Galatie 4 - New Testament in Mitsogo

¹ Tôkanéga ébégô édué gandé muanamômôgôô angaviagana n’okiti atétedi. Vagébaka angô agébaka muanéngé agono na môvéga. Buéyé nane, angô asabômu mbe éômee yetso, me te kumu éayangô.

² Vagébakangô muanéngé andé gô tsina otômu ane akenea angô na éômee éedi yetso. Adigaa gô tsina aô ngu na vangabuéa ndéône émabeenda tétedi g’ôgi edi amôyusumédu mbe: Nôétsa muanee wami mikuanyamie.

³ Na wa n’anyô tôndé te mônongovo. Vamabaka wa n’anyô tôgébaka ga muanéngé tômabaka te avéga éesôga ébévani éatsengene.

⁴ Ivô vamabuéa ndéône, Nzambé amavovo mbe: Muanami kiaka. Ongabôtu na môgeto. Ongagobeda mige migobeda Ajuif.

⁵ Ameenda nane te mbe muanedi angoobo wa n’anyô muetso tôndé gô tsina amige miaNzambé gômbe tôngaba asi mbumu éaNzambé, anedi apie.

⁶ Nzambé amakudéga na gô mitéma miasô n’anyô Gédidi SaMuanedi Jésus, gôébangôéda wa n’anyôene mbe na gô pie tôndéké anedi. Gédidige géne te sangô géaadôngana mbe: Ah Téta.

⁷ Vane gôndé anye gôsabadô môvéga. Môma na môma va gatse anyô nôndé te anedi. Vandé anye anedi anganôdugéda mônongovo gadugédu môma mikuanya mikenea angô gôndé anedi.

Paul amakebangana gôndé asi Galatie

⁸ Va mbeego anye nôsimenya Nzambé. Nômabaka g’ôvéga ômatômu anye n’ene éyanza môma na mogo medi, éne égonédangô na Nzambé, ivô kaka Nzambé.

⁹ Ivô ndéô nedué anye nôsabômu Nzambé. Béyé nane, éne éôtéa évôni te mbe ndéô nedué Nzambé asabômu anye. ?Ndéô nedué nôngoongôa énikéa égobeda ésôgee ébévani ésaba na ngudi nayee¿ Nônganika éengéa gôéba avéga nayee?

¹⁰ Nôôtéa égobeda te mivo minya, te dipo ngonde, te dipo ndéô, te mivo mipuma.

¹¹ Me nakebangana gôndé anye. ?Eetsô émayanza me va gatse anyô éngaba te éabobo‐a?

¹² Ana aTéta asi mbumu éaNzambé, kokooni gôndé anye. Bakani gandé me gôébégô me dôta nandé g’anye. Anye nôsibévédé me ta n’ébégô évo.

¹³ Anye nôsabômu ébandôe émeekéda me anye Tsangô Eamôsôba kukane éamapanga. Te vamabaka me n’ebeea.

¹⁴ Vamabeea ôtôe wami ôdôô, émabaka gôékanéga anye. Na anye nôsikeenge me, na nôsikiné me. Eébéyée nane, nomakenea me ti eembe me te môsi g’ôba avigédéô na Nzambé va gatse anyô. Ti gangakeneanye Jésus‐Christ.

¹⁵ Anye nômabaka na gényônga. ?Géé ti deo noo anye nôbé nayee? Me noongôa évovo ébégô édué gôndé anye. Anye mbe nômoongôaka aapata yasô, mbe nômayuua misome manyô nômeetsa me.

¹⁶ ?Ivô pitsi yedi nakogi môdudeo anyô te gôbeenda me anye mane mapie‐a?

¹⁷ Gôndé avo oma namani énôévéda mbe te ane ahvooto anye na buembee waô, matasa maô masanyepa. Ene ébutahngô te gôéaaganéda wa n’anyô gômbe nôngaba na vitoo gô mane maô.

¹⁸ Te buedi gôéba na gényônga gô mane mamisôba gô ndéô yetso‐nabéyee n’anye, tsabéyee n’anye.

¹⁹ Anami amôtéma, nookô pievia gôndé anye ga ookô môgeto misongo miamuana ngu na vangabôtangô. Pievia éôkô me te ngu na ndéône éngagono anye n’amuene Christ.

²⁰ Me nootéa ényôngéô pepe édenganô va gatse anyô n’atsatsee gôévovo n’anye mene mabégô. Me nanôkebangana.

Ekanégéda éAgar na éaSara

²¹ Beendani me ?anye nônyôngéô édigaa gô tsina éamige miaNzambé nôsookô éne éndé gô migemie‐a?

²² Miangô mitônigôa mbe Abraham amabaka na anamôgôô abaé. Môvo amabôtu na môvéga. Môvo amabôtu na môgeto asibaké môvéga.

²³ Muanee amabôta Abraham na môvéga te gôédugéda mane mamanyima ôtô. Ivô muanee amabôta angô na môgetone asibaké môvéga te gôédugéda ôvanga aNzambé na Abraham.

²⁴ Mabégôme mane mandé te gégoni. Agetoe abaé ane ahgono na minongo mibaé mievamba. Môvo te Agar, na agono na môkôdi ôtetu mbe Sinaï. Anee abôtangô gô évambedi te avéga.

²⁵ Agar te gandé môkôdi aSinaï gô tsenge éArabie. Agar te gandé môsenge aJérusalem pitsi yedi ôndé g’ôvéga n’omedi muetso.

²⁶ Ivô Jérusalem éagô tsenge éag’ôba ésaba g’ôvéga. Yangô te yeene éasô n’anyô.

²⁷ Matendeo MaNzambé matônigôa mbe: Tsôkéaka éwe môgeto agékômba ôsibôté muana. Aamugana mindônga miagényônga éwe ôsamenya éamugana na misongo. Gôébégô anee woo, éwe môgeto agépaga, Angootéa anee andé na môgeto andé na mômi edi.

²⁸ Gôndé anye, ana aTéta asi mbumu éaNzambé, nôndé ana amabôtu g’ôvanga aNzambé mônongovo gamabaka Isaac.

²⁹ Va mbeego muana amabôtu gôédugéda mane mamanyima ôtô, amakuana muanee amabôtu gô ngudi yaGédidi SaNzambé. Na gôndé wa n’anyô te mônongovo deo noo.

³⁰ ?Ivô Matendeo MaNzambé matônigôa nayee? Abraham amabeendu mbe: Patsa môgetone amôvéga na muanee wedi. Gôébégô muanee amôvéga asoongôa eetsô mikuanya mimatsika tétedi. One adiia mikuanya te muanee amôgetone asaba môvéga.

³¹ Endé te nane ana aTéta. Wa n’anyô tôsaba gandé ana amabôtu na môvéga. Tôndé ana amabôtu na môgeto asaba môvéga.