Galatie 5 - New Testament in Mitsogo

Nômbiadigaa gandé ana amôvéga

¹ Wa n’anyo tosaba g’ovega. Christ amatooboo. Tambô tôdigékéni g’ôkumu. Wemani kabaga nônikea ébongu g’ôvéga.

² Oôkôni édué. Me Paul nanôbeenda mbe ôkô nôsingi mbe nôgeetu, tsoongone yanyô kaka Christ.

³ Me nanôomba ébeenda nyene kuka mbe ône angeenda mbe ageetu, tambô na migemie mietso asoongôa ékina égobeda miangô.

⁴ Anye nôbuta éenanô na Nzambé ti eembe nôsaba n’oési te gôkenea anye mige miedi, tambô nômani éaagana na Christ. Nôbuniô ngeba yaNzambé.

⁵ Ivô gôndé wa n’anyô tsoongone éasô n’anyô te mbe tôngatsimamédu na Nzambé ti eembe tôsaba n’oési. Te éne étôenéani gô ngudi yaGédidi SaNzambé géne géyanza veetsa we Nzambé mitéma miasô n’anyô.

⁶ Okô tôndéké na vitoo na Jésus‐Christ, tôgeetuyee, tôsageetuyee, ésaba ébégô. Ene éndéké n’ebégô te mbe tôôtéé ényôngéô Nzambé na tômôétsé mitéma miasô mietso gébé na paga.

⁷ Nômabandôa épénda ti n’ekenge gô nzéa éapie éaNzambé. ?One amabômédu anye indaa? ?Amavovo n’anye nayee gôékoeda anye matasame?

⁸ Ene émavovo angô n’anye ésivigé gôndé Nzambé ône amasevoa anye.

⁹ Te gatôénda mbe vipesu vialevure viaahndéda mipemba miyekani.

¹⁰ Béyé nane, Kumu asasinga me natsuma paga gôndé anye. Namenya mbe matasa manyô na mane mami masangapengana. Na môma te môma, ône ayungéda anye, Nzambé angamôsiséda.

¹¹ Ivô gôndé me, ana aTéta asi mbumu éaNzambé, ôkô me neekéda mbe buedi mbe nôgeetu ?tambô akasô agékuanaka me gôndé? Okô éébé mbe te nane, tambô mane meekéda me maJésus‐Christ amakomedu va gésumu sowa masangadôduméda môtéma amôma.

¹² Buedi mbe ane ahyungéda anye gôégeetu ahkiaké gô nzéane éaô gésikamé, akitsé éetso éanguene.

¹³ Ivô gôndé anye ana aTéta, nômakusédu na Nzambé g’ôvéga. Wemani vadigaanye g’ôkumu, nômbiaaga gô manyima mabévani mayôtô yanyô. Ivô n’etondo évôni wedanéani anyene n’anyene.

¹⁴ Migemie mietso miaNzambé mimawanyéa gô môtôma ôdôô. Nyôngéô môkoo ganyôngéô éwe ôtô omuene.

¹⁵ Okô nôdigaa gadigaa nyama yagô pindi, nôbetana, nôbévanédana, wemani kabaga nôbunzana anyene n’anyene.

Digaani gatôma Gédidi SaNzambé

¹⁶ Neendidô mbe digaani gatômu anye na Gédidi SaNzambé gômbe nôsangagobeda manyima mabévani mamôtéma gamabôtu angô.

¹⁷ Te nane, môtéma na ésimedi ôndé na tsôvé dipengana na Gédidi SaNzambé. Tsôvé yaGédidi SaNzambé dôta disanyônganéô na môtéma gabôtu môma. Tsôvé yamôtéma na dine yaGédidi SaNzambé dipengana anguene n’anguene te gadagéô anye éénda mane masabômu anye mbe te mamisôba.

¹⁸ Okô mbe Gédidi SaNzambé gétôma anye tambô kaka mige miaNzambé mitôma anye.

¹⁹ Esima éamôtéma amôma gabôtu angô éenanô. Eangô te gésasô na matasa masagôsagô, n’ebéva,

²⁰ na égobeda mbumba yegoni, na maganga, n’adudanô anguene n’anguene, na masaganédana na ngusu, na dipisa, na misoso, na pingô yéômbé ésaba na vitôô gô mabégô maNzambé,

²¹ na ényima, n’edangi, n’onzôô éaa môyakô, na mabégô mamônongo ône. Me nanôévéda mônongo gamani me énôbeenda mbe ane eenda mabégôme mane asangadigaa g’ôkumu aNzambé.

²² Tambô gabôta géétété samôsôba miônda miedi miamisôba, mônongovo gaGédidi SaNzambé gébôta gô môtéma amôma ésima éedi éamisôba. Gébôta t’etondo, na gényônga, gétabé, ôbibô, tsôvé oma, ngeba, mavôma,

²³ na gôéba gébé na nyemo, na gôéoodeda môtéma gôékina manyima mabévani. Mabégô mema masaba na môge.

²⁴ Ane andé na vitoo na Jésus‐Christ ameeséda anguene gôésiséda mitéma mimabôtu n’ahngô, na tsôvéye yetso dibévani na manyima metso mabévani.

²⁵ Gédidi SaNzambé gémeetsa wa n’anyô monyo. Tambô tôsingéni sangô gétôma wa n’anyô.

²⁶ Tômbiaba na dienza. Tômbiakambôganéa wa n’anyôene na wa n’anyôene. Tômbianyimana wa n’anyôene na wa n’anyôene gôébuta géneega sabobo.