Gétsutsuéô 18 - New Testament in Mitsogo

Gépanzanganéô samôsenge aBabylone

¹ Va mbenene vane me Jean nameena muene môsi g’ôba avigédu na Nzambé amasuma g’ôba. Angô amabaka n’otômu ôvôni. Obébayi ondômbedi ômatanédi tsinane nyetso.

² Môsi g’ôba ône amaamugana n’ogi agô ngongo mbe: Omapanzô. Môsenge ôvôni aBabylone ômapanzô na ômapanzanganô. Môsenge ône ôka gédigaa sayabédé. Oka gésomeo sedidi ébévani. Nyôyiye dibévani yanzoh didigaa wangô.

³ Gôébégô amanyuéséda asi tsengeye yetso gébungu sedi. Gébunguge sedi te sagésasô. Atômi atsenge yetso ahmakea n’edi gésasô. Ayôkôe amaviga gô tsengeye yetso ahmakôndéga dikitie yaô gô ôkitie wedi agékôdé na gô gésasôge sedi sagédundé.

⁴ Namookô wene ôgi ômavovo g’ôba mbe: Omee ami, tôtani, nôtôgani gô môsengee ône. Kabaga nôgésangana gô ébévee éedi. Kabaga nôsisédu gô panda yevunga éngasisédu angô.

⁵ Ebévee éedi émakôndanganédu ngu na g’ôba. Nzambé asabômu éangô.

⁶ Véndani môsengee ône gameendangô anye. Gô maguga mamatubédu anye n’edi gô ébégô évo, kôndégani émônikédéa mabégô mabaé. Kônzéani angô gébungu samaguga géngootéa édaga na géne gémakônzéangô anye.

⁷ Okana amaguga na panda dingeetsanye angô te ngu na ôkana okiti na ôkumaka ômabaka n’edi. Môsengee ône ômabaka ga môma gôétanganéda gô môtémedi mbe: Me nadigaa éva gadigaa môtômi atsenge g’ôkumaka edi. Me kaka môkué. Me tsangoongôa édéa môéngé na édigaa na kebo.

⁸ T’ebandô panda yevunga éetsa dingaviga na gô môsnegee ône te nyovo. Evungee te mabeea, na kebo na môéngé, na nzaa, na soto géngayôéda angô. Gôébégô Kumu Nzambé asoséda môsengee ône te amuene Kumu angudi yetso.

⁹ Atômi atsengeye yetso ahmakea n’edi gésasô na ahmatsôkéa ôkitie wedi agékôdéé ahngadéa na mindônga vangeenahngô môtutue amôsengee ône ôbutima gôyôa angô.

¹⁰ Atômie angasôbasôbana mbe: Ah ti gô panda. Ewe Babylone môsenge ôvôni angudi. Gô vipesu viandéô vimatsundédu éwe na ômani ébungana ti muetso.

¹¹ Ayôkôe agô tsengeye yetso angô dôta angadéa na mindônga gôébégô éamôsengee ône. Gôsabadô môma angasômba ékôtee yaô.

¹² Ekôtee yaô te dodo na muahnga osunu ôvôni, na mataé mosunu ômootéani, na mikanda miavembo miootéa édingani, na mikanda miatsoo miokumaka na mikanda mietso miosunu ôvôni na timbe yeetété éaminongo miamisôba. Ekôta yaô dôta te éôma éetso émapakô na pungé na gévino na kunga, na muahnga n’etaé.

¹³ Na évo ékôta te éôma égésu gô môyakô gôéonyepeda, étetu mbe épices. Na évo ékôta te miyombo na sôma sambônga amôsôba gétumbukuni, na maduku na madi na mivo miyakô, na tabaye na nyama ditsua oma, na dôtôye, na avéga na buéyé monyoe amôma, ayôkôe asômba na asômbéda.

¹⁴ Ayôkôe amabeenda môsengee ône mbe: Ekôtee éetso émanyôngéô éwe mbe ôba na yangô émadimbana na ôsangadôomba éediia.

¹⁵ Ayôkôe ane amakôndéga ôkitie waô gô môsengee ahsangawesea na gô angô gôébégô agomo amaguga mangeena angô. Ayôkôe ahngadéa na mindônga.

¹⁶ Ahngasôbasôbana mbe: Ah ti gô panda yagémbôkambôka gegé. Mbôkane émaata mikanda miosunu ôvôni miatsoo miokumaka. Emaata dôta misanga miosunu ôvôni na mianza mimasaô na dodo mimootéa ényepani.

¹⁷ Vipesu viandéô vimadugu gôédimbanéda ôkitie wedi wetso. Atômie ambôngôye dipôni na omee waô akénga wangô, n’ayanzie waô na muetso adiia dode yaô yeyanza éambôngôye ahsiwesea na gô môsengee ône.

¹⁸ Ahmaamugana mindônga vameenahngô môtutue ôbutima. Ahmaadôngana mbe: Madeo gôsiba wene môsengee ôvôni gandé ôdôô.

¹⁹ Môma na môma amagôbéga ébisie gô miôtsé miaô gôétubéda panda dimeenangô. Na ahmaamugana mbe: Ah ti gô panda yagémbôkambôka gegé. Gôébégô ôkitie amôsengee ône ômadôngéda muetso ane amatsua ôkitie wedi gô mbôngôye na gô dipo tsenge. Vipesu viandéô vimadugu gôédimbanéda yetso émabaka gô môsengee ône.

²⁰ Ewe ôba, tsôkéaka gôbungani môsengee ône. Anye asi mbumu éaNzambé, n’anye nômatômuku na Christ, n’anye apandôédi amatasa maNzambé, tsôkéakani. Gôébégô Nzambé ameeséda môsengee ône gô gékuanô na panda dimatubédangô anye.

²¹ Na vane môsi g’ôba amabaka na ngudi dipôni amagunya ôbobo ôvôni gô mubu na amavovo mbe: Môsengee ôvôni aBabylone ôngadimbana te mônongovo. Na angô ôsangadôomba éenanô.

²² Mimbô matôa oma gô ngombiye na émbômba na mimbanda mamôsenge ône masangadôomba éôkanô. Ane ayanza na mogo maô ahsangadôomba éenanô. Nzongodi éagésô géstuakôni ésangadôomba éôkanô.

²³ Gô môsengee ône gôsangadôomba éenanô gévede sadambi éyôani. Gôsangadôôkanô ôgie amôma, môgadi na mômé. Ayôkôe amôsengee ône ahmabaka na ngudi disimenya ene oma. Môsenge ône na maganga medi ômabôméda oma ayekani.

²⁴ Môsenge aBabylone ômeetsô tsôgôô gôébégo ômadenganô na nzina yapandôédi amatasa maNzambé na yasi mbumu éaNzambé, na yane amayôhu gô tsenge yetso.