Hébreux 3 - New Testament in Mitsogo

Jésus te ône ootéa Moïse

¹ Navovo n’anye, ana aTétee n’ami agô mbumu éaNzambé nômabambéô na Nzambé na gô mbumu éedi. Bononi miso manyô na gôndé Jésus, ône amatômu na Nzambé gôéba môsungéyi amôténdéda asô n’anyô, ône ôtôékéda oma.

² Jésus amaba na môvinéné gôémana éyanzee émeetsô angô na Nzambé. Mônongovo dôta Moïse amabaka na môvinéné gôémana éyanzee éedi gô ebee wetso aNzambé.

³ Ebee ômasaôuni ôsakumédu. One akuméduni te môseene aangô. T’ebandô Jésus ootéa ékumédu na ôndômba ôvôni na Moïse asakumédu.

⁴ Yeba yetso dindé na asaayie ayangô. Tambô Nzambé te môseene ayôma yetso.

⁵ Moïse va yedi kuka amabaka na môvinéné gôéyanzéa eba aNzambé wetso. Ivô amabaka môyanzi môtévo, gôénigôa éne ématômuku angô na Nzambé.

⁶ Ivô Jésus‐Christ amabaka na môvinéné gô éyanzee éedi. Angô Muana, ameetsô ôtômu na Tétedi gôétôma eba aNzambé wetso. Wa n’anyô te ebedi ôkô tôsamôtsuma paga na tôétsa mitémamie gôndé ône atôténdédani.

Nzambé amakônzéa asi mbumu éedi gévôgiméô

⁷ Oôkôni éne évovo Gédidi SaNzambé. Angô mbe: Okô nôôkiô deo noo ôgi aNzambé ôvovo n’anye

⁸ Nômbioodeda mitéma mianyô gôémôkina Gamapanganye émôkina gô tsenge émagasani. Gône nômamôdeta te g’ôsôbee wanyô.

⁹ Nzambé amavovo mbe: Peeye yanyô amadeta me g’ôsôbee waô na gô pagaye yaô. Buéyé gameenahngô metso mamayanzéa me ahngô gô nzima dinayi yamipuma.

¹⁰ T’ebandô me Nzambé nandé n’opisa gôndé omee ane, Me Nzambé navovo mbe: Abômédu te na mônongoe amatasa maô. Bandôa va mbeego ahngô asamenya nzéane éami.

¹¹ Me Nzambé neena ahngô ôpisa. Namakina mbe ahngô gôéengéa na gô gévôgiméôge géndé na me‐môge.

¹² Me, môtendine agésangôge egé, nanôevéda mbe: Wemani mitéma mianyô, anye ana aTéta agô mbumu éaNzambé. Kabaga mine mianyô dôta midenganô n’ebéva na paga gôénôtongéda gôdagôda na Nzambé, Kumu amonyo.

¹³ Kasôgédanani anyene n’anyene pitsi yetso gô ndéô nedué, éne ééndô na Matendeo MaNzambé mbe: deo noo. Na te éne éôkô anye ôgi aNzambé ôvovo n’anye. Gômbe gôsangaba ta na môvo va gatse anyô angasingana na mabégô mabévani gôéba na pogu, na ndiba, na môtéma oodoni gôékina mane manyôngéô Nzambé.

¹⁴ Endé te nane. V’ebandô wa n’anyô tômavamba na Christ gébé na paga. Okô tôbé nane ngu na v’ekôdéô, tambô tôndé na gô pie n’evamba na vitoo na Christ.

¹⁵ Oôkôni éne étôbeendu na Matendeo MaNzambé mbe: Okô nôôkiô deo noo ôgi aNzambé ôvovo n’anye Nômbioodeda mitéma mianyô gôémôkina Gamapanganye émôkina gô tsenge émagasani. Gône nômamôdeta te g’ôsôbee wanyô.

¹⁶ ?Ane amookô ôgi aNzambé na amakékôa angô yandaa? Te muetso ane amakuséda Moïse gô tsenge éEgypte.

¹⁷ Opisa ômeena Nzambé nzima dinayi yamipuma ?ameena angô gôndé andaa? Te gôndé ane amayanza mabégô mabévani na amawa. Na nzumbiye dimasanéa gô tsenge émagasani.

¹⁸ Vamakina Nzambé mbe: Ahngô gôéengéa gô gévôgiméô géndé na me, môge ?Nzambé amakina yandaa? Amakina te ane amakékôa ôgie wedi.

¹⁹ Vane wa n’anyô tôena na vede mbe omeaa asiôngôé éengéa na gô tungu éagévôgiméô, te gô pagaye yaô.