Gétsutsuéô 2 - New Testament in Mitsogo

Ndongi gôndé asi mbumu éaNzambé gô Ephèse

¹ Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékenea asi mbumu éedi gô mbôkane ééndô mbe Ephèse. One asumbéda minanga tsambué g’ôgogo edi ômôgôô te angô aseta va gatse evumbéô tsambué éadambi émakônzu na dodo. Oôkéôni éne évovo angô.

² Angô mbe: Me tsabômu metso mane mameendanye. Tsabômu dôta gamatsogo anye na ngudi gôéyanza na môvinéné ôndé n’anye. Na gô pie, nôsasinga ane abévani aba va gatse anyô. Nômakanéga ane avovo mbe: Me te namatômu na Christ, géé na gô pie, géé kaka na gô pie anye nômeena. Vane nômamenya mbe te asi diboe.

³ Anye nôndé n’obibô gôéenea mane mangavigani. Gô mabégô mami nômeena maguga na nômasipa.

⁴ Ivô béyé nane nôndé na ébégô ébévani ésasinga me. Anye nôsanyôngéô medô gamabakanye v’ebandô.

⁵ Tambô bangôani gamanyôngéô anye me v’ebandô. Viiani ngima mabégô manyô mabévani. Nikani na gôndé me gamabaka wa n’anyô v’ebandô. Okô mbe nôsakoga gôétsika mabégô manyô mebévani, me nangaviga gôénôwata gévumbéô sanyô sadambi géndé n’anyô.

⁶ Eébéyée mbe nane, éne ényôngéô me gôndé anye te mbe mane mayanza géômbé sAnicolaîte nôkina mangô ti kinaga, mônongovo gakina me mangô.

⁷ Okô mbe anye nôndé na matô, ôôkôni môma na môma mane mavovo Gédidi SaNzambé n’anye asi mbumu éaNzambé. Angô mbe: Gôndé ane adiiani gô ébadi égenyuni, me nangeetsa ahngô ôtômu gôéaa miônda miagéétété géétsa monyo géndéké gô gatse atsaga éaNzambé.

Ndongi gôndé asi mbumu éaNzambé gô Smyrne

⁸ Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékenea asi mbumu éedi gô mbôkane ééndô mbe Smyrne. One andé v’ebandô ametso te angô andé v’ekôdéô ametso. Na ône amawani te angô amakundugani, andé na monyo ôsakôdéakani anôétsa ndongi yedi. Oôkéôni angô.

⁹ Angô mbe: me tsabômu magugame meenanye. Tsabômu n’osugee ôndé n’anye tambô, nôndé n’okiti. Me tsabômu mane matsuavô anye n’ane eenda mbe: Me te Môjuif. Tambô angô kaka Môjuif. Ahndé aneegedi aSatan.

¹⁰ Nômbieena gomo gô mane mangeenanye mapanda. Oôkôni édué. Avo va gatse anyô nôngeengédu gô eba atsôgôô gébé n’ebégô. Menyani mbe te yabédé akanéga anye. Gône nôngeena panda gô nzima apitsi. Sindédani na mavôma buéyé mbe na g’ôwa. Na me nanganôétsa môsenda te gépôkôdô sokumaka amonyo ôsakôdéakani.

¹¹ Okô mbe anye nôndé na matô, ôôkôni môma na môma mane mavovo Gédidi SaNzambé na anye, asi mbumu éaNzambé. Angô mbe: Ane adiiani gô ébadi égenyuni asangawa ôwa amôbaé.

Ndongi gôndé asi mbumu éaNzambé gô Pergame

¹² Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékénéa asi mbumu éedi gô mbôka ééndô mbe Pergame. Oôkéôni ndongi divovo ône andé n’ebaga amengô.

¹³ Angô mbe: Me tsabômu gôdigaanye. Nôdigaa ti pidi gô mbôka éamuene Satan. Anye nôndéké môvo n’ami. Gô vitoone éndé anye n’ami nôsiagané n’ami buéyé gô ndéône édangi émayôhu môékédine wami eendô mbe Antipas. Amayôhu te gô mbôkane édigaa Satan.

¹⁴ Béyé mbe nane, nôndé n’ebégô ésanyôngéô me. Va gatse anyô gôndéké avo anyôngéô meekédume maBalaam. Angô Balaam ameekéda dôta Balak gôéengéda asi Israël gô monongoe wedi ôbévani mbe ayeeséda ahngô éambô émadeekedu gô mbumba na gôéyanza gésaahgô.

¹⁵ Na vane va gatse anyô gôndéké n’avo andé n’evamba na mane mayanza géômbé sAnicolaïte.

¹⁶ Viiani ngima mabégô manyô mabévani. Nikani na gôndé me. Ti anye nôkina ndongi yami nôngeena gangaviga me na va gatse anyô gôégenya n’omee ane n’ebaga ékusa gô mônyee wami.

¹⁷ Okô mbe anye nôndé na matô ôôkôni môma na môma mane mavovo Gédidi SaNzambé na anye asi mbumu éaNzambé. Angô mbe: Gôndé ane adiiani gô ébadi égenyuni nangeetsa ahngô môyakô ôviga g’ôba ôsamenya muetso. Nangeetsa ahngô dôta étaé éavembo ématendu ina éatsatsee ésamenya muene môma buétsé te kumue éangô.

Ndongi gôndé asi mbumu éaNzambé gô Thyatire

¹⁸ Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékenea asi mbumu éedi gô mbôkane ééndô mbe Thyatire. Oôkôni ndongi divovo Jésus Muana ANzambé, ône andé na miso moobébayi ga soto. Na makôdô medi mandé na ngeengeyi ga kunga émakônzuni.

¹⁹ Angô mbe: Me tsabômu metso meendanye. Tsabômu vitoone éndé n’anyô. Tsabômu na gasipanye na mavôma na gényônga géôkô anye gôéyanzéa me n’obibô ôndéké n’anyô. Metso mane tsabômu mangô. Mane meendanye mamisôba ndéô yedi mootéa éyeka na mane mav’ebandô.

²⁰ Béyé mbe nane, nôndé n’ebégô ésanyôngéô me. Ebégôe te édué. Anye nôsinga gôédigaa na môgeto nône eendô mbe Jézabel, va gatse anyô. Angô apata mbe: Me namatômu na Nzambé gôéékéda. Angô abôméda ayanzi ami nzéane te gô gésasô na gô éambô ékusa gô ésôga.

²¹ Me namamôtsika ndéô éakuanakue mbe aviia ngima mabégô medi mabévani. Ivô angô asangoongôa étsika gésaahgôge sedi.

²² T’ebandô nangamôyaméda v’ekoko éamaguga abisa na pievia. Na gôndé ane ahmakea n’edi gésasô ahngaba te mônongovo. Ahngabisa na pievia muetso. Buétsé te akoga, atsika mane mabévani mameendahngô n’edi.

²³ Va ngongone vane nangayôha anedi. Na vane asi mbumu éaNzambé muetso ahngamenya mbe me navovoni ôdôô, te ône asabômu metso matasa môma na mane manyima môtémedi. Nangeetsanye môma na môma kuanakue n’ene émeendanye, môbévine angabévédu na mônyepine anganyepedu.

²⁴ Géé gôndé anye avo asi mbumu éaNzambé gô Thyatire, nôsigésangané gô meekédume mane mabévani. Na anye dôta nôsisingé gôétubédu mane meenda oma mbe: Evétô éviga gôndé Satan. Gôndé anye, me tsanôkôndéga mabégô mayekani, kabaga nôdagéô na mangô ga égumba étsuaôni.

²⁵ Ivô simbédani mane mandéké n’anyô ngu na vangaviga me.

^26-28 Gôndé anye nôdiia gô ébadie égenyuni, n’anye nôénda mane manyôngéô me géniké ngima ngu na vangaviga me, nanganôétsa ényanga. Te éne émeetsô me na Téta Nzambé. Nanganôétsa ényanga gôétôma tsengeye yetso. Nôngaditôma na môtunga amuahnga ôsaba na ngeba. Tsengeye dine dingapanzéga gabuéga mbéka éebôô pingô yatsesee. Nanganôétsa na mônanga ôtanani ava maageô.

²⁹ Okô mbe anye nôndé na matô, ôôkôni môma na môma mane mavovo Gédidi SaNzambé na anye asi mbumu éaNzambé.