Galatie 3 - New Testament in Mitsogo

?Na mige, na gébé na paga ngudi ndé diôtéani?

¹ ?Ah ti anye asi Galatie nômavétsa mikambô‐a? ?Te ngangane ébômédi anye‐a? Nômani éôkô na vede mane mowa aJésus va gésumu sowa.

² Nanyôngéô anye nôaabéa me nyivône édué. ?Gédidi SaNzambé nômadiia sangô gô ngudi yagékeneo samige miaNzambé‐a¿ Vo nômadiia sangô vamookô anye Tsangô Eamôsôba éékédu? Nôsabômu mbe te gômeetsanye mitémamie gô Tsangô Eamôsôba.

³ ?Tambô nôndé n’odungé nane nayee? Nômabandôa te gô ngudi yaGédidi SaNzambé. ?Nônyôngéô ékôdéda te gô ngudi yanyene‐ma?

⁴ Metso mane mamisôba mamookô anye gô mitéma mianyô na mameendéô anye na Nzambé ?te mabobo‐a? Aé, kaka mabobo.

⁵ Nzambé eetsa anye Gédidi Sedi na ayanza va gatse anyô mabégô mamisôba manyônganéôni masoongôa môma ésupua. ?Ovénga, éetso éne te gôkenea anye migemie miedi‐a? ?Vo te vookô anye Tsangô éaJésus éékédu na veetsanye mitéma mianyô?

⁶ Te gatônigôu na Matendeo MaNzambé gôébégô éAbraham mbe: Abraham ameetsa Nzambé môtémedi. Nzambé amamôénda mbe: Angô te môma agébé n’oési va mbene ami te gôsitsumé angô ngudi yami paga.

⁷ Menyani ébégô édué. Ane eetsa Nzambé mitéma miaô gémôtsumé paga, ahngô te ana aAbraham apie.

⁸ Matendeo MaNzambé matôévéda ébégô madeo ésibuéa mbe gôndé ane ahsaba gô éôngo éAjuif, Nzambé angeena angô ti eembe asaba n’oési te vasatsumahngô ngudi yaNzambé paga. T’ebandô Abraham ameevédu ébégôe éamôsôba mbe: Nzambé angeetsa mate gôndé mongo metso mava tsina gô ineoo.

⁹ Abraham asitsumé Nzambé paga na ameetsô mate. Te mônongovo muetso ane ahsatsuma ôgi aNzambé paga eetsô mate gameetsô Abraham.

¹⁰ Avo ahmenya mbe étsimamee éami éenanô me na Nzambé te gô gékeneo samige miaNzambé. Tambô andéké amakôkôuni. Matendeo meevéda mbe: Môkokou gôndé môma na môma asagobeda pitsi yetso na ngaangaa, éetso ématenduni gô miganda miamige miaNzambé.

¹¹ Béyé nane éndé ti na vede mbe Nzambé aseena môma ti eembe asaba n’oési te gô ngudi yamige miaNzambé mikenea angô gôébégô Matendeo MaNzambé matônigôa mbe: One andé va mbene aNzambé gétsumé ngudi yedi paga te ône andé na monyo.

¹² ?Mige miaNzambé mindé na ngudi gô môtéma ôndé pepe gôndé Nzambé‐a? Aé, misaba. Matendeo MaNzambé matônigôa mbe: One akenea migemie mine, monyo edi te gô miangô.

¹³ Christ amakokou gô gévenga sasô n’anyô. T’ebandô amatôoboo na tôsaba gô tsina amôkokou amige. Matendeo MaNzambé matônigôa mbe: Môkokou ôndé gôndé môma ayôhu gô gésumu sowa.

¹⁴ Emabaka te nane gôndé Jésus gômbe mate mameetsa Nzambé Abraham, mangeetsô dôta gô ngudi yaJésus‐Christ gôndé ane asaba gô éongo éAjuif. Na gômbe vasatsuma wa n’anyô ngudi yaNzambé paga gôémôétsa mitémamie, atôétsa Gédidi sedi gamavangangô.

Mige miaNzambé na ôvangee wedi

¹⁵ Anee aTéta asi mbumu éaNzambé, nagunyéa anye tsavane édué. Môma aka gôéwa atsika ôgi edi amôyusumédu va mbene oma. Gôsaba muene angoongôa ékékôa angô. Gôsaba muene angakôndéga mavo mabégô gô angô.

¹⁶ Endé te nane. Nzambé amavangana n’Abraham na muanedi ôvanga. Nzambé asivove n’Abraham mbe: Ovanga te gôndé éwe n’anoo. Ivô Nzambé amavovo n’Abraham mbe: Ovangee te gôndé éwe na muanoo. Evéndégéô mbe ôsaba gôndé oma ayekani. Ondé gôndé môvo. Môvo nône te amuene Christ.

¹⁷ Oôkôni éne évovo me. Nzambé ameetsa évamba na ameenda mbe: Esangaagana. Vamoota mikama minayi na nzima ditatô yema te Nzambé amakitsa migemie. ?Miangô mingaaganéda évamba éaNzambé nayee? ?Minganôtôa ôvangee aNzambé nayee?

¹⁸ Okô mbe na gô pie éne étôétsô na Nzambé éndé ga mikuanya na miangô mikusa gô mige miedi, tambô mikuanya misakusa g’ôvangedi. Ivô tôsabômu mbe te g’ôvangedi mbe Nzambé amatubéda Abraham étondo éedi ôbiia.

¹⁹ ?Okô mbe éndé nane ébégô ndé migemie mine mimakitsô? Mimakitsô te gôémenyeda môma éne éyanzangô ésanyôngéô Nzambé. Mimakitsô mbe mingadinga ngu na vangaviga muanee aAbraham, te muanee ovanga. Asi g’ôba amavigédu na Nzambé gôétsua migemie mine na gôndé môma môvo. Angô amabaka gékambi va gatse aNzambé n’oma.

²⁰ We tôsabômu mbe Nzambé te môvo. Tambô môma môvo asabuta gékambi. Evéndégéô mbe Nzambé amabuta gékambi te gômabaka angô na ene.

Ene éyanza mige miaNzambé

²¹ ?Ekegea mbe migemie mipengana na divanga yaNzambé‐a? Esakegea nane. Okô mbe gômadenganô môge ôvo ômabaka na ngudi yeetsa oma monyo, oma mbe angeenanô na Nzambé ti eembe asaba n’oési te gôkenea angô môgee ône.

²² Ivô Matendeo MaNzambé matônigôa mbe: Tsinane nyetso éndé gô tsina éangudi yamabégô mabévani, buta mbe ôvanga ôngadugédu gôndé ane eetsa Jésus‐Christ mitéma miaô gébé na paga.

²³ Vamabaka ndéône madeo ésibuéa mbe môma eetsa Jésus môtémee wetso, migemie mimakenea môma ti eembe andé gô tsôgôô, gôéenéa gétsutsugéô sone angeetsa môma môtémedi.

²⁴ Endé te nane. Migemie mine mimabaka môdékédi gôndé wa n’anyô ngu na vamaviga Christ. Christ amatsimaméda wa n’anyô mbe tôenanô na Nzambé ti eembe tôsaba n’oési vameetsa we angô mitéma miasô n’anyô gémôtsumé paga.

²⁵ Gô ndéône éndé we na Christ édué, tôsaba na tsôvé éamôdékédi.

²⁶ We tôndéké ana aNzambé na vitoo na Jésus‐Christ, te gôtôétsa Nzambé mitéma miasô n’anyô gémôtsumé paga.

²⁷ Anye muetso nômeetsô bateme gôéba na vitoo na Jésus‐Christ nômakou wene mônongo. Na nômadeka mônongoe ôndé na amuene Jésus‐Christ, ôndéké amôsôba.

²⁸ Tambô gôsabadô ôkabô va gatse Ajuif n’ane ahsaba Ajuif, va gatse avéga n’ane asaba avéga, va gatse amôgôô n’ageto. Muetso tôndé môvo na vitoo na Jésus‐Christ.

²⁹ Okô mbe nôndéké oma aChrist nôndéké ana aAbraham. Ene éndéké ga mikuanya mimavanga Nzambé, éndé te gôndé anye.