasôga gôndé anye.

¹⁵ Me Paul namaténdéda gôndé anye tsabômu dôta mbe anye nôténdéda gôndé me te gamavanga me mbe nangaviga na gôndé anye mitôô mibaé gôénôkasôgéda.

¹⁶ Namabaka n’etasa gôédigaa n’anye dipo ndéô vangoota me na gô Macédoine. Na vangaviga me gô Macédoine me te oombaga édigaa n’anyô, vane nangoota na gô Judée. Na te anye nôngawedéa me môtôôe ôkea me na gô Judée.

¹⁷ Vamavanga me mbe nangabuéa gôndé anye kuka dibaé, tsivangé yeese. Vavanga me mane mangeendôni, me tsaba na matasa mawa n’anyô oma matévo mbe nangaabéa na mitéma mibaé, ôô môtéma mbe: Ii. Oô môtéma mbe: Aé.

¹⁸ Gandé amuene Nzambé asoongôa évétsua divanga yedi na me tsoongôa énôpatéda éne émavovo me n’anye mbe nasinga. Menyani mbe tsikina.

¹⁹ Wa na Timothée na Silas tômanigôa anye tsangône éaJésus‐Christ Muana ANzambé. Jésus asivigé na yôgi dibaé, ôô ôgi mbe: te nane, na ôvo ôgi mbe: kaka nane. Amaviga na ôgi ôvo aNzambé mbe: te nane.

²⁰ Na gô pie divanga yetso dimavanga Nzambé gôndé wa n’anyô te Jésus atôtubéda mbe Nzambé asapata. Te gô ina aJésus‐Christ tôkuméda Nzambé vatôaabéa mbe: Amen, ébaké te nane.

²¹ Na te amuene Nzambé asapatani ameetsa wa n’anyô monyo ôvo na Christ. Te amuene Nzambé amatôsevoani amatôétsa ényangee éedi.

²² Te Nzambé amatôétsa ndémbô éainedi. Angô dôta amayuéséda mitéma miasô n’anyô na Gédidi sedi gétôtubéda mbe tôndé na tsoongo va mbene aNzambé na mbe tôngadiia metso mamavanga angô gôndé wa n’anyô.

²³ Nzambé te mbangine ookô éne évovo me n’anye éva. Okô napati, amuene angayôha me. Tsiviga na gôndé anye gô Corinthe pitsi yedi kabaga nanôsenba tsembô.

²⁴ We eekédie tôsabuta étindéga anye gô mabégô maNzambé mameetsanye mitémamie mbe: Indakani édué, tsikani édué. We tônôongô te ndongi ditévo gôénôkasôgéda gôébégô anye nômani ésipa gô mabégô manzéa éaNzambé mameetsanye mitémamie gébé na buétsé.