Hébreux 13 - New Testament in Mitsogo

?Môma gôéséngu na Nzambé ôséngu angeenda nayee?

¹ Nômbiatsika ényônganéôe éndé n’anye éavitoone, nôndé gô mbumu éaChrist.

² Bangôani mbe te anye nôngakenea n’ekenge oma aviga na gôndé anye. Menyani mbe avo amakenea agenda amamenya mbe oma abobo, tambô te asi g’ôba amavigédu na Nzambé.

³ Nômbieeba asi gô eba atsôgôô. Keneani ahngô ga te anyene nôndé gô eba atsôgôô ôdigaahngô. Nômbieeba ane andé gô tsina agékuanô, wedéani ahngô ti eembe te anye nôndé gô gékuanôge gédigaahngô.

⁴ Buedi mbe yômba digobedu na muetso. Na buedi mbe môgadi na mômé abaké n’etondo anguene n’anguene. Nzambé angeeséda asi ôkuanda na asi gésasô.

⁵ Nômbiasinga mbe tsôvé yadode ditôma anye gô môdigédie wanyô. Tsôkéakani te éne éndé n’anye. Gôébégô Nzambé amavovo mbe: Me tsangoongôa égôtsika. Me tsanganôtôga gôégôtsika ômuene.

⁶ T’ebandô wa n’anyô tôôngôa évovo na mitéma mimasumani mbe: One aviga gôéwedéa me te Kumu ami Nzambé. Me tseenadô gomo. ?Môma angeenda me ndé?

⁷ Bangôani ane amapanga énigôa anye ôgi aNzambé gôénôtévéda nzéa. Tanganédani mônongoe ômadigaahngô ngu na vamawa ahngô. Gamabakahngô gétsumé ngudi yaNzambé paga, indaani tsingayi gô mônongoe waô.

⁸ Jésus‐Christ asakoga. Gamabakangô va mbeego, te gandé angô deo noo, na te gangaba angô gô mbene môbô na môbô.

⁹ Nômbiasingana na meekédu mawene mônongo masawanya na mane mapie kabaga nôbômédu na mangô nzéane éapie. Ene éamôsôba te mbe mitéma mianyô midiié ngudi gôésipa te gô ngeba yaNzambé, kaka gô mige miamôyakô. Ane agobeda migemie mine madeo asidiia sôma tsangô mbe agobeda mige.

¹⁰ Wa n’anyô tôndé na gévumbéô sogondoku ôsangoongôa éaa asi mbeego amadeekeda digondoku gô eba aAjuif agébandé.

¹¹ Môjuif ambeego, adeekedi adigondoku amatsua ôgondoku anzina yanyama na gô tsongo éadisambô ééndô mbe gédigaa saNzambé, te tsongone éava ngenge eba aNzambé. Amadeekeda Nzambé yangô mbe ébévee éamôma énganôtôu. Na yôtôye yanyama dimabéku gô kôbangô ambôka.

¹² T’ebandô amuene Jésus amawa gô kôbangô amôsenge. Te gôégôgéda oma gô ngudi yanzina yedi.

¹³ Tambô ôkani tôkedenga angô gô kôbangô amôsenge, gôésindéa ékeengie émakeengu angô.

¹⁴ Tsenge nedué, kaka gévôgiméô sasô n’anyô. Tôndé gôéenéa môsenge ag’ôba amôbô na môbô gôngavôgima wa n’anyô.

¹⁵ Jésus atôwedéa gôédeekeda kumane aNzambé ga ôgondoku va mbene edi. Tambô tôbubué miônya miasô gôékuméda Nzambé na gôéteta inedi gébé na tsoyi.

¹⁶ Nômbieeba gôéwedanéa na gôékabanéa anyene n’anyene éne éndé n’anye. Oô te mônongoe adigondoku ônyôngéô Nzambé.

¹⁷ Gobedani atômie wanyô. Sugédani anyene gôéditéda ahngô. Eyanzee yaô na pitsi n’omanda te gôékenea mitéma mianyô. Gô éne éyanzahngô anganigôa va mbene aNzambé. Gobedani angô. Vane ahnganigôa Nzambé gôndé anye na ékasôga, kaka na mitéma miditani. Okô anigôa na mitéma miditani, tambô n’anye nôngaba dôta na mitéma miditani.

¹⁸ Nômbiatsika évovo na Nzambé gôndé we tônônigôa mabégô mema. Wéene tôsabômu mbe tôsadigaa n’ebégô étsundédu we na mianga miamitéma miasô, mbe tôsakônza éangô. Na tônyôngéô mbe tôbaké te nane.

¹⁹ Me nanôdeekeda ébégô évôni édué gôéduka Nzambé éangô gôndé me. Te mbe Nzambé asinga me nayavôga énika na gôndé anye.

Osambô

²⁰ Tôkumédéni Nzambé Kumu agétabé ône amakundua Kumu asô n’anyô Jésus va gatse ane amawani. Gô ngudi yowedi, Jésus aka môkeneyi môvôni amandombo medi. Ene émavambédu môma na Nzambé gô nzina yedi te évambee amôbô na môbô.

²¹ Nanyôngéô mbe Nzambé, môétsi agétabé, anôétsa ngudi gôéénda mane mamisôba na gôéyanza mane manyôngéô amuene. Te mbe éné étômangô éenanô gô midigédi miasô n’anyô gô ndugi yaJésus‐Christ. Te mbe ôndômbee wetso ôbaké gôndé Jésus‐Christ, môbô na môbô. Amen.

Mabégô mamôyusumédu na kômbô

²² Ana aTétee n’ami agô mbumu éaNzambé, me môékédine, nanôongô mbe: Digaani na môvinéné gôéôkô mabégôme manôtendéa me gôénôkasogéda gô nzéa éaNzambé. Gésangô gegé gésatongo mbe nôngagogo étanga sangô.

²³ Nôngeena buedi gôéôkô mbe muana aTétee n’anyô, Timothée amakusédu gô eba atsôgôô. Okô ayavôgi étsiga na vandé me nangaviga n’edi na gôndé anye.

²⁴ Kômbôani gô inami atômie wanyô, n’asi mbumu éaNzambé muetso. Ana aTétee n’anyô gô tsenge éaItalie anôkômbôa.

²⁵ Te mbe mate maNzambé mabaké gôndé anye muetso.