Gétsutsuéô 11 - New Testament in Mitsogo

Mbangi dibaé

¹ Me Jean nameetsô péndé éebongo ôkana. Namabeendu mbe: Timôga ôkekanéga ôkana eba aNzambé na ôkanéga na gévumbéô sadigondoku. Tanga dôta ôtangô ane ahndé gôéneegeda Nzambé gô ebedi.

² Otsika gésa samôkii agô eba aNzambé. Ombiabongo ôkana gô angô. Môkiie ône ômeetsô gôndé ane asagobeda Nzambé na ahngayeta môsengee aNzambé gô nzima dinayi na ngonde dibaé.

³ Gôngakudégu mbangi dibaé dingapandôéda matasa maNzambé gô pitsiye dine te môtônisa na mikama mibaé na nzima môtôba yapitsi.

⁴ Mbangiye dibaé te éétété ébaé ééndô mbe, olivier. Na yangô te dambi dibaé dindé va mbene one atetu mbe, Nzambé Kumu atsinane nyetso.

⁵ Okô môma akanéga éénda angô ébégô ébévani menyani mbe soto géngakusa gô miônya miaô gôéyôha adudeoe waô. Te gô mônongoe ône ôngayôhu ône akanéga éénda ahngô ébégô ébévani.

⁶ Ahngô abaé ahndé n’otômu gôékukéga ôba mbe mbuuane ésanganyogo pitsiye yetso dingapandôédahngô ndongi diviga gôndé Nzambé. Andé dôta n’otômu gôékoa meba maka nzina. Ovo ôtômu te gôébuéda minongo mietso miapanda yevunga gôndé oma na tsinane kuka yetso dinganyôngéô ahngô.

⁷ Vangamanahngô énigôa ébégôe éndé n’ahngô, Génamanyama géngakusa gô édukue éamongodi géngagenya n’ahngô, na géngayôha mbangiye.

⁸ Nzumbiye dibaé dine dingasanéa gô nzéa agô môsenge ôvôni ône ômakomedu Kumu yaô gô gésumu sowa. Môsengee ône ôtetu gô tsava mbe Sodome na Egypte.

⁹ Avo oma ava gatse amongo metso na yôgi yetso na tsenge yetso ahngabono nzumbiye dine te bonogo gô pitsi ditatô na gébéndéké. Na ahsangasinga mbe digunyu.

¹⁰ Asi tsengene ahnganyôngéô ôwa ambangiye dibaé. Ahngatsôkéa ti ga sueti na angeetsana éôma éadibiia anguene n’anguene. Gôébégô mbangiye dimayungéda ahngô.

¹¹ Vangoota pitsiye ditatô dine na gébéndéké, modi ôétsa monyo ôngaviga gôndé Nzambé na ôngeengéa gôndé nzumbiye dibaé. Na ahngô angatimôga. Muetso angadenganôni angeena na angakuadima na mangongo. Gomo ôngeengéa gô mitéma miaô.

¹² Mbangiye dibaé dine dingookô ôgi angudi ôbambéa ahngô mbe: Vigani. Na ahngabata na g’ôba g’ôbôngé, adudeoe waô te aboni nani.

¹³ Tsina na tsina totone éngatatéa, ti géndégégé. N’ovo ôkabô amôsenge ôngapanzéga n’omee abaki wangô. Otangôe ane angawaani vatatéa tsinane te mitônisa tsambué mioma. Ane angasanéani angookô gomo na angakuméda Nzambé andé g’ôba.

¹⁴ Eguga éamôbaé éôti, ivô wemani. Ene éamôtatô émahvigani.

Gémbômbage satsambué

¹⁵ Na vane môsi g’ôba ône atsambué amatoongo gémbômba. Yôgi yangudi dimaviga g’ôba dimookanô. Dimavovo mbe: Otômu gôétôma tsinane nyetso ôndéké gôndé Kumu asô na ône amasevoa angô, Christ. Angatôma môbô na môbô.

¹⁶ Nzima dibaé na payi dinayi andé digaa gô édigee yaô éokumaka va mbene aNzambé ahmagudama diôsô yaô na gô tsina. Amakuméda Nzambé mbe:

¹⁷ Kumu Nzambé, éwe Kumu otômue wetso Ewe ôndéké na ômabaka. We tôgôkuméda gôébégô ômayanzéda ngudiye yoo yetso Na ôndéké gôétôma tsinane.

¹⁸ Tsengeye yetso yava tsina dimayôa n’obagaa Na ndéône ébuéyi, éne éngeenanô ôpisee woo. Na ane amawani angatsundédu. Ndéône ébuéyi éne éngeetsewe ayanzie woo, te apandôédie amatasa moo môsendee waô. Na gôndé asi mbumu éoo muetso n’ane ahmaditéda éwe Byéyé mbe oma avôni, n’ageage ôngeetsahngô môsenda. Ndéône ébuéyi éne éngadimbanédewe ane ahmabunzanganéda tsinane.

¹⁹ Eba aNzambé g’ôba ômakukuu. Gégaa géenanô wangô te gémbégéa sevamba éaNzambé n’oma. Mikadikadi mimakadima na nzongodi. Midumu mimaduma. Na tsinane ématatéa. Na mataa mamaaga mayekani.