Galatie 1 - New Testament in Mitsogo

Ditimôgi

¹ Oô te me Paul nanôtendeani. One amasevoa me na amatôma me gô éyanzee édué te Jésus‐Christ na Tétedi Nzambé, ône amakundua angô g’ôwa. Gôndé oma, kaka ahngô amatôma me.

² Ana aTéta muetso ahndé éva agésangana n’ami gôétendea anye gésangô gegé, anye asi mbumu éaNzambé gô tsenge éaGalatie. Tônôtendea

³ te mbe Tétasô n’anyô Nzambé na Kumu asô n’anyô Jésus‐Christ anôétsa mate medi na gétabé sedi.

⁴ Christ amaadeekeda amuene ngu na g’ôwa gô ébévee éasô n’anyô. Te gôétôoboo na gôétôkuséda g’ôvéga ômatômuku we na tsinane éadeo noo édué éndé émayôa na mabégô mabévani. Te éne émanyôngéô Tetasô n’anyô Nzambé.

⁵ Ondômbee wetso ôbaké gôndé Nzambé môbô na môbô, Amen.

Gôndéké te Tsangô épo éamôsôba

⁶ Natsapéô gayavôganye égéngôgéa, na nônôtôga gôndé ône amabambéa anye gô ngeba yaChrist. Anye nôtsika Tsangône éamapanga gôéaanda nyene tsangô éamôsôba.

⁷ Kaka mbe na gô pie gôndéké nyene Tsangô Eamôsôba. Ivô navovo nane gôébégô gôndéké oma anôyungédani gôébévéda Tsangô Eamôsôba éaChrist.

⁸ Menyani édué. Okô muene, buéyé mbe môma buéyé mbe môsi g’ôba avigédu na Nzambé, anônigôa nyene tsangô éamôsôba épangana na éne émapanga we éékéda anye, ahngô mbe ahngadoku na gô mungu asoto.

⁹ We tômani énôbeenda na me nanôomba énôbeenda n’atsatsee mbe, ôkô môma anônigôa nyene tsangô éamôsôba épengana n’ene émeekédu anye, angadoku na gô mungu asoto.

¹⁰ ?Vavovo me nane nômenya mbe me nabuta ékumédu n’oma‐a? Aé. Navovo nane te mbe nangakumédu na Nzambé. ?Nômenya mbe nabuta ényônganéô n’ôma‐a? Aé. Okô nabuti ényônganéô n’oma tambô tsaba môyanzi aChrist.

Paul amasevou na amatômu na Christ

¹¹ Ana aTéta agô mbumu éaNzambé nanôbeenda na gô pie mbe Tsangône Eamôsôba énigôa me anye édué kaka tsangô émavaka môma.

¹² Me tsimitsikéô na môma. Me tsimiikédu na môma. Te Jésus‐Christ amatsutsuéda me yangô.

¹³ Anye nômookô gamabaka me gô gésôga sAjuif. Nôsabômu gamakuanaka me na génôngô asi mbumu éaNzambé. Namagényôga gôébunza ahngô.

¹⁴ Me namootéa pepe akasô Ajuif, asi éongo évo n’ami gô mane magô ésôga éAjuif. Namabaka gétômbiatômbia gô mane mamatsikéô we na tétee yasô.

¹⁵ Ivô Nzambé gô ngeba yedi, amasevoa me nagébaka gô ébuyi éeya. Amabambéa me gôéyanzéa angô.

¹⁶ Gô étondo éedi, Nzambé amanyôngéô étsutsuéda me Muanedi Jésus te mbe nanganigôa Tsangô éedi Eamôsôba gôndé ane ahsaba gô éongo éAjuif. Gô ndéô nene me tsikeadô ne gôndé môma gôéongu ndongi.

¹⁷ Tsikee buéyé na gô Jérusalem gôéena ane ahmapanga ésevou na étômu na Christ. Ivô namasuméa te keaga na gô tsenge éArabie. Vane namanika na gô môsenge aDamas.

¹⁸ Vamoota éma étatô vane namakea na gô Jérusalem gôéenana na Pierre. Namadigaa n’edi nzima apitsi na pitsi ditayi.

¹⁹ Tsiene muene amatômuku na Jésus, buétsé te Jacques môdimine aKumu Jésus.

²⁰ Ene énôtendea me ti na gô pie, Nzambé eena me, tsapata.

²¹ Vane namakea na gô tsengeye éaSyrie na éaCilicie.

²² Gô ndéôye dine oma aChrist, te asi mbumu éaNzambé gô tsenge éaJudée, ahmabaka madeo asiene gédimôge sami.

²³ Amookô te ookôgô étévo gamavovoko akaô mbe: One amakuanaka we va mbeego andé gôéékéda oma mabégô manzéa éaJésus‐Christ, mane mamabaka angô gôébunza.

²⁴ N’ahngô ahmakumédaka Nzambé gôndé me.