Colosses 1 - New Testament in Mitsogo

Mikudéga na kômbô

¹ Oô te me Paul nanôtendéani. Nandé môvo vandé ane amatômu na Jésus‐Christ, te gamanyôngéô amuene Nzambé. Oô te me Timothée, muana aTétee n’anyô agô mbumu éaNzambé.

² Tônôtendéa, anye muetso asi mbumu éaNzambé nôdigaa gô môsenge aColosses. Anye te ana aTétee amavôma gô ngudi yaChrist. Te mbe Tétasô n’anyô Nzambé anôétsa mate medi na gétabé sedi.

Osambô gôékuméda Nzambé

³ Vavovo we na Nzambé gôndé anye, tômôkuméda ti kuméda, angô Tétene éaKumu asô n’anyô Jésus‐Christ.

⁴ Endé te nane gôébégô we tômookô tsangô éanyô. Tômookô gameetsanye Jésus‐Christ mitémamie mianyô gémôtsumé paga. Na tômookô gandéké anye na vitoo n’asi mbumu éaNzambé muetso.

⁵ Vameekédu anye kukane éamapanga Tsangô Eapie, éne Eamôsôba éaJésus‐Christ, nômamenyedu mbe éangô éndé na tsoongo. Ebandôe éavitoone éanyô na ébandôé émeetsanye mitémamie, étsinee te tsoongo nene. Nôndé gôéténdéda éne émakeneo g’ôba gôndé anye.

⁶ Tsangô Eamôsôba étsanzabana gô tsengeye yetso yava tsina. Ebuéda oma mabégô medi mamisôba gamabuéda yangô mangô na gôndé anye. Mabégôme mane mamisôba mandéké n’anye bandôa gô nyee ômapanganye éôkô mbe: Nzambé eena môma te ngeba. Na vane nômabandôa émenya na gô pie gakegea ngebaye dine.

⁷ One ameekéda anye mabégôme mane te Epaphras angô te môyanzi amavôma aChrist gandé me. Andé na vitoo n’ami. Awedéa me éyanzee édué.

⁸ Epaphras amanigôa we mônongoe etondo éndé n’anyô émeetsô anye na Gédidi SaNzambé.

⁹ T’ebandô tôsadunda évovo na Nzambé gôndé anye bandôa nyee ômookô we tsangône yanyô. We tôduka Nzambé mbe Gédidi sedi génôétsa éodo éetso na ébagé éetso gôénômenyeda pepe nzéane émakônzangô gôndé anye.

¹⁰ Vane nôngadigaa ganyôngéô Kumu Jésus. Na nôngeenda éne ékasôgéda môtémee wedi. Vane nôngaba ga géétété samôsôba gébôta miônda miedi miamisôba. Mitéma mianyô mingabôta ésima éamisôba. N’anye nôngawesea gôémenya gandéké Nzambé.

¹¹ We tôduka Nzambé mbe nôsipédu na noodedu na ngudi yedi dipôni dindé n’ondômba. Buta mbe nôbibéda na gényônga géniké ngima gô minongo mietso.

¹² Kumédani Téta Nzambé na gényônga gévôni. Gôébégô te angô amanôkoa gôéba kuanakue gôédiia ôkitie ômakeneo na Nzambé gô tsenge éedi éagévede. Okitie ône te gôndé asi mbumu éaNzambé.

¹³ Endé te nane. Amatôwata g’ôvéga ômatômuku we n’evitsi. Amatôengéda gôétômu na Jésus Muanedi amôtéma.

¹⁴ Gô ngudi yedi tômoobou. Ebévee éasô n’anyô émasingéô kokoo.

?Christ andé nayee¿ Amayanza ndé?

¹⁵ Christ ameenanô, na angô te gégoni saNzambé aseenanôni. Angô te Muana akuua. Angô te andé va ngongo ametso mamavangôni na mamakanôni.

¹⁶ Te gô ngudi yedi mbe Nzambé amakana na amavanga éetso éndé g’ôba na éetso éndé gô tsina. Eetso, ékegea mbe éne éenanôni na éne éseenanôni. Ngudi yeedidie te yedi. Na ditômuye na ényangee, na ngudi yetso te yaChrist. Nzambé amavanga na amakana éetso gô ngudi yaChrist na éetso te éedi.

¹⁷ Eômee éetso madeo ésivangô na ésikanô Christ te andéké. Eômee éetso émavangôni na émakanôni ényepa gô étungue yaô te gôndé éangô n’evamba na Christ.

¹⁸ Gô mbumu éaNzambé, Christ te ébandô na môtsé ôtômani. Asi mbumu éedi te ôtô ôtômuni. Monyoe waô awene mônongo ôbandôa te na Christ. Angô te Muana ANzambé akuua. Angô te mapangame meekunduu g’ôwa. Te éne ébeenda mbe gô mabégô metso angô te mômbenee.

¹⁹ Gôébégô Nzambé amanyôngéô édigaa na éenanô gô ôtô aMuanedi.

²⁰ Na vane, gô ngudi yamuanedi, Nzambé amanikéa évambéda na amuene tsinane nyetso na muetso andé gô yangô. Owa aMuanedi gô gésumu sowa te ôgondoku ômasuméda Nzambé môtéma gôéba na éôma éetso gétabé. Eômee éetso ékegea mbe buéyé éne éagô tsina, buéyé na éne éndé g’ôba. Na éangô émanikéa évambédu na amuene Nzambé. Môkônzine éevambee te Nzambé.

²¹ Va mbeego anye nômabaka gôdagôda na Nzambé gébé n’evamba n’edi. Nômabaka adudeoe wedi gôébégô éamatasa manyô mabévani na mayanza manyô mabévani.

²² Ivô deo noo, gô ôgondoku ômayôhu ôtô aMuanedi Jésus, Nzambé amanikéa énôvambéda na amuene. Ameenda nane gômbe nôngeenanô n’edi ti eembe nôsaba n’oési, na nôndé n’etsimama nômagôgéani.

²³ Eébéyée nane, bakani n’ekena gôésipa gô mabégô maNzambé. Bakani ga mataé mamasipédu na môkaka gépupédu na gésa na gésa. Nômbiasinga mbe nôkôngama gô éne émeetsanye mitémamie na éténdédanye bandôa vamookô anye Tsangône Eamôsôba. Tsangône Eamôsôba éne, te éne éaJésus émeekédu gôndé oma muetso ava tsina. Na te éne émakoa me Paul naka môtsuayi ayangô.

Ene éyanza Paul gôndé asi mbumu éaNzambé

²⁴ Deo noo natsôkéa magugame meena me gôndé anye. Menyani mbe gô magugame meena ôtô ami, me nadugéda magugame mameena Christ gôéoboo ôtô edi. Otô edi te mbumu éaNzambé.

²⁵ Me naka môyanzi ambumu éaNzambé. Ene te éyanzee émeetsô me na Nzambé gôénôyanzéa. Amatôma we gôéékéda na vede étasee éedi.

²⁶ Etasee émabaka n’edi gôémenyeda wa n’anyô nzéane émabaka ga emasuégu bandôa v’ebandô gôsinigôgéô éangô n’oma. Etasee éne atsutsua éangô deo noo gôndé asi mbumu éedi.

²⁷ Gôndé omedi Nzambé amanyôngéô éamenyeda étasee éedi éndé évôni na éôtéa n’okitie wetso na ôndômbee wetso. Amakônza éangô gôndé mongo metso mava tsina. Nôéni éne ésinigôganéôkôni na mbeego te éangô édué. Amuene Jésus‐Christ andéké gô mitéma mianyô na anônôtôa buétsé éndé n’anyô mbe nôsangadôtsuma paga gô mabégô mondômba aNzambé ôténdédanye.

²⁸ T’ebandô tônigôa oma muetso Tsangô éaChrist, ône amasevou na Nzambé. Tôevéda na tôéékéda môma na môma. Tôénda nane n’ekena éetso buta mbe tôtsigéda môma na môma va mbene aNzambé, kaka mbe andéké ana avembo gô mabégô maNzambé, ivô mbe andé môma amadômbéa gô vitoone éndé n’edi na Jésus‐Christ.

²⁹ Gôémangôa éyanzee éne, nagényôga ti na ngudi yetso dipôni diitsô me na Christ na diduméda gôndé me.