Gétsutsuéô 8 - New Testament in Mitsogo

Môkatékôe atsambué

¹ Vamapaba Môpaga Endombo môkatékôe atsambué, asi g’ôba muetso ahmadigaa na pôkepôke ahmadingaka édigaa gévove na gépupé te geenda asi kôdane mbe gébéndéké seweda.

² Na vane, nameena asi g’ôba tsambué te ayanzie aNzambé andé mitie va mbene edi. Ameetsô émbômba tsambué.

³ Muene môsi g’ôba môvo amatema vapévapé na gévumbéô sadigondoku. Amasumbéda gébunguge gémakônzu na dodo te gétumbéô sambônga amôsôba. Ameetsô éôma éyekani éambônga amôsôba mbe angô angadeekeda éangô na gôndé Nzambé kukepo na disambô yasi mbumu éaNzambé. Amavumba yetso gô gévumbéô sadigondoku gémakônzu na dodo na géndéké va mbene agédigaa sokumaka.

⁴ Sôma sambônga amôsôba gémayôa. Môtute wedi ômabutima bandôa g’ôgogo amôsi g’ôba na ômabata te na disambô yasi mbumu éaNzambé.

⁵ Vane, môsi g’ôba amayuéséda gébunguge géne na soto gémaviga gô gévumbéô sadigondoku. Na amagégunya na va tsinane. Gômakungaka môdumu na nzongodi épôni. Gômakadima na mikadikadi. Tsinane ématatéa.

Embômbee

⁶ Asi g’ôba tsambué amavigédu na Nzambé amasumbéda émbômbee tsambué na amabandôa étômba éangô mbe étoongo.

⁷ One amapanga amatoongo gémbômba. Gômaaga na gô tsina mataa na soto gémagésu na nzina. Eetso émagunyu na gô tsinane nyetso. Totone émakabô étaté étatô, na gévo saté gémayôa. Na éétété émakabô dikabô ditatô, na ôvo ôkabô ômayôa. Na ésingee éetso émadôngani émayôa na soto.

⁸ Vane môsi g’ôba ône amôbaé amatoongo gémbômbage. Sôma géndé ga môkôdi ôvôni ôyôani gémagunyéga nava ngenge amubu. Gô éaté étatô, saté gévo samubu gémakoga géka nzina.

⁹ Na vikabô vianyamaye yetso yagô mubu dimawa. Na ôkabô ambôngôye yetso dimabôéga na dimatôndôméa.

¹⁰ Vane môsi g’ôba ône amôtatô amatoongo gémbômbage. Mônanga ôvôni ômayôa ga soto, ômaaga g’ôba. Omaaga na g’ôkabô ambéye na gô étôkee.

¹¹ (Ina amônangee ône g’ôgi aGrec te Absinthe, g’ôgi aSuada te Amertume, g’ôgi aGétsogo te Ndôé.) Okabôé ône amebame ômakoga ôka ndôé. Oma ayekani amawa gômanyua ahngô mebame mane mandôé.

¹² Na môsi g’ôba ône amônayi amatoongo gémbômbage. Saté sakômbéne gémapikô na ôkabô aminanga ômapikô na saté sangonde gémapikô, na vane gévedege saô gémabandôa ééma. Gô gébéndéké samôsaa gôsibé ômanda. Na gô gébéndéké sapitsi te évitsi étévo.

¹³ Me namoomba ébono. Nameena mbééa émapepa gô ngongo. Emaadôngana mbe: Maguga. Maguga. Maguga mangeena asi gô tsinane nyetso vangatoongo asi g’ôba atatô émbômbee étatô ésanéani.