Galatie 2 - New Testament in Mitsogo

Paul n’akedi avo amatômukuni na Christ

¹ Vamoota nzima ema n’ema énayi namoomba énika na gô Jérusalem, wa na Barnabas. Nameenda Tite mbe: oka n’asô.

² Namakea gôébégô Nzambé amatubéda me mbe: Kiaka. Gô géwanyéô sane atômani namanigôa ahngô Tsangône Eamôsôba éékéda me gôndé ane ahasaba gô éongo éAjuif. Tsinyôngéô mbe éne éyanza me bandôa mbeego ngu na deo noo édimbana gébé na tsoongo.

³ Gô mane mamanigôa me akasô, Tite môsi éongo éaGrec amaviga n’ami. Asitingédu pengô ta na tindégu mbe: Singa ôgeetu.

⁴ Béyé gamanyôngéô avo mbe ageetu. Ahngô te ane ahmagésangana n’asô ahmapataka mbe: We te ana aTéta. Ahmeengéa na wada gôévôtanganô mônongo agétabé géndéké n’asô n’anyô gôtôvamba na Jésus‐Christ. Ahmanyôngéô étônikéda g’ôvéga.

⁵ We tôsisingé ahngô ta na pesu éne émabuta ahngô édiia. Tômeebakanéda Tsangô Eamôsôba gôndé anye kabaga ékou n’oma, éka éamabégô madiboe.

⁶ Ane ahmeetsô ényanga opayi, ahngô géé ta payi géé kaka payi, me tsamenya gôébégô Nzambé asabono éne ébono môma. Neendi mbe ane ahmeetsô ényanga ahsiongé me mbe: Otsika édué. Oénda édué.

⁷ Ivô ahmamenya na gô pie mbe Nzambé ameetsa me éyanzee éekéda Tsangô Eamôsôba gôndé ane ahasaba gô éongo éAjuif, mônongovo gameetsô Pierre gôéékéda Tsangô nene gôndé ane amabôtu gô éongo éAjuif.

⁸ Gôébégô Nzambé amanyôngéô mbe me natômu na Jésus gôéékéda ane ahsaba Ajuif. Na amanyôngéô mbe Pierre atômu na Jésus gôéékéda Ajuif.

⁹ Jacques na Pierre na Jean te ane ahmapanga étômu na Jésus. Ahsitsumé paga mbe me nameetsô na Nzambé gésaô géndé n’ami egé. Ahmasambanéa na wa na Barnabas. Vane we muetso, asi géômbé gévo tômavanga mbe we avo tôkea gôéékéda ane ahsaba Ajuif na avo ahkea gôéékéda Ajuif.

¹⁰ Ebégô évo émadukahngô we te mbe: Tasani misuga miaAjuif mindé n’asô gô mbumu éaNzambé. Te éne émabaka me n’ekena gôéénda.

Paul amasemba Pierre gô Antioche

¹¹ Vamaviga Pierre na gô môsenge aAntioche namasemba angô v’ekanga gôébégô amabaka n’oési.

¹² Oésie te gômeenangô gomo ane ahndé na gésima segeetu. Pierre amaaka tabudé épo n’ana aTétee asi mbumu éaNzambé ahsaba gô éongo éAjuif. Ivô vamatsiga avo ahmakudégu na Jacques, gô gomo ômeenangô, Pierre amanôtôga vandé ana aTétee n’edi na asiédô tabudé épo n’ahngô.

¹³ N’avo Ajuif, ana aTétee ahmabaka mônongovo ga Pierre gényôngéô évamba n’akedi ahsibôtu gô éongo éAjuif. Béyé na Barnabas amuene amasuméa te tatôa gameenda akedi.

¹⁴ Vameena me éne émeendahngô gébé kuanakue na éne étôékédu gô Tsangô Eamôsôba me namavovo na Pierre v’ekanga mbe: Ewe, Môjuif ômadigaa éva gandé môma asaba Môjuif. ?Vane ôtindéga ane ahsaba Ajuif gôédigaa ga Ajuif nayee?

Oma muetso oobou te mônongovo

¹⁵ Wa n’anyô tômabôtu gô éongo éAjuif tôsaba g’ane abévie ahmabôtu gô mavo mongo. Mavo mongo ékegea mbe ane ahsavamba na Nzambé.

¹⁶ Béyé nane tôsabômu mbe môma aseenanô na Nzambé ti eembe asaba n’oési tsangô mbe akenea mitôma na mige miaNzambé. Ivô andé gébé n’oési va mbene aNzambé te gôétsa angô Jésus‐Christ môtémedi wetso gémôtsumé paga. Na we dôta tômeetsa Jésus mitéma miasô gôéba gébé n’oési va mbene aNzambé, kaka gô ngudi yegékeneo samige miedi ivô te gôsatsuma we Jésus paga. Gôsaba môma andé n’etsimama va mbene aNzambé tsangô mbe akenea mige miedi.

¹⁷ Wa n’anyô tôbuta étsimamédu va mbene aNzambé gô évambee éndé we na Christ. Na tôôkô mbe tôndé oma abévani mônongovo gandé ane ahsaba Ajuif. ?Evéndégéô mbe Christ te ébandô éebéva éasô‐a? Viaa. Esaba nane.

¹⁸ Okô nanikéa ésaa éne émapanza me, natubéda mbe tsagobeda mige miaNzambé.

¹⁹ Gôébégô éamigemie mine ékegea te nane. Me namayôhu gôébégô éamiangô buta mbe naba monyovo na Nzambé. Vamakomedu Christ va gésumu sowa te na me muetso.

²⁰ Nabéyee na monyo, monyoe ône ôsaba wami, te aChrist ayuéséda môtémami. Deo noo nandé na monyo g’ôtô ami, te gôétsa me Jésus môtémami wetso. Angô Muana ANzambé amanyôngéô me na amaadeekeda amuene amawa gôébégô éami.

²¹ Me tsakina ngeba yaNzambé. Okô mbe te mitôma na mige miaNzambé minyepeda môma ti eembe asaba n’oési va mbene aNzambé, tambô Christ amawa te bobo.