Colosses 2 - New Testament in Mitsogo

¹ Nanyôngéô mbe nômenya gagenya me ébadi évôni gôndé anye na gôndé ane adigaa gô Laodicée na gôndé muetso ane madeo asiene ôsôe wami.

² Nagenya gôndé anye te mbe mitéma mianyô miyôé na bôkédé gébé na gomo, na mbe nôbaké muetso n’evambevo na vitoo. Na mbe nôbaké n’eodo éapie gôébégô éangô te ôkiti ôvôni ônôsuméda mitéma. Eodoe éne énômenyeda matasa maNzambé masinigôganéô na mbeego. Na mangô te amuene Christ.

³ Gôndé Christ gômasuégu ôkiti ôvôni agétangégegé na angô te éodo n’ebagé éviga gôndé Nzambé.

⁴ Navovo n’anye nane te kabaga môma aviga gôébôméda anye na mavovia mabuembe.

⁵ Béyé mbe gandé me gôdagôda n’anye g’ôtô, nandé vavo n’anye gô môtémami. Môtémami ôndé na gényônga gôndé anye na vitoo gôésipa gômeetsanye Christ mitémamie gémôtsumé paga.

Môma eetsô na Christ monyoe apie

⁶ Anye nômani ésinga Jésus‐Christ Kumu anyô. Tambô bakani na vitoo n’edi.

⁷ Bakani gôndé angô gandé géétété gésipédu na mitamba miedi gô tsina. Oongôgani na diiani monyoe wanyô gôndé Christ gadiia géétété ône wedi gô mitambamie miedi. Odoni gô mabégô metso maNzambé mameekédu anye masitsumé anye paga. Singani mbe kumane éaNzambé ébunduga gô mitéma mianyô.

⁸ Wemani kabaga môma anôtsôpa ga môédi atsôpa tsôsô na yata yedi. Yataye te mavovia mabuembe na meekédu magébé na tsoongo mamavaka môma gô éodo éedi. Ngudi yameekédume mane te veekédu mangô gô diônga na diônga, na mangô masatsikô. Madiia ngudi dôta gô ditômuye yava gatse atsina n’oba. Ebandôe éamangô kaka Christ.

⁹ Menyani mbe Christ te ôtô ômeengéa Nzambé gôéenanô na vede gôndé angô.

¹⁰ N’anye dôta vamavambanye évambevo na Christ, nômadiia te éetso éndé n’edi éaNzambé. Angô andé gô ngongo éamanyangame metso na ngudiye yetso.

¹¹ Gômavambanye na Christ, mômageetu, kaka gageetana oma, ivô ôgeetedi aChrist ôkegea mbe nômanôtôu manyima n’esima ébévani éayôtô yanyô gôéaagana na yangô.

¹² Endé te nane. Gô bateme émeenôô anye, nômagunyu ngii épo na Christ, na nômakunduu gékundugéô gévo n’edi. Endé nane gôébégô nôsitsumé ngudi yaNzambé paga, dine dimakundua Jésus g’ôwa.

¹³ Va mbeego gôsikiné anye manyima mabévani mayôtôye yanyô na nôsimenye évamba na Nzambé mitéma mianyô mimabaka g’oma amawani. Géé deo noo, Nzambé amatôsingéa kokoo gô mabégô masô n’anyô mabévani metso. Na amakundua anye gôéba monyovo na Christ.

¹⁴ Nzambé amabusua matendeo mamôtsundue ômasiisédu wa n’anyô. Tômeetsô môtsundue ône ômatenduni gôsikenee wa n’anyô mige na mitôma miaNzambé. Amabôkéda matendeome mane va gésumu sowa gôébusua mangô.

¹⁵ Gô gésumu gémawa Christ, Nzambé amatseda manyangame na ditômuye yava gatse atsina n’oba. Amadikata gô podi. Na amadikeda ga avéga akedu gô monge gôédetu v’ekanga. One amakea gô mbene atsôkéa gômadiiangô gô ébadie, te Jésus Muana ANzambé.

¹⁶ T’ebandô nômbiasinga mbe môma anôétsa ôési gô mige na gô mitôma miambeego gô éne éaa anye na gô éne ényua anye, na gô suetiye ditsôkéa anye, na gô mane meendô gô nyee ôbuéa ngondene amategetege, na gô mane manyee edunda aAjuif.

¹⁷ Metso mane te gédinadina samabégô mangabuéa gô mbene, ivô ôtô apie te Christ.

¹⁸ Nômbiasinga mbe nôétsô ôési na pati môma andé môtémedi gô ésôgee gôéneegeda asi g’ôba ayanzi aNzambé. Môma nône akanéga mbe asugéda amuene tambô anyôngéô ékumédu n’oma. Angô dôta eetsa môtémedi gô miôtô mienangô. Môma nône andé na nyemo éabobo gô mônongoe wedi ôtasangô atsengene.

¹⁹ Angô anôtôga gôndé Christ ône andé môtsé ambumu éaNzambé. Tambô te gô ngudi yamôtsée mbe ôtôe wetso ôngôgédu. Na mbe éemée éetso éwanya kuanakue gô diôngôye na mikangimie. Vane ôtôe ôngôga ganyôngéô amuene Nzambé.

Nômawa na nômakunduu gô monyo, te na Christ

²⁰ Gômeetsanye Christ mitéma mianyô mietso nôndé ti nômawa gô matasame na mônongoe atsengene na nôsaba g’ôtômue waô. ?Nôngoomba édigaa gadigaa oma agétômuku na mane matsengene nayee? ?Nôsinga oma anônikéa étsôpa g’ôvéga gôétômu na mige miatsengene nayee?

²¹ Mige miaô te nômbiabono sôma gegé. Nômbiabémba édué. Nômbiabanda egé.

²² Mige miaô miebakanéda mane mabunganani. Mige miaô na meekédu maô mamavaka te môma.

²³ Na gô pie, mangô meenanô na oma mbe mandé na tsoongo, na mawanya n’esôgee ényôngéô ahngô égobeda. Mangô makumédu mbe manyepa, te gôsugéda mangô môma mbe kabaga aba na nyemo. Na mangô makasôgéda ôtô amôma mbe aka ti pidi môma gô éne ééndi angô. Ivô mige na meekédume mane masaba na tsoongo va mbene aNzambé na masaba na ngudi yenôtôa manyima mabévani magô ôtô amôma.