Hébreux 2 - New Testament in Mitsogo

Géobogeo te ébégô évôni

¹ Gôébégô éagéobogeo sasô n’anyô te buedi mbe wa n’anyô tôtsôpéni na ngudi mabégô mapie matôôkôni. Kabaga tôyungédu tôkea gôédimbana.

² Ogie ômatsuaô n’asi g’ôba amavigédu na Nzambé ôndé te ébégô évôni. Na oma muetso asiôkôni na asiôgobedéni ahmasisédu gômakinangô Ogie ône.

³ Tasani gôndé wa n’anyô tôngeenda nayee gôébusuga tsôgôô, ôkô tôbéyi na mbôôkô gô géobogeo gémakônzéô wa n’anyô. Amuene Kumu amapanga énigôa gébogeoge gémakônzuni. Na va mbenene vane, avo amookôni amawanyéda Ogie amapanga moonga mbe: Osapata.

⁴ Nzambé ameetsa ôgie ône ényanga gômatubéda angô émbégéa éangudi yedi na mayanza masôbasôbana oma, na gômayanza angô mabégô mavôni manyônganéôni masoongôa môma ésupua. Na gôétubéda mbe ôgie ôsapata akaba ganyôngéô angô migôô miviga na Gédidi sedi.

One aveegéda oma gôéobou

⁵ Menyani mbe asi g’ôba, ayanzi aNzambé asiitsô ôtômu na Nzambé gôétôma tsenge évigani éne étôvovoni.

⁶ Oôkôni gatôtanga gô Matendeo MaNzambé mbe: ?Ah Nzambé tambô sôma sabobo gandé môma Ongatanganéda ahngô‐a? ?Tambô sôma sabobo gandé môma ôngamôkenea gôndé?

⁷ Ivô ômabatéda ahngô gô vipesu viandéô andé gô tsina asi g’ôba, ayanzi aNzambé. Omamôétsa ôndômba na ôkumaka ti eembe andé môtômi môvôni.

⁸ Omamôétsa ôtômu gôétôma éôma éetso. Vatôtanga mbe Nzambé ameetsa môma ôtômu gôétôma éôma éetso ékégea mbe, ti éetso éndé gô tsina otômue wedi gékôndé sôma. Buéyé mbe ébaké nane, wa n’anyô madeo tôsiena mbe môma andé na ngudi gôétôma éôma éetso.

⁹ Ivô tôena môvo, te Jésus amasugéa pesu andéô na gô tsina otômu asi g’ôba ayanzie aNzambé gôéwa gôndé oma muetso gô ngeba yaNzambé. Gô ndéô nedué tômôena abatédu na gô gédigaa sokumaka na sondômba, gôébégô éowa ôdagani ômawa angô gôndé oma.

¹⁰ Emabaka ti kuanakue gôndé Nzambé, angô môkani na môkeneyi éôma éetso, gôésinga Jésus eena maguga mbe angadiia ôndômba. Gômbe angaveegéda anedi ayekani gôédiia n’edi ôndômba ôvo. Amuene Jésus te gétômbiatômbia gékuséda oma gô maguga na géengéda ahngô gô géobogeo.

¹¹ Jésus agôgéda oma ébévee éaô. Na amuene môgôgédine, na ane agôgéduni andé ana aTétee épo. T’ebandô Jésus aseena tsoyi gôémema mbe: Adua te ana aTétee n’ami.

¹² Amavovo mbe: Nzambé ami, nanganigôa ana aTétee n’ami inee éoo. Nangatôa mimbô magéneega soo va mbene asi mbumu éoo.

¹³ Amooba évovo mbe: Me nabono te Nzambé, ône angawedéa me. Na va mbenene vane angô mbe: Me nangôô. Wa n’anee ameetsô me na Nzambé.

¹⁴ Ane atetu n’edi mbe: Anami, te oma ava tsina ahndé na yôtô na nzina. T’ebandô amuene Jésus amakoga gôéba na ôtô amôma. Jésus ameenda nane gômbe angawa na ôtô edi amôma gôébunza yabédé, ône andé na ngudi yowa.

¹⁵ Vane Jésus amakuséda ane amabaka g’ôvéga agomo, gôébégô pitsi yaô yetso yava tsina amabaka na gomo owa.

¹⁶ Jésus asivigé na gô tsina gôéwedéa asi g’ôba ayanzie aNzambé. Te gatôtanga gô Matendeo MaNzambé mbe: Aviga gôéwedéa te ana aAbraham.

¹⁷ T’ebandô amakoga gôégono n’ana aTetee n’edi gô mabégô metso, gômbe angaba môdeekedi adigondoku, môsungéyi aô angudi na angeba vayanzangô va mbene aNzambé. Vane ébévee éamôma ésingéô kokoo.

¹⁸ N’atsatsee Jésus andé na ngudi gôétôwedéa vakanégu wa n’anyô gô mane mabévani, gôébégô amuene amakanégu te nane, na ameena panda te nane.