Hébreux 11 - New Testament in Mitsogo

Gôéétsa môtémee wetso gébé na paga

¹ Gôéétsa môtéma wetso gébé na paga ékegea mbe ôkina buétsé gô éne éténdéda éwe. Gôéétsa môtéma wetso gébé na paga ékegea mbe ôdigaa ti eembe ômani éena éne éténdédewe, buéyé mbe éwe madeo ôsiena éangô.

² Va mbeego omee amaséngu na Nzambé ôséngu, te ane amamôétsa mitéma miaô mietso gémôtsumé paga.

³ Wa n’anyô gôétsa Nzambé mitémamie gébé na paga vanigôgéô we mbe Nzambé amakana tsina n’oba te na ôgi ôtévo. Ene éenanôni émakanô gô ngudi yene éseenanôni.

⁴ Abel ameetsa Nzambé môtémee wetso gétsumé mitôma miedi paga na amadeekeda Nzambé ôgondoku ômootéa ényepa n’one aCaïn. Gôsibé Abel na paga, Nzambé amabono angô ti eembe asibé na ébéva. Na amasinga ôgondoku aAbel. Gô éné émayanza Abel na môtémedi wetso gôndé Nzambé atôongô ndongi deo noo buéyé mbe amamana éwa.

⁵ Hénoch ameetsa Nzambé môtémedi wetso gétsumé ôgi edi paga na angô asiwé ivô amatsuaô na gôndé Nzambé. Otô aHénoch ôsidenganô gôébégô Nzambé amabongo angô na gôndé amuene. Matendeo MaNzambé matônigôa mbe Hénoch madeo asitômbu na g’ôba amatubéda Nzambé gényônga.

⁶ Tambô gôsaba môma oongôa étubéda Nzambé gényônga ôkô angô andé na paga. Endé te nane. One awesea na gôndé Nzambé te ône eetsa môtémee wetso gébé na paga mbe Nzambé andéké, na mbe Nzambé amenya étsutsuga gôndé ane amôbutani.

⁷ Noé ameetsa Nzambé môtémedi wetso na asitsumé meevédéô maNzambé paga. Buéyé mbe gamabakangô madeo asiena éne émavovo Nzambé mbe éngabuéa, Noé amasaa mbôngône. Angô na gévia sedi amoobou. Gôsibé Noé na paga, mitayimie mimeetsô angô na Nzambé mimeeséda oma muetso. Gôsitsumé angô Nzambé paga, Noé ameetsô n’edi ôséngu.

⁸ Abraham ameetsa Nzambé môtémedi wetso na asitsumé môtôma aNzambé paga. Amamôgobeda gôékea na gô nyene tsenge éméétsô angô na Nzambé ga mikuanya. Abraham amatôta go tsenge éedi gémenye gô tsengene ékeangô.

⁹ Amadigaa ga môgenda gô tsengene émavangéô angô na Nzambé, ivô amaténdéda ôgi aNzambé gébé na paga. Angô amadigaa na Isaac na Jacob gô yeba yebandé. Ahngô muetso amaténdéda ôvangee aNzambé.

¹⁰ Abraham amaténdéda gôéengéa gô môsenge ôvôni ômasaaô g’ôbôga amôsôba. Amuene Nzambé amatasa gamanyôngéô angô môsenge ône. Na môsééne te amuene Nzambé.

¹¹ Sara asitsumé ôvangee aNzambé paga mbe angadiia ngudi gôébôta muana buéyé gamadômbéa ôtôe wedi. Na ameetsa môtémedi wetso mbe éngaba te gamavovo Nzambé.

¹² Tasani gôndé mômôgôô nône Abraham. Otôe wedi ômabaka ti ga nzumbi gôébôta muana, na angô te tétee apingô yaana. Anedi ayeka ga minanga miag’ôba, na ayeka ga misige miagô mubu, gétangégé.

¹³ Omeaa muetso ameetsa Nzambé mitéma miaô gébé na paga na amawa gédiié éne ématéndédahngô. Gô môténdéda ahmeena gôdagôda éne émeenéa ahngô na ahmatsôkéa. Ahmanigôa mbe: We tôndé agenda na akeyi amôtôô gô tsenge nedué.

¹⁴ Vamavovo ahngô nane, miso maô mamabono nyene tsenge, te éne éapie.

¹⁵ Ahngô mbe ahmanyimaka tsengene ématôta ahngô, mbe amanika na wangô.

¹⁶ Ahsinyimé tsengene ématôtahngô. Ahmanyima te tsengene éôtéa ényepani, te éne éag’ôba. T’ebandô Nzambé amanyôngéô étetu mbe Nzambé aô, na amakônzéa omeaa môsenge ôvôni.

¹⁷ Gômeetsa Abraham môtémedi wetso na gôndé Nzambé gétsumé mitôma miedi paga amamôgobeda gôédeekeda muanedi Isaac ôgondoku vamakanégu angô na Nzambé. Muanee ône te muanee ovanga aNzambé n’Abraham. Eébéyée nane, Abraham asikékôé ôgi aNzambé gôéyôha muanedi ékika gôémôdeekeda ôgondoku.

¹⁸ Nzambé amapanga évangana n’edi mbe: Gô ngudi yamuanee woo Isaac, ôngabôta ana ayekani.

¹⁹ Abraham asitsumé ngudi yaNzambé paga mbe: Nzambé angakundua muanami g’ôwa. Na Abraham amoomba édiia Isaac ti eembe akundugi g’ôwa.

²⁰ Isaac ameetsa môtémedi wetso na asitsumé Nzambé paga gô éne émavovo angô mbe, éngabuéa. Na ameetsa anedi Jacob na Esaü mate gô mane mangeena ahngô gô mbene.

²¹ Jacob ameetsa Nzambé môtémedi wetso gébé na paga. Amakuméda Nzambé na ameetsa mate gôndé anamôgôô amuanedi Joseph. Te vamabaka Jacob aka gôéwa na amasipa gô môtungee wedi.

²² Joseph ameetsa Nzambé môtémedi wetso na asitsumé ôgi na ngudi yaNzambé paga gôékusédahngô g’ôvéga ômadigahngô gô Egypte. G’ôpayi edi amatsikéa anedi ôgi mbe: Vangakusanye g’ôvéga nôkea n’epee éotô ami. Nombiatsika éangô gô tsengene.

²³ Yeene na tétene aMoïse asitsumé ngudi yaNzambé paga na amamôétsa mitéma miaô mietso, vamasuégahngô muanaô avembo ngonde ditatô. Vameenahngô gamanyepa muanee waô asiôkô môtômi atsenge gomo gôémôgobeda.

²⁴ Na Moïse te mônongovo. Vamoongôgangô asitsumé ôgi aNzambé paga, na amamôétsa môtémedi wetso. Te gamakinangô gôétetu mbe, muana aPharaon.

²⁵ Moïse amasevoa nzéane éagékuanô émakea asi mbumu éaNzambé. Amakina nzéa éamabégô mabévani matsengene na gényônga sedi sagébéndéké.

²⁶ Moïse amamenya mbe gôésipa gô gékuanô sainee éaChrist, te éne éndé na tsoongo. Géé gôédigaa n’okitie wetso atsengene éaEgypte, éne ésibé na tsoongo. Gôébégô Moïse amaténdéda na amabono miso medi te gô môsenda agô mbene éanzéa.

²⁷ Moïse ameetsa Nzambé môtémedi wetso na asitsumé ngudi yedi paga gôénôtôga gô Egypte. G’ôpisa amôtômine atsenge asiene gomo. Amasipa ti eembe ameena Nzambé, ône aseenanôni, na miso medi na kiaa.

²⁸ Moïse asitsumé môtôma aNzambé paga gôébandôa Paquene éamapanga. Amatôma omedi gôésôga nzina gô diômbaye yaô gôémenyeda môsi g’ôba andé n’otômu owa mbe: oota gô yeba yaô te ootaga, géengéé gô yangô gôéyôha anee akuua aIsraël.

²⁹ Oma aIsraël ameetsa Nzambé mitéma miaô gébé na paga. Na ahmaabôga mubue ôéndô mbe Rouge, ga môma ayeta gô tsenye abobo, gémenye mbe gômabaka meba. Géé asi Egypte, ahmaanda ahngô gô ngima asiôngôé éabôga, ahmatôndôméa

³⁰ Oma aIsraël ameetsa Nzambé mitémamie gébé na paga na amaseta môsenge aJéricho pitsi tsambué. Gôsibé ahngô na buétsé, migômbamie mivôni miamôsenge aJéricho mimapanzéga.

³¹ Rahab môgeto agésasô te mônongovo. Ameetsa Nzambé môtémee na asitsumé ngudi yedi paga. Amawedéa na môtéma ômasumani amôgôôe asi Israël amaseta môsenge ndodi. Na Rahab asiwa gamawa akedi muetso ahmakékôa ôgi aNzambé.

³² ?Nanganônigôadô ndé? Gôsaba ndéô gôénigôa anye mane maGédéon, na Barak, na Samson, na Jephté, na David na Samuel, na mane mapandôédi amatasa maNzambé.

³³ Gômeetsahngô Nzambé mitéma miaô na gositsumé ahngô ngudi na ôgi aNzambé paga amadiia tsengeye dimagenya n’ahngô. Amayanza mane mamanyôngéô Nzambé, na ameetsô éne émavanga Nzambé n’ahngô. Ahngô amakukéga miônya miembungu.

³⁴ Na ahmeeméda éoto évôni. Na ahmakumba gôéyôhu n’ebaga. Ahmabaka oma adipôpéa na amakoa aka oma angudi. Gôégenya ébadi gôsibé miene migode gandé ahngô na ahmadiia na adudeoe waô ahmagenya n’ahngô.

³⁵ Gômabaka ageto ameetsa Nzambé mitéma miaô mietso gétsumé ngudi yedi paga. N’ahngô ameena omee waô ahkunduga g’ôwa gôénikéa édigaa n’ahngô. Oma ayekani amayôhu gômavambangô môtémovo na Nzambé. Adudeoe waô amatséva n’ahngô gatséva nzotsi na tanga, ivô oma aNzambé asinzeegede ina aNzambé buta mbe akusédu gô panda. Amasinga gôéyôhu mbe akea na gô wene monyo amôsôba.

³⁶ Avo dôta amadetu, n’avo amabitô na mibitô. Avo amakatô ésengo na ameengedu gô yeba yatsôgôô.

³⁷ Oma aNzambé avo amatumu na mataé gôéyôhu. Avo amawa gômakitsô ahngô ébéndéké na éwasô. Amakangégu. N’avo amayôhu n’ebaga. Amakea asasangana sagôsagô, ahngô gébé na maduani ahmaata égôbôkô éamandombo na kangé. Gô éne éatsengene ahmabaka misuga na amakuanô na ahmatubédu maguga.

³⁸ Gô ébévee éasi tsengene ahsibé kuanakue gôédigaa n’oma aNzambé ahngô oma amisôba. Oma aNzambé amakea asasangana gô tsenge émagasani na gô tsenge éamikôdi. Yeba yaô te didima na midungutu.

³⁹ Omeaa muetso amaséngu na Nzambé ôséngu gôébégô amamôétsa mitémamie gébé na paga. Asitsiké éténdéda buéyé gasiene ahngô éne émavangéô angô na Nzambé.

⁴⁰ Emabaka te nane gôébégô Nzambé amabaka na yene étasa éôtéa ényepani. Te mbe omeaa, ane amapanga émôétsa mitémamie, eenéa wa n’anyô mbe tôngadiia muetso kukepo.