Ephésiens 4 - New Testament in Mitsogo

Eeme éetso éag’ôtô éndé n’evamba

¹ Me Paul nandé môsi eba atsôgôô gôyanzéa me Kumu Jésus. Nanôtôma mbe kiakani mitie mônongovo gamanyôngéô Nzambé vamabambéa angô anye gôékea n’edi géômbé gévo gô nzéane yedi.

² Bakani gébé na nyemo na gébé na dibagaa. Bibédani gôésinganéa mane maanyene n’anyene gô vitoone éndé n’anyô.

³ Putugani gôéba môvo gô Gédidi SaNzambé buta mbe gétabé gévambéda anye.

⁴ Tôndé muetso gô ôtô ôvo. Na gédidige sasô n’anyô SaNzambé te gévo. Tsoongone éasô n’anyô étôétsô na Nzambé te épo.

⁵ Kumune éasô n’anyô te épo. Mabégô metso maNzambé matôétsa mitémamie te mavo. Na batemene étôétsôni te épo.

⁶ Nzambéne éasô n’anyô na Tétene éasô n’anyô te épo. Na angô atôma muetso. Ayanza na muetso. Na adigaa gôndé muetso.

⁷ Gôndé wa n’anyô tômani édiia ôbiia môma na môma wedi môgôô ômeetsô angô na Christ.

⁸ Te gatôbeendu na Matendeo MaNzambé mbe: Vamabata angô na g’ôba Amakea n’ane amabaka gô tsôgôô. Ameetsa oma migôô.

⁹ Vatôtanga mbe: amabata ?éne ékegea nayee? Ekegea mbe amapanga épénda na gô étibee éatsinane.

¹⁰ One amapéndani te ône amabatani. Amabata na gô ngongo adiôba yetso gôéyuéséda na amuene tunguye yetso yagô tsina na yagô ngongo.

¹¹ Na te angô akaba migôô gôndé oma ganyôngéô amuene. Ameetsa gôndé avo môgôô mbe asevou na atômu na Christ. Avo dôta waô môgôô te apandôédi adongi diviga gôndé Nzambé. Na avo ameetsô môgôô eetsua Tsangô Eamôsôba. Avo dôta gôéba môkeneyi ambumu éaNzambé na eekédie.

¹² ?Amakaba migôômie mine gôndé? Amamikaba gômbe asi mbumu éedi angaduganéô ngudi gô miangô gôémana éyanzee éaNzambé va tsina. Na mbe asi mbumu éedi andé ôtôe aChrist ôngavunda na ôngoongôga na ôngoodo gô mabégô metso maNzambé gô ngudi yamigôômie.

¹³ Vane tôngaba tômagésangana muetso évambevo gô éne ématôétsa mitémamie gébé na paga na gô gémenyéô sasô n’anyô saJésus, Muana ANzambé. Na vane tôngaba tôka payi gômavunda wa n’anyô na gômoongôga wa n’anyô gôéba ôkana ôvo n’etsimama éaChrist.

¹⁴ Wa n’anyô tôsangadôba anéngé ahsamenya ésipani. Tôsangadôpupa ga yabi yeetété dipupédu n’opunga na gésa na gésa. Gôébégô gôndéké mavo meekédu madiboe maviga ga ôpunga gôétôpupéda. Mangô matsanzabanédu n’abomedi, avaka diboe yaô gôékeeda oma gôébungana.

¹⁵ Ivô ôkô tôdigaa gô mabégô mapie na gô étondo éaNzambé tôngoongôga gô mabégô metso gandé ôtô amôma oodoni na ôsipani. Amuene Christ te môtsée.

¹⁶ Te gô ngudi yedi mbe éeme éetso éotô éwanya na ngee. Na mbe diôngôye yetso disapengana na dioodo gôéwanyéda ôtôe wetso ékenge. Okô géeme na géeme géndé na éedi éyanza, ôtôe wetso ôngavunda na ôngoongôga na vitoo.

Tôdiia wene monyo gôndé Christ

¹⁷ Oôkôni éne énôbeenda me gô ina aKumu Jésus. Me mbe nômbiadigaadô ga oma asamenya Nzambé. Mane manyôngéô omeaa masaba na tsoongo.

¹⁸ Matasa maô mandé gô évitsi. Asamenya ta n’ebégô évo éagô monyo ôtôétsô na Nzambé gôébégô mitéma miaô mindé g’ôdungé na pandandaa.

¹⁹ Aseena tsoyi gô mane mayanzahngô masagôsagô na yôtô yaô. Ahyanza ésima éagô évitsi gésikamé.

²⁰ Géé anye nôsiékédu mabégô mane na Christ.

²¹ Nômookô ina éedi étetu. Nômeekédu mane mapie maJésus.

²² T’ébandô gasasanye mikanda mievindô, sasani dôta mônongo wanyô ambeego ômabôtu n’anye na ômatôma anye gô metso mamayanzanye mbeego. Mônongoe ône ônde na manyima mabôméda môma gôémôkeeda gôébungana.

²³ Buedi mbe nôkou ti pepe nôka wene mônongo gô mitéma mianyô na gô édidie éanyô.

²⁴ Gaatanye mikanda miamanza, aatakani mônongoe atsatsee, ône ôgono na amuene Nzambé. Mônongoe ône ôviga gô Mabégô MaPie na ôenanô gô môdigédi ômatsimamani ônyôngéô Nzambé.

²⁵ T’ebandô nanôtôma mbe: Sasani diboe. Buedi mbe môma na môma avové na môkedi mane mapie. Gôébégô tôndé muetso éeme éamôkuba ôvo.

²⁶ Okô nôôkô ôpisa nôwema kabaga nôkuésédu na angô gô mabégô mabévani. Nômbiadigaa n’opisa môsee amôbongo.

²⁷ Nômbiétsa yabédé gépékéô na gô mitémamie mianyô.

²⁸ Te mbe ône amabaka muisui anzeegede éésua. Buedi mbe ayanzé na mogome medi amuene gôédiia mane manyôngéô angô géésué. Na eetsé dôta na misugamie gô mane mayanzangô.

²⁹ Nônavovo ta n’ebégô évo ébévani. Nôvovo te mane mandé na tsoongo gôéwedéa akanyô gôéwesedangô gô nzéa éaNzambé étôkéani. Mavovia manyô mandé n’eyanza gôényepeda akanyô. Vane nônganyepeda muetso ookéô anye.

³⁰ Nônanikéda Gédidi SaNzambé gévii gô mane meendanye. Sangô te ndémbô éamakuéta Nzambé gôndé anye. Sangô te môkodi ômatôkatôni gôétôbandôéda mbe nyovo Nzambé angatôyuua gô tsinane édué.

³¹ Patsani gôdagôda n’anyô matasa metso na mavovia manyô manganye na pigaga, n’opisa. Nôtôgani gô mindônga na matoki. Aaganani n’ebévee éetso.

³² Bakani n’enyônganéô na vitoo anyene n’anyene gôésingananéa anyene kokoo mônongovo gamasingéô anye na Nzambé kokoo gô ina aJésus‐Christ.