Gétsutsuéô 1 - New Testament in Mitsogo

Génigôgéô

¹ Gô gésangô gegé nôngookô tsangô éamane mamatsutsua Jésus‐Christ. Nzambé amasingéa Jésus‐Christ gôétsutsua mangô gômbe angatévéda ayanzi edi mane mangabuéani. Amakudéga môsi g’ôba na gôndé môyanzi edi Jean, gôémôtévéda mabégô mema.

² Jean amatenda metso mameenangô na mamookô angô gôénigôa tsangô éamaviga gôndé Nzambé. Te mabégô mapie mamatubédu angô na Jésus‐Christ.

³ Mate gôndé ône atanga mabégô mema. Mate dôta gôndé ône ookôni. Na mate gôndé ane amagobedani. Gôébégô ndéône éngabuéa mabégô mema éka gôpégôpé.

Kômbô gôndé asi mbumu éaNzambé ahndé gô mbôka tsambué

⁴ Oô te me Jean nanôtendéa anye asi mbumu éaNzambé gô mbôka tsambué gô tsenge étetu mbe Asie. Te mbe mate na gétabé gébaké gôndé anye. Eetso éne nôédiia te gôndé Nzambé. Angô amabakani, na andéké, na te angô angavigani. Nôédiia te gôndé édidi tsambué éndé va kôbangô éagédigaa sokumaka gédigaa Nzambé g’ôba.

⁵ Nôédiia dôta te gôndé Jésus‐Christ. Angô mbangi éaNzambé ésapatakani. Angô Jésus te Muana ANzambé amapanga ébôtuni. Na angô amapanga ékunduga g’ôwa andé na monyo amôbô na môbô. Jésus te Kumu akumu yetso ditôma va tsina. Angô atônyôngéô. Amawa gôétôoboo gô ébévee éasô n’anyô.

⁶ Wa n’anyô tôengédu gô géômbé s’okumu edi tôka te asungéyi oma va mbene aTéta Nzambé. Tôétsa Jésus‐Christ ékasôga na émbô mbe: Ondômbee na ôkumakee wetso ôbaké gôndé angô na ngudiye yetso dibaké gôndé angô môbô na môbo. Amen.

⁷ Bononi. Nôeni gavigangô va gatse obôngé. Oma muetso angamôena, buéyé n’ane amamôtuma n’ekongo. Asi mongo metso mava tsina angadéa na mindônga gôndé angô. Ii. ?Tôngeenda nayee? Engaba te nane. Amen.

⁸ Kumu Nzambé avovo mbe: Me te Alpha na Oméga. Evéndégéô mbe v’ebandô ametso te me na v’ekôdéô ametso te me. One avovoni te Kumu angudi yetso. Angô amabakani ne te angô andékéni na te angô angavigani.

Jean ameena mane maJésus‐Christ te andé nani

⁹ Oô te me, muana aTétee n’anyô Jean. Gôndé wa n’anyô môvo na Jésus, nawanya n’anye gô maguga meena wa n’anyô. Nandé môvo n’anyô dôta gôéenéa ôkumu aNzambé na môvinéné. Atômi atsenge amaaganéda me n’omami na mbôkami. Namakedu na gô nengé étetu mbe Patmos te gô tsôgôô émeetsô me gôébégô nameekéda Mane Mamavovo Nzambé, mangô mandé mapie mamatévédu me na Jésus.

¹⁰ Gô nyee ômasevoa Kumu, Gédidi SaNzambé gémeengéa pepe gôndé me. Namookô gô ngimami ôgie angudi ôvovo ga gémbômba.

¹¹ Angô mbe: Tendaka gô miganda éne éena éwe. Kudéga miangô na gôndé asi mbumu éaNzambé ahndéké gô mbôka yedi tsambué. Okudéga na gô Ephèse na Smyrne, na Pergame na Thyatire na Sardes na Philadelphie na Laodicée.

¹² Namanikéda misome na gô ngima gôébono ône avovonoi. Vane nameena évumbéô tsambué éadambi. Emabaka émakônzuku na dodo.

¹³ Va gatse éangô vamabaka sôma môtie géndé ga môma. Gémaata ngoyi étongoni ngu na gô makôdô. Va mbôma gémaata nyamba madede édata éadodo.

¹⁴ Tsôgé yedi dimabaka yuué na vee ga pemba, na vee ga égudé éangubu. Misome medi mamabaka moobébayi ga ômeni asoto.

¹⁵ Makôdôme medi mamabaka na ngeengeyi ga kunga émakônzuni. Ogie wedi te nzongodi épôni ga ngubu.

¹⁶ G’ôgogo edi ômôgôô amasumbéda minanga tsambué. Gô mônyedi gômakusa ébaga éamengô. Gédimôge sedi gémabaka n’obébayi gavatsakama kômbéne.

¹⁷ Vamamôena me, namagudama na va tsina ganawéyi wakaga. Amatsakéga ôgogo edi ômôgôô gôndé me na angô mbe: Ombiookô gomo. Oô te me. V’ebandô ametso te me. V’ekôdéô ametso te me.

¹⁸ Me te Kumu amonyo. Namawaaka, géé deo noo nandé na monyo ôsakôdéakani. Môsapie owa, na tsengene éowa ôndéké te n’ami.

¹⁹ Tendaka metso mane meenewe. Otenda te mane mabuéa n’atsatsee na mane mangabuéani.

²⁰ Oeni éne ésamenyanganôni éav’esooe éaminanga tsambué miena éwe sumbéda g’ôgogo ami ômôgôô na éne éeni éwe évumbéô tsambué éadambi éangôéé. Minangamie tsambué te asi g’ôba amavigédu na Nzambé andé gôékenea asi mbumu éedi gô mbôkaye tsambué. Evumbéô tsambué éadambi te asi mbumu éaNzambé gô mbôka tsambué.