Gétsutsuéô 5 - New Testament in Mitsogo

Migandamie na Môpaga Endombo

¹ Me Jean nameena ône andé digaa gô gédigaa sokumaka asumbéda miganda mimavutégu môvutégu g’ôgogo edi ômôgôô. Gô miangô mimatendu gô gatse na va ngongo. Môvutégue ône ômakatôkô mikatékô tsambué.

² Nameena dôta môsi g’ôba avigédu na Nzambé. Na ngudi yedi dipôni amaadôngana mbe: ?One andé kuanakue gôékatôa mikatékô miemi na gôépunzua miganda miemi indaa?

³ Ivô gôsibé môma akuanakue gôémipunzua na gôémibono va gatse. Béyé mbe môsi g’ôba, buéyé mbe môsi gô tsina, béyé mbe môsi gô tsengene éane amawani, gôsibé môma ta na môvo.

⁴ Namadéa gégeto gôébégô gôsibé môma akuanakue gôépunzua môvutégue amiganda na gôémibono va gatse.

⁵ Na vane, môvo va gatse apeeye amavovo n’ami mbe: Ombiadéa. Bonoko. One eendô mbe Gémbungu seongo éaJuda, Muana aMotômine David, angô amadiia gô ébadie émagényuni, te angô angoongôa ékatôa mikatékômie tsambué na épunzua môvutégue amiganda.

⁶ Nameena Môpaga Endombo ôndé môtie va mbene agédigaa sokumaka. Na ômasetu na éôma énayi évégumani na peeye. Môpagee ône ômabaka eembe ômayôhuni. Omabaka na tséba tsambué na miso tsambué te édidi tsambué éaNzambé émakudégu ne gô tsenge yetso yagô tsina.

⁷ Môpagee ômawesea gôébongo migandamie mimabaka g’ôgogo ômôgôô one andé digaa gô gédigaa sokumaka.

⁸ Eôma énayi évégumani na nzima dibaé yapayi na payi dinayi muetso ahmasiba mabongo maô va mbene aMôpagee vamabongo angô migandamie. Ahngô muetso amabaka na ngombi yaô. Amabaka na ébungu éaô étumbu sôma sambônga éamôsôba te disambô yasi mbumu éaNzambé.

⁹ Ahmatôa émbô éamanza mbe: Ii, te éwe, gôndé éwe te kuanakue gôébongo migandamie na gôépunzua mikatékômie. Gôébégô éwe te ômayôhuni. Na g’ôwee woo ômavanéa Nzambé gôndé omedi. Gôndé omeaa amasevou gô mongo metso na gô yôgi yetso na gôndé oma muetso atsenge yetso yagô tsina.

¹⁰ Omakoa ahngô aka ti asungéyi oma va mbene aNzambé gôéyanzéa Nzambé asô. Te angô angatômaka gô tsina.

¹¹ Me Jean namoomba ébono. Namookô te asi g’ôba ayanzi aNzambé ayekani atôa émbô. Amabaka nzima yamitônisa na mitônisa miagétangégégé. Amaseta gédigaage sokumaka na yôma évégumani na peeye.

¹² Amatôa na gényônga gémootéani mbe: Môpanga Endombo ômayôhuni Te angô ôndé kuanakue gôéétsô ôtômue wetso, Na ôkitie wetso, na éodoe éetso, na ngudiye yetso, Na ôkumakee wetso, na ôndômbee wetso, na géneegage setso.

¹³ Namoomba éôkô yene émbô. Namookô éetso évégumani éag’ôba, na éagô tsina, na éagô gatse atsina na éagô tsina ambéyi, ti éetso émavangangô gô tsinane nyetso ématôa émbô mbe: Gôndé ône andé digaa gô gédigaa sokumaka Na gôndé Môpagee, Te mbe géneegage setso, n’okumakee wetso, Na ôtômue wetso ôbaké gôndé ahngô môbô na môbô.

¹⁴ Eôma énayi évégumani émaabéa mbe: Amen. Na peeye ahmasiba mabongome gôémôneegeda.