Hébreux 8 - New Testament in Mitsogo

Jésus te môsungéne asô n’anyô môvôni

¹ Vootanganôni ébégô évôni édué étônigôni. Tôndéké na môdeekedi adigondoku môsungéyi môvôni. Na angô andé digaa g’ôba gô géeyo gémôgôô sangudi va kôbangô agédigaa saNzambé sokumaka. Na amuene Nzambé te kumu angudi yetso.

² Jésus andé gôésungéa wa n’anyô gô éyanzee éamôdeekedi adigondoku gô tsongo éadisambô. Tungune éyanzangô émakônzu na amuene Kumu Nzambé, kaka na môma.

³ Adeekedie muetso adigondoku eengédu gô éyanzee éne gôédeekeda Nzambé dibiia na digondoku yoma. Buedi mbe ône wasô n’anyô dôto aba na sôma sedeekeda.

⁴ Jésus mbe andé gô tsengene angô mbe asaba môsungéyi oma gôébégô gô tsenge nedué gôndéké adeekedi adigondoku ayanza gô tsina otômu Ajuif gôégobeda mige miaô.

⁵ Ene éyanza adeekedi adigondoku gô tsina, te gôékanéga éne éapie éyanza Jésus g’ôba. Tasani éne émabuéa gôndé Moïse gô ndéône émasaa angô eba agébandé ôneegedu Nzambé. Nzambé amavovo n’edi mbe: Moïse, ôba n’ekena gôésaa ti kuanakue ga gégoni gétubédiô éwe vamabaka éwe n’ami gô ngongo amôkôdi.

⁶ Ivô gô ndéô nedué, Jésus ameetsô éyanza éôtéa éne éadeekedi adigondoku. Gôébégô angô te môsungéyi ayene évamba éôtéa ényepa na éne émabaka n’asungéyi ambeego. Evambee éôtea ényepani éyanza Jésus gôétôvambéda na Nzambé ébandôa na divanga diôtéa ényepani dimeetsa Nzambé.

⁷ Evambee éamapanga éAbraham na Nzambé mbe émabaka na ngudi éangô mbe ésinôtôu gôéviaganédu na éne éamôbaé, éaJésus na Nzambé.

⁸ Ivô Nzambé ameena diési dimasemba angô omedi vamavovo angô mbe: Kumu avovo mbe: Nyee ôwesea. Te nyee ôngavamba me éene évamba n’asi éongo éaIsraël. Nangavamba n’asi ébôta éaJuda.

⁹ Evambee éamôbaé ésangaba ga éne émavamba me na peeye yaô Gô ndéône ématsôpa me ahngô g’ôgogo gôékuséda ahngô gô tsenge éEgypte. Ahngô amapanza évambee éne émavamba me n’ahngô. T’ebandô, me Kumu aô namanzeegeda ahngô.

¹⁰ Kumu amavovo mbe: Nôeni évambee éamôbaé éngavamba me n’eongo éaIsraël Vangabuéa ndéône, me Kumu nangakoa matasa maô mbe angamenya pepe mitôma miami. Nangatenda mige na mitôma miami gô mitéma miaô. Me nangaba Nzambé aô, n’ahngô angaba omami.

¹¹ Asangadôbuta môma gôéékéda angô. Na gôsangaba môma anganogôa môkedi mbe: Buedi gôémenya Kumu. Gôébégô muetso angamenya me, Kumu aô. Bandôa n’anéngé ngu na payi, ahngamenya me.

¹² Nangasingéa ahngô kokoo gô diési yaô. Tsangadôtanganéda ébévee émabaka n’ahngô.

¹³ Vavovo Nzambé gôébégô éevambee éne éamôbaé, tômenya mbe éne éamapanga émadinga na émagogo. Tambô sôma gédingini na gégogini géndé gôédimbana.