Hébreux 4 - New Testament in Mitsogo

¹ Nzambé amavanga na wa n’anyô ôvanga mbe tôngeengéa na gô tungune éngavôgima wa n’anyô n’edi. Bakani na gomo na ékéna kabaga tôsanéa ta na môvo gôéengéa gô gévôgiméôge géne.

² Gôébégô wa n’anyô tômani éékédu Tsangô Eamôsôba mônongovo gameekédu ane amakénga gô tsenge émagasani. Buéyé vamookô ahngô yangô ésibé na tsoongo gô mitéma miaô te gôsiwanyé yangô na môténdéda gô mitéma miaô.

³ Wa n’anyô tômeetsa Nzambé mitémamie tôngeengéa gô gévôgiméôge gémakônzangô. Te gamavovo amuene mbe: Me Nzambé neena omee ane ôpisa Namakina mbe: Ahngô gôéengéa na gô gévôgiméôge géndé na me‐môge. Nzambé amakina oma gôéengéa buéyé mbe éyanzee éedi gôékônza tungu émakôdéa vamakana angô tsina n’oba.

⁴ Na dôta ébégô éanyee edunda ématendu gô Matendeo MaNzambé mbe: Nzambé amadunda gô pitsine éatsambué.

⁵ Ebégôe éne éomba étendu gamavovo Nzambé mbe: Ti gôndé ahngô gôéengéa na gô gévôgiméôge géndé na me‐môge.

⁶ Ane amapanga éékédu Tsangô Eamôsôba v’ebandô asiengé na gô gévôgiméô te gô pagaye yaô. Te gamadugédu ôvangee gôndé avo gôéengéa ngu na deo noo.

⁷ T’ebandô Nzambé amoomba ésevoa nyee ôngeengéa môma gô gévôgiméô. Nyee ône ôtetu mbe, deo noo. Nzambé amanigôa ébégôe éne gô ngudi yaDavid mbe: Okô nôôkiô deo noo ôgi aNzambé ôvovo n’anye Nômbioodeda mitéma mianyô.

⁸ Endé te nane. Josué, mbe ameengédaka géômbé sedi na gô gévôgiméôge, Nzambé mbe asiombé ésevôa wene inya.

⁹ Vane gévôgiméôge géndéké gôndé asi Nzambé na sangô gégono na géne saNzambé sapitsine éatsambué.

¹⁰ One eengéa na gône gôédunda na Nzambé, angadunda gô éyanzee éedi gamadunga Nzambé gô mane medi.

¹¹ Tôgényôgéni gôéengéa na gô gévôgiméôge egé saNzambé. Tôweméni kabaga gôkékôa môma ôgi aNzambé na kabaga avéa gôéengéa gô gévôgiméôge gameenda ane amasanéa gô tsenge émagasani.

¹² Menyani mbe Mane Mamavovo Nzambé mandé na ngudi na meetsa monyo. Mengôme medi mootéa mane meebaga. Mengéa gôndé môma ngu na gôwanya gédidi na matasa. Meengéa gô mawanyéô na diôngô ngu na gô misoosô. Matsundéda tsôvéye diôkô môma. Matsundéda na matasa magô tsina amôtéma amôma.

¹³ Gôsaba ta na môma ta na sôma, géngasomo va miso maNzambé. Eetso émakanôni na émavangôni éndé mônyenge gébé na gésomeo va mbene aNzambé. Na te gôndé angô mbe wa n’anyô muetso tônganigôa mane masô n’anyô.

Jésus te môsungéyi môvôni

¹⁴ Wa n’anyô tôndé na môdeekedi adigondoku angô môsungéyi môvôni te Jésus Muana ANzambé amabuéa na va mbene amuene Nzambé. Tambô tôsipéni gô mabégôme medi matôténdédani matônigôa dôta akasô.

¹⁵ Nômenya mbe ?Môsungene asô n’anyô asaba na wa n’anyô go maguga matôenani‐a? ?Na g’ômbuéa ôndé na wa n’anyô‐a? Kaka nane. Andéké na wa n’anyô. Na amuene amakanégu na yabédé gô mabégô metso makanégu wa n’anyô. Na angô asikuéé gôéénda ébégô ébévani.

¹⁶ Tôweséni gébé na buétsé, na gô gédigaa sokumaka saNzambé Kumu angeba. Vatôwesea na gôndé angô tôsingéô n’edi kokoo na tôétsô ngudi gôésipa gô ndéôye didagani.