Gétsutsuéô 3 - New Testament in Mitsogo

Ndongi gôndé asi mbumu éaNzambé gô Sardes

¹ Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékenea asi mbumu éedi gô mbôkane ééndô mbe Sardes. Oôkéôni ndongiye divovo Kumu éedidi tsambué éaNzambé. Te ône asimbéda minanga tsambué. Angô mbe: Metso mane meendanye, me tsabômu mangô. Namookô tsangô mbe anye nôdônga gô mabégô maNzambé, tambô nôka ti gôpégôpé n’owa.

² Gô vipesu viamonyo visanéa n’anye gôéwa, sipédani viangô kabaga nôsuméa mangôga. Timôgani. Me neena mbe mane meendanye masaba kuanakue va mbene aNzambé.

³ Bangôani meekédume mamadiianye. Kôngédani gamookô anye mangô. Indakani mane mamookô anye. Eesédani anyene mitéma mianyô gôéviia ngima ébévee éanyô gôénika na gôndé me. Okô nôsitimôga nangaviga na gôndé anye na bambasa gaviga muisui. N’anye nôsangamenya ndéône éngaviga me.

⁴ Eébéyée nane, avo asi mbumu éaNzambé gô Sardes, nôsasinga maduani manyô mapéku n’evindô. Te anye nôngakénga n’ami nômaata mikanda miavembo, nôndé ngu kuanakue.

⁵ Te anye nômadiia gô ébadi égenyuni nôngaatédu mikanda miavembo. Mina manyô masangabusuu gô môganda amonyo. Me nanganigôa na gényônga va mbene aTéta Nzambé n’ayanzi edi asi g’ôba muetso mbe: Adua te omami.

⁶ Okô mbe anye nôndé na matô, ôôkôni môma na môma mane mavovo Gédidi SaNzambé na anye asi mbumu éaNzambé.

Ndongi gôndé asi mbumu éaNzambé gô Philadelphie

⁷ Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékenea asi mbumu éedi gô mbôkane ééndô mbe Philadelphie. Oôkéôni ndongiye divovo ône andé Amatsimamani, te angô Kumu amabégô metso mapie. Na angô te asumbéda môsapie aDavid môtômi atsenge. Angô Amatsimamani akukua na gôsaba môma angôôkukégani. Angô abandéka na gôsaba môma angôôkukégani.

⁸ Angô mbe: Me tsabômu metso mane meendanye. Me tsabômu mbe anye nôsaba na ngudi éébéyée nane nôgobeda ôgie wami na nôsitsiké nzéane éami. Me nanôkukéa ômbaa ôsangoongôa ékukéga môma.

⁹ Oôkôni éne éngeenda me ane andé aneegedi aSatan. Ahngô apatie eenda mbe: We te Ajuif, tambô kaka Ajuif. Nangatsôpa ahngô nakudéga ahngô gôésiba mabongome va mbene anyô gôénôneegeda. Ahkinéyee. Gô éne ahngeena gootéa me ényôngéô anye.

¹⁰ Anye nôsikiné môtômee wami gôéenea me na môvinéné. Na me dôta nanganôkenea gô ndéô éagékuanô gévôni géngeenanô gô tsina gôékanéga asi tsengeye yetso yava tsina.

¹¹ Me tsangaamba éviga. Simbédakani vipesuvie viangudi vindé n’anyô, kabaga nôwatô n’oma môsendee wanyô ôngadiianye gô ébadie égenyuni.

¹² Gôndé ône adiiani gô ébadie angaba éengô ésipa ebee wetso aNzambé éami, n’angô asangakusa wangô. Nangatenda g’ôtô edi ina aNzambé éasô n’edi na ina amôsenge aNzambé. Môsenge ône te nyene Jérusalem atsatsee ôndé va kôbangô amuene Nzambé na ôngasuma g’ôba. Nangatenda g’ôtô edi dôta inami éatsatsee éndé n’ami.

¹³ Okô mbe anye nôndé na matô, ôôkôni môma na môma mane mavovo Gédidi SaNzambé na anye asi mbumu éaNzambé.

Ndongi gôndé asi mbumu éaNzambé gô Laodicée

¹⁴ Ogi ômatôma me Jean mbe: Tendéa ndongi yedi na gondé môsi g’ôba avigédu na Nzambé gôékenea asi mbumu éedi gô mbôkane ééndô mbe Laodicée. Oôkéôni ndongiye divovo ône angayusuméda mbe: Amen. Angô mbangi éamavôma ésapatakani. Te angô mapangame mametso mamavanga Nzambé.

¹⁵ Angô mbe: Me tsabômu metso mameendanye. Va gatse ami nookô anye mbe nôsaba na sodi, nôsaba n’epiô. Me nanyôngéô mbe oma abaké gô épiô, kôndi nane abaké gô sodi.

¹⁶ Ivô ti gandé anye na pioo, gébé na sodi gébé na epiô, nangôga anye gô mônyami te ôgaga.

¹⁷ Anye nôvovo mbe: We tôndéké ékiti na tôka mindômba. We tôsabuta sôma. Tambô, nôsamenya mbe anye te oma abobo na amaguga. Nôsaba na tsoongo. Nôndé ti misuga na minyenge na asi pogu.

¹⁸ T’ebandô nanôbeenda mbe: Nandé na dodo dimakanzô gô soto gôénôtôa totone nyetso. Sômbakani yangô gôndé me, n’anye nôngaba ékiti. Sômbakani dôta na maduani mavembo nôaata mangô gôésomeda yôtô yanyô kabaga nôba na tsoyi éaminyenge. Sômbani na mbôga gôésôga gô miso manyô mapogu mbe mangô mangapoga.

¹⁹ Nanôsiséda na nanôtsimaméda te gônyôngéô me anye. Buta mbe géviôviô sanyô géenanô, eesédani anyene gôéviia ngima ébévee éanyô na nikani na gôndé me.

²⁰ Oôkôni édué. Me nandé môtie v’ombaa nabôkéda. Okô môma ookiô ôgie wami akukuéa me, me neengéa gôndé angô. Wa n’edi tôngaa vavo.

²¹ Gôndé ane adiia gô ébadi égenyuni, nangeetsa ényanga mbe ahdigaa n’ami gô gédigaa sami sokumaka. Mônongovo gamadiia me gô ébadi na me nadigaa vavo na Téta Nzambé gô gédigaa sedi sokumaka.

²² Okô mbe anye nôndé na matô, ôôkôni môma na môma mane mavovo Gédidi SaNzambé na anye asi mbumu éaNzambé.