Gétsutsuéô 20 - New Testament in Mitsogo

Ebégô éamôtônisa amipuma

¹ Me Jean nameena môsi g’ôba amavigédu na Nzambé na gô tsina. Amasumbéda g’ôgogo edi môsapi eduku éamongodi na amasumbéda dôta pangane épôni.

² Môsi g’ôba amatsôpa Gényogonyogoge géne gémabaka bandôa v’ebandô, sangô te ône eendô mbe yabédé na Satan. Angô amakatô na pangane gôédigaa na yangô môtônisa amipuma.

³ Môsi g’ôba amamôkuya gô éduku éamôngodi. Amabandéka édukue na môsapi gômbe kabaga Gényogonyogo géomba ébôméda asi tsengeye yetso ngu na vangoota môtônisa amipuma. Vangoota miangô angakusédu gô vipedu viandéô.

⁴ Nameena édigaa éokumaka. Ane amadigaa gô éangô ameetsô ôtômu gôétsundéda. Me nameena dôta édidi éane amayôhu gô gékuanô gôébégô amatsua Mabégô Mapie mamatsutsua Jésus na ameekéda Mane Mamavovo Nzambé. Ahngô asingeegede Gényamanyamage na gégonige sedi. Na ahmakina éetsô ndémbone gô panza na g’ôgogo. Ahngakunduga g’ôwa gôétôma ôtômu ôvo na Christ, ône ameetsô na Nzambé gôétôma tsinane môtônisa amipuma.

⁵ (Gékundugéô samapanga te gôndé ane amayôhu gô gékuanô.) Géé gôndé avo amawani angavengéa ngu na vangoota môtônisa amipuma.

⁶ Ti gô gényônga géndé n’anye nôndé nômatsimamédu na Nzambé nôngaba gô géômbé sane angapanga ékundugani g’ôwa. Owa amôbaé ôsaba na ngudi gôndé anye. Nôngaba asungéyi oma va mbene aNzambé gô ina aJésus‐Christ. Nôngaba n’otômu ôvô ôvôni na Christ gôétôma tsinane gô môtônisa amipuma.

Tsôgôô émeetsô Satan éamôbô na môbô

⁷ Vangoota môtônisa amipuma, Satan angakusédu gô tsôgôône émeengédu angô.

⁸ Angakea gôébôméda asi tsenge yetso yava tsina, ane angeendô mbe Gog na Magog. Satan angakôkanganéda ahngô muetso gôégenya ébadi. Angayeka gayeka misige miagô kôbango amubu.

⁹ Engeenanô vavigahngô gô dongu na gô ékoo na gésa na gésa ahwesea na gésa na gésa gôégugéa gétungu gédigaa asi Nzambé na môsenge ônyôngéô Nzambé. Na vane soto géngaaga g’ôba gôndé Nzambé gôégudéda ane angaviga na gésa na gésa.

¹⁰ Vane yabédé, Môbômédine waô angagunyu na gô mungu asoto gôkusa mbônga ébévani éangôté éndé na tsokida. Wangô angadenga Gényamanyama na môékédine adiboe ahndé gôéenéa angô. Angô atatô angabisongono na pitsi n’omanda môbô na môbô gékôdéé.

Môtsundu amôyusumédu

¹¹ Vane nameena gédigaa gévôni savembo sokumaka, na ône andé digaa gô sangô. Tsinane na ôbee émanôtôga va miso medi na ésiombédô éenanô.

¹² Nameena ane amawani na payi n’anéngé, ahndé mitie va mbene agédigaage sokumaka. Ebooto éamiganda émakukuu. Gévo gébooto samiganda gémakukuuni te géne samonyo. Ane amawani amatsundédu gô mane mameendangô mamatendu gô migandamie.

¹³ Ane amwa gô mbéye ahndé wangô ahmanzeegedu na mbéye. Owa na tsenge éane amawani dimanzeegeda ane andé wangô. Muetso ahmatsundédu gô mane mameendahngô.

¹⁴ Owa na tsenge édigaa ane amawani émagunyu na gô mungu asoto. (Mungue asoto ône, te ôwa amôbaé.)

¹⁵ One asangadenganô inedi ématendu gô miganda miamonyo angagunyu na gô mungu asoto.