Gétsutsuéô 9 - New Testament in Mitsogo

¹ Môsi g’ôba ône amôtayi amatoongo gémbômbage. Me Jean, nameena mônanga ômaagaka g’ôba na gô tsina. Mônangee ône ômeetsô môsapi eeduku éamongodi ésaba n’ekôdéô.

² Mônangee ômakukua édukue éamongodi. Gômakusa nzôngé amôtutu ga soto gévôni. Môtutue ône ômakukéga kômbéne na tsengene n’evitsi.

³ Gô môtutue gômakusa miveege mimapangana gô tsinane nyetso mimeetsô miangagaa ga miangôtô.

⁴ Mimadékédu mbe: Nômbiabata ésinga na éétété. Na éetso ékandani, nômbiambata. Na mimatômu mbe: Nômbata te oma atévo, ane asiitsô ndémbo étubéda ina aNzambé.

⁵ Na misiitsô ôtômu mbe: Nôyôha oma. Ivô mimeetsô ôtômu mbe: Mbatakani omeaa kuka yetso gôétubéda ahngô panda gô ngonde ditayi. Pievia dimookô ane amambatôkôni te ga dine diôkô môma ambatô na ngôtô.

⁶ Gô gédingéôge géne sangonde ditayi, omee angabuta ôwa, ivô asangawa. Ahnganyôngéô éwa ti wakaga. Ivô ôwee ôsangaba gôpégôpé n’ahngô.

⁷ Miveegemie mine mimagono na nyamaye ditsua oma na gô ébadi diéndô mbe cheval. Gô miôtsémie miaô te ga épôkôdô éokumaka émakônzu na dodo. Diôsôye yaô te ga dine yoma.

⁸ Tsôgéye yaô te ga dine yaageto. Na minôme maô te ga mane magémbungu.

⁹ Gô mbômaye yaô ahmaata ngoyi dindé ga mianga. Papaye yaô dimaba na nzongodi ga dôtô diyekani didutuku na nyamaye dikea gôégenya ébadi.

¹⁰ Ahmabaka na mikôndô mindé ga miangôtô na tsuétsué. Na mikôndômie miaô ahmatubéda oma panda gô ngonde ditayi.

¹¹ Môtômine waô te môsi éduku éamongodi. Inedi g’ôgi aHébreu te Abaddon. Na g’ôgi aGrec te Apollyon.

¹² Ene te égugee éamapanga éoti. Va ngongone vane mavo maguga mabaé mangabuéa.

¹³ Na vane môsi g’ôba ône amôtôba amavigédu na Nzambé gôétoongo gémbômbage. Me Jean namookô ôgie ômakusa gô mapandaka magévumbéô sadigondoku ômakônzu na dodo na gémabaka va mbene aNzambé.

¹⁴ Ogie ône ômatôma môsi g’ôba amôtôba amasumbéda gémbômbage mbe: Nzeegedaka asi g’ôba anayi andé katôgô na pangaye gô kôbangô ambéne épôni ééndô mbe Euphrate.

¹⁵ Asi g’ôba anayi ane amanzeegedu. Angô amakatô na amakeneo ti gô ébégôe éne mbe anganzeegedu gô ndéô nene, na gô pitsi nene, na gô ngonde nene, na gô gémage géne gômbe angayôhéda ôkabô oma agô tsina. Gôndé oma atatô dingayôha te môvo.

¹⁶ Me Jean namatubédu migodemie mimabaka digaa gô chevale yaô. Otangôe waô te mikama miamitônisa na mitônisa miagétangégegé.

¹⁷ Evo ébégô émeena me Jean te nandé nani gébé gô vio. Namatubédu na Nzambé ébégô éanyamaye n’omee ahmadigaa gô yangô. Ahmaata ngoyiye yamianga. Dipo dimabaka na tsoo ga soto, dipo na bôbé ga étaé ééndô mbe saphir, na dipo dôta ga ôtsakadi gandé sôma gééndô mbe soufre. Miôtsé miachevaleye mimagono na miôtsé miembungu. Gô miônya miaô gômakusa soto, na môtutu agémbôngambônga gébévani génôtôa môma modi.

¹⁸ Okabô oma muetso ava tsina amayôhu na panda yevungee étatô émakusa gô miônya miachevale, te soto na môtutu na mbônga.

¹⁹ Gôébégô ngudi yanyamaye dine dindéké gô miônya miaô na gô mikôndômie miaô. Mikôndômie miaô migono na nyogo. Mindé na miôtsé, na oma abévédu na miangô.

²⁰ Omee muetso amasanéaka va tsina ahsiyôuku na panda yevungee étatô éne, asiviié ngima mane mamayanzahngô anguene. Ahsitsiké éneegeda édidie ébévani na mbumba yegoni dimapakôni na dimakônzuni na dodo na muahnga osunu ôvôni na étaé na kunga, na péndé.

²¹ Eômee éne éseenani, na ésookôni na ésakeani. Omeaa dôta asaviia mikôbé miaô ngima. Na maganga mesôgee yaô na ésasô éaô n’eesuee waô aseeviia ngima.