III Jean 1 - New Testament in Mitsogo

Ditimôgi

¹ Me pene agô mbumu éaNzambé nagôkômbôa wee ami Gaïus. Nagônyôngéô na gô pie.

² Wee ami amôtéma me nagôévôa ôkô mbe ôndé te gétabé. Nanyôngéô mbe ôtôe woo ôbaké ékenge gandé gédidige soo.

³ Nameena ti gényônga vamaviga ana aTétee. Amabeenda me gandé éwe ti na vitoo gô mabégô mapie. Tsabômu mbe vitoone éne éndé n’ewe, kaka éatsatsee. Te gô mônongoe ômeekaganô n’ewe gôédigaa gô mabégô mapie.

⁴ Gôsaba yene tsangô étubéda me gényônga ga géne géôkô me tsangône mbe: Anoo ahdigaa na vitoo gô mabégô mapie.

Gaïus amawedéa ana aTétee

⁵ Wee ami, amôtéma, ôéndé ti kuanakue gô mane meendéa éwe ana aTétee n’oo buéyé mbe ane ahndé g’ôgenda.

⁶ Ahmanigôa va mbene asi mbumu éaNzambé gandé éwe n’etondo. Nagôbeenda mbe, wedaka ahngô gô môtôôe waô ganyôngéô Nzambé.

⁷ Endé te nane. Amatimôga amakea môtôôe gôéyanzéa Nzambé gésingé awedéô n’ane asagobeda Nzambé.

⁸ Te gôndé wa n’anyô asi mbumu éaNzambé, mbe tôwedéa omeaa mbe tôgésangané n’ahngô ngudi dipo gôéyanza éyanzevo gôédugéda mane mapie.

Ebégô éaDiotrèphe na Démétrius

⁹ Namatenda vipesu viagésangô na gôndé asi mbumu éaNzambé ivô Diotrèphe, mômôgôô nône abuta éba payi va gatse aô, na angô akina ndongiye dimoongô me ahngô.

¹⁰ T’ebandô vangaviga me nangatubéda metso mabévani meendangô. Avovo mabégô madagani na madiboe va gatse asô n’anyô. Asakôdéa na mane matévo. Angô akina ana aTétee gôéengéa na gôndé angô. Na va mbenene vane adékéda akedi mbe: Nômbiasinga omeaa eengéa gôndé anye. Diotrèphe abuta épatsa ahngô anôtôga gô mbumu éaNzambé.

¹¹ Omami amôtéma tsikani éénda tsingayi gô mane mabévani. Indakani tsingayi gô mane mamisôba. One eenda mane mamisôba kuka yetso, angô te môvo na Nzambé. One eenda mane mabévani miso medi masabono gôndé Nzambé.

¹² Muetso anigôa mane mamisôba meenda mômôgôône eendô mbe Démétrius. Buéyé na mabégô mapie matôtubéda mbe Démétrius eenda ti mane mapie. Na tsangône éami gôndé Démétrius to épo na éne énigôa akasô. Nôsabômu mbe éne évovo me kaka éoboe.

Te kômbô ditévo

¹³ Nandé na pingô yamabégô gôégôtendéa ivô tsangoongôa égôbeenda mangô gô gésangô.

¹⁴ Memuene nanyôngéô égôena pitsi yedi gô pesu andéô gôévovo n’ewe va miso moo.

¹⁵ Te mbe gétabé gébaké gôndé éwe. Wee yoo agôkômbôa. Ewe dôta kômbôa wee yasô n’anyô gô inami.