Gétsutsuéô 12 - New Testament in Mitsogo

Môgeto na gényogonyogo

¹ Gémbégéage gévôni gématsiga g’ôba. Te môgeto amadipô na ômandee gadipô môma na môkanda. Ngondene émabaka va makôdô medi. Na gô môtsé te gépôkôdô sokumaka géndé na nzima éaminanga na minanga mibaé.

² Môgeto nône amabaka gôpégôpé n’ebôta muana. Ahmaamugana na misongomie.

³ Gévo gémbégéa gématsiga g’ôba. Te Gényogonyogo gémabaka na tsoo. Na gémabaka na miôtsé tsambué na nzimepo éatséba. Gô môtsé na môtsé émaata gépôkôdô sokumaka.

⁴ Na môkôndôe wedi ômakaka ôkabô aminanga gôéminôtôa g’ôba. Gô minanga mitatô ômanôtôa ôvo. Amamigunya na gô tsina. Amatema va kôbangô amôgetone amabaka gôébôtani gôéenea muanee gôémôaa.

⁵ Môgeto nône amabôta muanamômôgôô angatôma tsengeye yetso yava tsina na môtunga amuahnga ôsaba na ngeba. Muanee amabongu na amatsuaô na vandé Nzambé gô gédigaa sedi.

⁶ Môgeto nône amakea pita na gô tsenge émagasani ésaba môma. Gône Nzambé amamôkonzéa gédigaa gômbe angakeneo gô môtônisa na mikama mibaé na nzima môtôba yapitsi.

⁷ Na vane ébadi ématubu g’ôba, Michel na géômbé sedi sasi g’ôba ayanzie aNzambé ahmagenya na Gényogonyogo. Sangô dôta na ayanziedi ahmagenya na Michel.

⁸ Gényogonyogoge gésidiié. Angô na ayanziedi ahmawatô ôtômue agédigaage sag’ôba.

⁹ Gényogonyogo géne gémapatsédu. Te angô nyogone éambeego étetu mbe yabédé, na Satan, abôméda oma muetso. Amapatsô na gô tsina, angô n’ayanzi edi muetso.

¹⁰ Me Jean namookô ôgi angudi ôviga g’ôba ômavovo mbe: Tôka gô ndéône. Géobogeo saNzambé gébuéyi. Tôka gô ndéône. Nzambé atubédi ngudi yedi yokumaka. Tôka gô ndéône. Christ, ône amasevou na Nzambé atubédi ényangee éndé n’edi. Môtsuaviné amabaka môtie va mbene aNzambé gôétsuava asi mbumu éaNzambé, ana aTétee n’asô n’anyô na pitsi n’omanda. Môtsuavine ône te ône amapatsô g’ôba.

¹¹ Na ana a Tétee n’asô n’anyô ahmadiia gô ébadie émagenyahngô. Ahmadiia te gô ngudi yanzina yaMôpaga Endombo na gô ngudi yamabégô mapie mameekédangô. N’ahngô asikiné éétsa mionyo miaô gôéwa.

¹² T’ebandô éwe ôba, tsôkéaka, n’anye nôndé g’ôba, tsôkéakani na gényônga gévôni. Ewe, tsinane na mubue déakani gô magugame. Endé te nane. Yabédé amasutumédu na gôndé anye tsina na mubu. N’angô amayôa n’opisa gôébégô asabômu mbe pitsi yedi disaba diyekani, disanéa ti yatangaga.

¹³ Vamamenya Gényogonyogo mbe: Namapatsô na gô tsina, amayunza môgetone amabôta muanamômôgôô.

¹⁴ Môgeto nône ameetsô papa dibaé yambééa gôéveea na gô tungu éedi gô tsenge émagasani ésaba môma. Gône te gôngakeneo angô éma étatô na gébéndéké eebakanéduku kabaga ambatô na Gényogonyogo.

¹⁵ Vane Gényogonyogo gémakuséda meba gô mônyedi ga mbéyi, na mangô mamaanda môgeto nône gôémôtsôpa na gôémômina.

¹⁶ Ivô totone émawedéa môgeto nône. Emamina mbéne émakusa gô mônya aGényogonyogoge.

¹⁷ Sangô gémakambôga gômawatô sangô môgetone na gémakea gôégenya n’anedi amasanéani, te ane agobeda mitôma na mige miaNzambé na ahsanzeegeda mabégô mapie mamatubédu ahngô na Jésus.

¹⁸ Gényogonyogo gémadigaa va kôbangô amubu.