Hébreux 12 - New Testament in Mitsogo

Nzambé te Tétee asô n’anyô

¹ Wa n’anyô tôndéké tôtandaméô na oma ayekani atôbononi. Tambô tôkinédi magumba metso maditéda wa n’anyô gôékea. Tôkina na mabégô metso mabévani matôdipô tsina na tsina kabaga tôkea. Tôtômbé makôdôme gôékea na môkasa, gôédiia gô nzéane ématôtévuni.

² Tôboneni misome masô n’anyô na nzôô na gôndé Jésus. Bandôa v’ebandô ngu na v’ekôdéô, mitéma miasô n’anyô mindéké te gôndé angô gébé na buétsé. Jésus amasinga mbe oma abôkédé angô va gésumu sowa na amawa te vangô. Owa ava gésumu sowa, te ôwa atsoyi. Tambô Jésus asitanganédé tsoyi nene, ivô amaténdéda gô gényôngage gémakeneo gôndé angô va mbene owa. Deo noo andé digaa g’ôba gô géeyo gémôgôô sagédigaa saNzambé sokumaka.

³ Gôndé anye, nômbiadôdigaa gô tsina amaguga, n’anye nôgôgini, nômabiadigaadô nane. Ivô kôngédani Jésus gamasipangô gô gékuanô gévôni gémakuanô angô n’oma abévani.

⁴ Gôébégô anye, gô ébadi égenyanye na mane mabévani, madeo nôsiyôhu na mangô gamayôhu angô.

⁵ ?Mabégô mamavovo Nzambé gôétôkasôgéda, anye nômeeba mangô‐a? Ogi aNzambé gôndé wa n’anyô anedi te mbe: Muanami, gésisédéô géétsiô éwe na Kumu, kaka sayeese. Ombiena tsoyi vasembu éwe na Kumu,

⁶ Okô Kumu asiséda éwe, menya mbe agônyôngéô. Okô agôbômôa, menya mbe agômemi mbe: Oô te muanami.

⁷ Bibédani magugame meenanye gabibéda môma gésisédéô satétedi. Endé te nane. Magugame mane matôtubéda mbe gôndé Nzambé, wa n’anyô tôsaba agenda, tôndé anedi na tôéekédu n’edi. ?Va mbumu oma gôndéké muana asangasisédu na tétedi‐a? Aé, gôsaba.

⁸ Okô éwe ôsasisédu na Nzambé gasisédu anee muetso, tambô éwe kaka muana apie, éwe ôsaba na Tétee.

⁹ Tasani geenda tétee yasô n’anyô yava tsina. Atôsiséda na tôgobeda ahngô. Géé ti na Tétene éasô éag’ôba, buedi mbe tôasugédéni gôémôgobeda na tôngadônga.

¹⁰ Tétee yasô n’anyô yava tsina atôsiséda gô éne étasa ahngô gôétôékéda gô pesu éandéô étôdigaa va tsina. Ivô Nzambé atôsiséda gôétônyepeda gômbe tôngaba n’etsimama évo n’edi éngadigaa wa n’anyô n’edi.

¹¹ Gô ndéô ésisédu môma, adéa na pievia éagésisédéô sedi gémenye mbe te ébégô éamôsôba. Tambô va mbene, ône amoongu ndongi gô gésisédéô gémeetsô angô, angadiia mamisôba te gô môdigédie wedi agétabé.

Ndongi na géevédéô

¹² Tômbani mogome manyô magôgini. Pupédani mabongome manyô magenyini.

¹³ Oombakani ékea gô nzéaye dindé na deedéké gômbe makôdôme manyô meekonzo masangakobo, ivô mbe mangadôngédu.

¹⁴ Gényôngani gôédigaa na gétabé n’oma muetso na gôéba na môdigédi ônyôngéô Nzambé. Okô nôsidigaa ganyôngéô Nzambé, akanyô mbe asangeena Kumu Jésus gô mônongoe wanyô.

¹⁵ Wemani anyene n’anyene mbe gôsaba môma anika ngima gôénôtôga gô mate maNzambé. Wemani kabaga va gatse anyô gôba môma agono na mabunza mandôé makandani na mabévéda oma ayekani na môyobo. Pigaga gô môtéma amôma te môyobo.

¹⁶ Wemani kabaga gôdenganô va gatse anyô môsi gésasô. Wemani kabaga gôdenganô môma agono na Esaü asiditédé ôvangee aNzambé. Amakaba ôpayie wedi gô gépede samôyakô gakabô sôma sabobo.

¹⁷ Va mbenene vane Esaü amaduka tétedi mate, ivô asimeetsô. Esaü asibédô na ngudi gôénikéa ényepeda éne émabévangô vamakabangô ôpayie wedi, buéyé gamabutangô ôpayi gône adéa.

¹⁸ Anye asi pitsi yedi nôsaba gamabaka akanyô oma aIsraël. Ahmawesea na gô môkôdi ôtetu mbe Sinaï, ômeenanô na miso na ômabandô na mogo. Gô môkôdie ône gômakusa mungu asoto, na gômakusa évitsi éabangata na gékunga.

¹⁹ Gômookanô na nzongodi éagémbômba na ôgi ômavovoni. Ogie ône ômadaga. Gô gomo ômookô oma aIsraël amagondo mbe: Kookoyewe ôgie ône, ôsoombadô évovo.

²⁰ Ebégôe émadagéô ahngô te gômatôma ôgie mbe: Ti ône abanda môkôdie ôdôô, béyé mbe môma, béyé mbe nyama, angatuma na mataé gôéyôhu.

²¹ Gômadaga gétsutsukuge géne, Moïse amavovo mbe: Me natatéa na gomo.

²² Géé anye nôndé nômawesea na gô môkôdie ôtetu mbe Zion. Na nômawesea na gô môsenge aNzambé Kumu amonyo, te Jérusalem ag’ôba. Gône gôndéké mitônisa na mitônisa miasi g’ôba avigédu na Nzambé gôétsôkéa anye.

²³ Anye nômamana éengéa na gényônga gô mbumu éana akuua aNzambé. Mina maô meetso mamamana étendu gô môsenge ag’ôba. Anye nôndé nômawesea na gôndé Nzambé, môtsundédine oma muetso, na môtsundédine edidie éoma amatsimamédu gébé n’oési va mbeego.

²⁴ Nômawesea dôta na gôndé Jésus, angô môsungéyine evamba éamôbaé. Nômawesea gô nzina yedi dimaagani. Yangô dindé na nyene tsangô, kaka éne ébévani émabaka na nzinaye yAbel.

²⁵ Bakani n’ekena gôégobeda ône avovo n’anye. Oma aIsraël amakina ôgie ône ava tsina ômeevéda ahngô éne émavovo Nzambé. N’ahngô asiôngôé ébusuga tsôgôône émeetsô ahngô. Eembe ti n’one atôôkô avovo ôgi ag’ôba. Okô tômôgéngôgéyi magotome masô n’anyô ?tôngabusuga ôpisedi nayee?

²⁶ Gôndé oma aIsraël ôgi aNzambé ômatatéda totone, géé gôndé wa n’anyô amatôvangéa mbe: Nangoomba étatéda nyene kuka, kaka tsina étévo, ivô te tsinane n’obee.

²⁷ Vavovo angô mbe: Nangoomba nyene kuka, tômenya mbe mane mamakanôni metso mangatatédu na mangadimbana, na éne éngasanéani te éne éngasipani.

²⁸ Tôkumédéni Nzambé na yôgiye yasô n’anyô gôébégô wa n’anyô tôngeengéa g’ôkumu amôbô na môbô. Na tôkumédéni Nzambé na gésoo sasô n’anyô gôéyanza éne ényôngéô angô gôémôgobeda na gomo.

²⁹ Menyani mbe Nzambé éasô te soto géyôédani.