Gétsutsuéô 15 - New Testament in Mitsogo

Asi g’ôba na panda yevungee éamôyusumédu

¹ Vane nameena gévo gémbégéa gévôni gémasôbasôbana me. Nameena asi g’ôba tsambué amavigédu na Nzambé asumbéda panda yevunga tsambué. Yangô te panda yevungee éamôyusumédu. Opisa aNzambé ôngakôdéa gô yangô.

² Vane nameena mubu ôndé na vede ga géeno n’obébayi ga soto. Nameena dôta ane amadiia gô ébadie émagenyu na Gényamanyama na gégonige sedi na ndémbône yedi. Ane ahmadiiani ahmabaka mitie va kôbangô amubu ôndé na vede ga géeno. Ahmasimbéda ngombiye dimeetsô ahngô na Nzambé.

³ Ahmatôa imbô ématuba môyanzi aNzambé, Moïse na émbô étôa Môpaga. Ahmatôa mbe: Ah Kumu Nzambé, éwe Kumu angudi yetso. Mane mayanzewe mootéa ényepa na mootéa ékasôgéda môma. Ewe Môtômi atsengeye yetso, matasa moo mapie masakoga.

⁴ ?One asookô éwe gomo indaa? ?One akina éneegeda éwe indaa? Ewe te Kumu éetsimama, gôsaba muene. Asi tsengeye yetso ahngaviga gôékotomo va mbene oo gôégobeda éwe. Géesédéôge soo gésapenganani gémeenanô va vede.

⁵ Vane nameena eba aNzambé g’ôba ômakukuga. Te gô angô ôenanô gédigaa samuene Nzambé.

⁶ Asi g’ôba tsambué amakusa gô ebee ône aNzambé amasumbéda pandaye yevunga tsambué. Angô tsambué amaata mikanda miavembo miobébayi. Va mbôma yaô ahmaata nyamba madede madata madodo.

⁷ Va gatse eôma énayi évégumani, gévô gémeetsa asi g’ôba tsambué ébungu tsambué émakônzu na dodo. Ebungue éne émayôa n’opisa aNzambé ône andé monyo môbô na môbô.

⁸ Eba aNzambé ône ômayôa na môtutu ômakusa g’ôbébayi ôtubéda ôndômba aNzambé. Môtutue ône ômakusa te gô ngudi yedi. Gôsibé môma amoongôa éengéa na gô eba aNzambé ngu na vamaduga pandaye yevunga tsambué dingaviga n’asi g’ôba tsambué.