Ephésiens 5 - New Testament in Mitsogo

Tôdigéni gô gévede saNzambé

¹ Anye nôndéké ana anyônganéô na Nzambé tambô putugani gôédigaa mônongovo gandé muana amôtéma anyôngéô égono na tétedi.

² Gononi ga étondoe émabaka na Christ, éne émanyôngéô angô wa n’anyô. Gô étondoe éedi ameetsa monyo edi gôéyôu ôgondoku gôndé wa n’anyô. Gabutima môtutue ogondoku ôyôani, te gabutima na va mbene aNzambé mbônga éamôsôba éetondo éaChrist na ôwedi. Na amuene anyôngéô.

³ Anye asi mbumu éaNzambé, nônasinga mbe gésasô n’esima éasangô na onzôô okiti éôkanô va gatse anyô.

⁴ Na dôta ésanyepa gôndé anye gôévovo mabégô madibuanya, na mavovia masagô. Ivô vovoni te disambô ditévo gôékuméda Nzambé.

⁵ Votanganôni ébégô édué. G’ôkumu aChrist na aNzambé gôsaba môma agésasô na môma esima éasagô na môsi ônzôô. Gôébégô ône andé n’onzôô te môneegedi ambumba.

⁶ Nôkenea kabaga môma anôbômédu na mavovia maô mabueme. Te gô mônongo oési ône ôngeenanô ôpisa aNzambé ôéséda ane asamôgobedani.

⁷ Nômbiakanéga évamba n’omee ane.

⁸ Va mbeego nômabaka gô évitsi. Ivô ndéô nedué nômani étsiga gô gévede gômagésangananye na Kumu Jésus. Tambô digaakani gôémenyanganô mbe nôndé oma andé gô gévede saNzambé.

⁹ Va tungune éndé gévede veenanô ésima éetso éamisôba, n’etsimama, na mabégô metso mapie.

¹⁰ Tôtônegede éne éamôsôba gôésevoa mane manyôngéô Kumu Jésus.

¹¹ Nônakanéga évamba n’ane eenda ésima ésaba na tsoongo va mbene aNzambé. Tsigéda ésima éaô éevitsi na gô gévede mbe éenanô.

¹² Tôena tsoyi gôévovo mane mayanza omeaa v’esooe.

¹³ Vatsigédu ésima na mayanza maô mevitsi na v’ekanga, gévedege gétubéda mônongoe waô.

¹⁴ Ene étsutsuu gô évitsi na gô gévede, ékoga éka éagévede. T’ebandô tôôkô mbe’ Timôgaka éwe ôebogani Kunduga va gatse ane amawani Amuene Christ angagôtanédéa gévede sedi.

¹⁵ Bakani n’ekana gô môdigédie wanyô. Nônadigaa gadigaa ane asamenya ébégô n’ebégô. Digaani gô éodo éndé n’anyô.

¹⁶ Gô ndéô nedué édagani étôdigaa va tsina nôéni ômanda nôsiia poso. Pitsi yasô n’anyô diôta te ôtaga.

¹⁷ Nônaba n’odungé ivô gémbôgani gôémenya éne ényôngéô Kumu Jésus mbe nôénda éangô.

¹⁸ Nômbiaba n’edangi éamaduku. Nzéane éamaduku éndéké te éadiyunga. Ivô bakani nômayuésédu mitémamie na Gédidi SaNzambé.

¹⁹ Kasôgédanani anyene n’anyene gô mavovia maMatendeo MaNzambé na gô mimbô, na gô kônda na géembi gôéneegeda Nzambé. Buéyé mbe gô tsina amitéma mianyô tôani mimbô maKumu Jésus mabuéa gô matô medi.

²⁰ Kumédani Tétasô n’anyô Nzambé ndéô yetso na gô mabégô metso gô ina aKumu asô n’anyô Jésus‐Christ.

Ndongi gôndé môgadi na mômé

²¹ Anye nôneegeda Christ vagobedana anye anyene n’anyene.

²² Anye ageto digaani gô tsina otômu omée anyô ti eembe te ôtômu aKumu Jésus.

²³ Menyani mbe mômôgôô te tsesu amôgayedi mônongovo gandé Christ te tsesu asi mbumu éedi. Amuene Christ te Mooboyi asi mbumu éedi, yangô te ôtô edi.

²⁴ Te nane. Anye ageto gobedani omée anyô na gényônga mônongovo gagobeda asi mbumu éaNzambé agobeda Christ na gényônga.

²⁵ Anye amôgôô nyôngéôni agayanyô n’etondo évôni mônongovo ganyôngéô Christ asi mbumu éedi, na ameetsa monyo edi gôéwa gôndé yangô.

²⁶ Christ ameenda nane gôékoa mbumune yedi mbe éviia mane matsengene ngima gôéba môvo n’amuene Nzambé. Amamigôgéda na meba na ôgie wedi.

²⁷ Vane gô miso medi mbumune yedi éndéké n’ondômba ôvôni, n’etsimama na gébé n’oési. Egono na môkanda ôsaba n’etodi, na ôsaba na minyunya, na ôsaba na patie yeebéva.

²⁸ Buedi mbe mômôgôô anyôngéô môgayedi ganyôngéô angô ôtôe wedi amuene. One anyôngéô môgayedi andé gôéyôngéô buéyé n’amuene.

²⁹ Endé te nane. Gôsaba môma adudu ôtôe wedi amuene. Ivô môma aôbôngôa te bôngôa na akenea angô pepe. Te geenda Christ na mbumune yedi.

³⁰ Gôébégô tôndé éeyo éotôe wedi.

³¹ Te gatôbeendu gô Matendeo MaNzambé mbe: T’ebandô mômôgôô anôtôga gôndé yeedi na tétedi gôédigaa na môgayedi. Ahngô abaé aka ôtô ôvo.

³² Me Paul nanônigôa mbe ébégô édué éapie éndéké ébégô évôni ésinigôganéôkô na mbeego. Na étôékéda mônongovo gandé Christ na mbumune yedi.

³³ Ewanya dôta na mane manyô. Buedi mbe mômôgôô anyôngéô môgayedi ganyôngéô angô amuene. Môgeto na môgeto dôta agobede mômiedi na géneega.