Gétsutsuéô 10 - New Testament in Mitsogo

Asi g’ôba na miganda migemige

¹ Na vane me Jean nameena muene môsi g’ôba amasutuméa na ngudi dipôni. Amabaka va gatse obôngé. Va ngongo amôtsé edi vamabaka nungu. Osô edi te ga kômbéne. Makôdô medi mabaé te gandé éétété ébaé éyôa na soto.

² Amasumbéda gô mogo medi miganda mimapunzuni. Amayeta ôkôdôe ômôgôô gô mubu. One ôgeto amayeta gô totone nyetso.

³ Amaamugana n’ogi agô ngongo ga ôgi agémbungu gébégôani. Vamamanangô éamugana, midumu tsambué mimaduma gôémôaabéa.

⁴ Vamamana midumumie évovo, me namabaka mbe natenda. Na namookô ôgi ômavovo g’ôba, ômatôma me mbe: Ombiatenda mane mavovi midumumie. Kenea ébégôe éne te éav’esooe.

⁵ Na vane môsi g’ôba amabaka môtie gô mubu na gô totone nyetso amakonyo ôgogo edi ômôgôô na g’ôba.

⁶ Na amasongéa ina aNzambé andé monyo môbô na môbô. Angô môkani oba na yetso éndé wangô na tsinane na yetso éndé wangô, na mubu na yetso éndé wangô. Môsi g’ôba amavovo mbe: Tôsangadôomba éenea.

⁷ Ti vangatoongo môsi g’ôba ône atsumbué gémbômbage sedi, tôngeena Nzambé adugéda éne ényôngéô angô émbaka gav’esooe ésinigôganéôni, te éne émabeendangô ayanziedi, apandôédi ambeego amatasa medi.

⁸ Vane ôgie ômookô me Jean, ômaviga g’ôba ômavovo n’ami mabégô mema. Angô mbe: Kiaka ôkebongo migandamie migemige mimapunzuni mindé sumbéda g’ôgogo amôsi g’ôba ône andé môtie gô mubu na gô totone.

⁹ Namakea na gôndé môsi g’ôba gôémôduka mbe: Baka migandamie migemige. Amaabéa me mbe: Bongoko. Oaaka miangô. Gô ébuyi ôngookô ndôé ivô gô mônya ôngookô duegi ga môkono oombo.

¹⁰ Me Jean namabongo migandamie migemige g’ôgogo edi. Namamiaa. Gô mônyami mimabaka duegi ga môkono oombo. Na vamamina me, mimakoga ndôé gô ébuyi.

¹¹ Vane namabeendu mbe: Buedi mbe ôombaka nyene kuka épandôéda matasa ma Nzambé gôndé oma ayekani na tsenge diyekani, na yôgi diyekani na atômi ayekani.