Ephésiens 2 - New Testament in Mitsogo

Tômabaka g’ôwa, tôka na monyo

¹ Va mbeego édidi éanyô émabaka gô évitsi ti eembe émawa gôébégô adiési yanyô na ébévee éanyô.

² Gô ndéô nene nômagésangana gô ésima na môdigédi asi tsengene. Nômagobeda ône atôma édidie ébévani éangudi éava tsina. One atômani ône, ayanza deo noo gô mitéma miane akékôa ôgi aNzambé.

³ Wa n’anyô muetso tômabaka gandé ane akékôani. Tômadigaa gadigaahngô gôédugéda manyima mabévani mamabôtu na yôtô yasô n’anyô. Tômayanza mane mamatômu we na yôtô yasô n’anyô na édidi éasô n’anyô éasagô. Vamabaka we tôgébaka gamabôtu we, tômabaka gô tsina opisa aNzambé gôésisédu n’edi gandé akasô, ane agébaka wangô.

⁴ Ivô ngeba yaNzambé diyeka na étondo éedi éndéké évôni.

⁵ Vamabaka édidi éasô n’anyô égébaka gô évitsi éowa gôébégô éamabégô masô n’anyô mabévani, Nzambé gô étondo éedi amakundua we gôéba deo noo monyovo na Christ. Tômoobou te gô ngeba ditôenanô na Nzambé.

⁶ Gô vitoone éndé n’asô n’anyô na Jésus‐Christ, Nzambé amatôkundua g’ôwa gômbe tôndé ôtômu ôvo na Christ. Na tôndé digaa n’edi gô ényanga éag’ôba.

⁷ Gô metso mane Nzambé atubéda môbô na môbô gandéké angô na ngeba, n’etondo gôndé môma gô éne émayanzéa angô wa n’anyô gô ngudi yaJésus‐Christ.

⁸ Nômoobou te gô ngeba dimeenanô anye na Nzambé vameetsanye angô mitémamie gémôtsumé paga. Géôbogeoge géne gésibandôé n’anye. Nômagéétsô na Nzambé géenza.

⁹ Géobogeoge gésikusé gô ngudi yamayanza manyô. Vane gô sangô gôsaba môma anganyemôgani.

¹⁰ Gôébégô tômavangô na Nzambé na tômakou gômatôvamba na Jésus‐Christ gômbe tôngaba na monyo ômadugani na mayanza mamisôba. Amuene amatôkônzéa mayanzame mane mbe tôngeenda mangô.

Tôndé môvo gô ina aJésus‐Christ

¹¹ Me Paul navovo n’anye nôsibôtu gô éongo éAjuif. Te anye nôtetu n’Ajuif mbe: nôndé te ane asigeetuni, na anguene te ane amageetuni. Avovo nane te gô gémbégéa gékitsô gô yôtô yaô. Bangôani anyene éne émabakanye mbeego.

¹² Gô ndéô nene nômabaka gôdagôda na Nzambé. Anye na Nzambé nôsimenyangané, nômabaka agenda. Nôsindenganô va gatse ane amasevou na Nzambé. Gô évamba émavamba Nzambé n’omedi gô ngudi yovanga ôvôni, anye nômabaka nômatatôuni. Nômadigaa gô monyo atsengene gébé na ébégô éeténdéda, na gémenye Nzambé.

¹³ Anye nômatongoniaka na Nzambé, nôka deo noo évambevo na Jésus‐Christ. Gô ngudi yowa aChrist nômawesedu na gôndé Nzambé.

¹⁴ Te amuene Christ amavambéda Ajuif n’ane asaba Ajuif gôéba n’evambevo gôédigaa na gétabé. Va gatse Ajuif n’ane asaba Ajuif gôsiôkanéôkô ahngô gômabaka ga môgômba abôvingô. Ivô Jésus amaadeekeda ôtôe wedi ôgondoku gôéyôhu na amapanza môgômbee ône, na amavanbéda ahngô abaé.

¹⁵ Jésus amanôtôa mige miaNzambé na mitôma miedi gôégésanganéda mongome mabaé mane. Amakoa mangô maka yene éongo éamanza éndé n’evamba n’amuene. Eongo éne éka na gétabé.

¹⁶ Gô ngudi yowedi va gésumu sowa, Christ amanôtôa bôvingôe wetso. Va gésumuge sowa, Christ amavambéda mongome mabaé mane maka ôtô ôvo na maka n’evambevo na Nzambé.

¹⁷ Vane tôena mbe Christ amaviga gôétôékéda Tsangô Eamôsôba éagétabé saNzambé gôndé anye nôsaba Ajuif nômabaka gôdagôda na Nzambé, na dôta gôndé Ajuif amabaka vavo n’edi.

¹⁸ Wa n’anyô muetso, na Ajuif na ane asaba Ajuif, tôwesedu na Gédidi SaNzambé na va mbene edi gô ngudi yaChrist.

¹⁹ T’ebandô anye nôsibôtu gô éongo éAjuif, nôsabadô agenda. Nôsabadô ane asamenyanganô na Nzambé. Gô tsenge éa Nzambé nôsaba agenda, nôndé te kumu. Nôndé asi mbumu éedi.

²⁰ N’anye dôta nômani égésu gô eba ôsaaô va ngongo obôga. Obôgee te eekédi amasevou na amatômu na Christ, na te apandôédi amatasa maNzambé. Eengôe ésipa ebee te amuene Jésus‐Christ.

²¹ Mbeka éengôe ésipa, mbe na eba wetso ôngaba te na tengeke. Vasipa éengôe, ebee ôtema na ôvunda gôéba eba aNzambé ômatisimamani gô ngudi yaKumu Jésus.

²² Vamagésangana anye na Christ, anye ne akanyô muetso nômagésu n’edi gô ebee ôsaaôni ôdigaa Nzambé gô ngudi yaGédidi sedi.