Galatie 6 - New Testament in Mitsogo

Wedanéani anyene n’anyene

¹ Ana aTétee asi mbumu éaNzambé, ôkô ôébéyi muana aTétee n’oo ayanza ébégô ébévani, pati yebégô, anye nôndé na Gédidi SaNzambé nikéani étévéda angô nzéane éetsimama. Indakani nane gô ngeba. Na dôta gôndé anye, môma na môma awemé gôndé amuene kabaga akuba gô mane makanégu angô.

² Wedanéani anyene n’anyene gô mane maditéô anye. Okô nôéndi nane nôgobeda éne émavovo Christ.

³ Okô môma amenya mbe: Me nandé ti môma môvôni, tambô te môma abobo, abômédu te amuene.

⁴ Buedi mbe môma na môma akanégé môdigédi edi amuene ôkô mbe ôndé kuanakue. Okô mbe ôbé kuanakue ôbaké nane gébone ône amôkedi.

⁵ Endé te nane gôébégô môma na môma angatsua te mane maamuene.

⁶ One eekéduni Tsangô Eamôsôba akabé éne éedi éetso na ône eekédani.

⁷ Nômbiaba n’odungé gôébômu. Menyani mbe Nzambé asasekuku. Ene égaaba môma te éne éngakenea angô.

⁸ Okô môma agaaba mane mabévani manyima môtémee, angô akandéda te ôwa. Na môma agaaba mane manyôngéô Gédidi SaNzambé, sangô gékandéda angô monyo amôbô na môbô.

⁹ Va tôénda mane mamisôba tômbiavovo mbe: Tôgogi. Ogani enyepanéô ômbiatsika éoko madi na tsingô. Gôébégô mbe ôkô tôbé na môvinéné tôngadiia mamisôba vangabuéa ndéône.

¹⁰ T’ebandô ôkô tôndé vangô kuka yetso tôena môkasô adagéô ébégô te gôndé wa n’anyô gôémôwedéa. Tôôtéé éwedanéa wa n’anyô asi mbumu éaNzambé.

Ndongi yamôyusumédu na kômbô

¹¹ Bononi béndaye dipôni ditendéa me anye. N’atsatsee natenda na mogo mamemuene.

¹² Ane ayanza mamisôba gô nyemo éanguene te ahngô anôtindéga gôégeetu. Angô eenda nane te gôbusugahngô gékuanô sowa aChrist ômawa angô gô gésumuge.

¹³ Omeaa andé na gésima segeetu anguene asagobeda mige na mitôma miaNzambé. Abuta énôgeeteda ahngô ahkiaka anyemôga anguene mbe: Te we tôétsédi ahngô gémbégéa gô yôtô taô.

¹⁴ Gôndé me tsanyemôga gô éne ébégô buétsé te gésumuge sowa gémayôhu Kumu asô n’anyô Jésus‐Christ. Gôébégô éagésumu sedi sowa, éôma éetso éatsengene éndé ga sôma gémabooni gôndé me. Na gô mane matsengene, tsôvé yami dimawa gô mangô.

¹⁵ Ogeetuyee, ôsageetuyee ésaba ébégô. Ene éndé ébégô évôni te gôékoga pepe wene mônongo amôma.

¹⁶ Gôndé muetso ane akenea ndongi yedi gô mitéma miaô me navovo mbe: Gétabé na mate maNzambé mabaké gôndé anye. Na gébaké dôta gôndé oma muetso avamba na Nzambé.

¹⁷ Bandôa deo noo ngu na gôvisa kômbéne étsangatsangana, nômbiatubéda me panda. Evisôe éndé g’ôtô ami étubéda mbe nandéké môvéga akôô aJésus.

¹⁸ Mate maKumu Jésus‐Christ mabaké gô mitéma mianyô muetso ana a Téta asi mbumu éaNzambé, Amen.