Zakariya 9 - BIBELE Mahungu Lamanene

Xikwembu xi ta avanyisa matiko lama vandzakaneke na Israele

¹ Mahungu hi lawa: HOSI Xikwembu xi vula leswaku xi ta ba tiko ra Hadiraka, xi ya titshamela le Damaska, hikuva mahlo ya xona ma le henhla ka vanhu hinkwavo, tanihi loko xi languta tinyimba ta Israele.

² Xi ta fuma muti wa Hamata lowu vandzakaneke na Israele, xi fuma ni miti ya Tiri na Sidoni, hambileswi vaaki va kona va tlhariheke ngopfu.

³ Va le Tiri va tiakele khokholo, va tihlengeletela nsuku ni silivhere, swi tala kukota nhulu ya mavivi emagondzweni.

⁴ Kambe N'wini wa hinkwaswo ú ta va tekela rifuwo ra vona, a cukumeta xuma xa vona elwandle, a va herisa hi ndzilo.

⁵ Va le Axikeloni va ta swi vona, kutani va chava. Na vona va le Gaza, va ta tshukisiwa va rhurhumela. Leswi va le Ekroni a va swi tshemba, swi ta tekiwa. Le Gaza, tihosi ti ta nyamalala, muti wa Axikeloni wu ta lahlekeriwa hi vanhu va wona.

⁶ Swi-ta-swi-famba swi ta tshamiseka le Axidodo, kutani Xikwembu xi ri: “Ndzi ta herisa manyunyu ya Vafilista.

⁷ Nyama leyi nga ni ngati, leyi va yi humeseleke swikwembu swa ka vona, a va nga yi dyi, ndzi ta yi vutla. Kutani masalela ya vona ma ta vula leswaku ndzi Xikwembu, ku fana ni varhangeri va va ka Yuda. Na vona va le Ekroni va ta hluriwa ku fana ni Vayebusi.

⁸ Ndzi ta rhendzela yindlu ya mina ndzi yi sirhelela, leswaku mavuthu ma nga ha hundza-hundzi eka yona; nala a nga ka a nga ha ngheni a hlasela vanhu va mina, hikuva sweswi ndzi mulanguteri wa vona.”

Ta mufumi loyi a tisaka ku rhula

⁹ Tsakani mi tsakisisa, n'wina vaaki va Siyoni, banani minkulungwana, n'wina va le Yerusalema! Vonani, mufumi wa n'wina hi luyaa, ú ta kwala ka n'wina; i munhu wo lulama, loyi a hluleke valala, kambe wa titsongahata, ú ta a gadile mbhongolo, xi nga ximbhongolwana n'wana wa mbhongolo.

¹⁰ Xikwembu xi ri: “Ndzi ta hangalasa makalichi ya nyimpi ma suka etikweni ra Efrayimi, ni tihanci ta nyimpi ndzi ta ti susa eYerusalema; mavurha ya masocha ma ta tshoviwa, hikuva loyi a taka, ú ta twarisa ku rhula ematikweni. Mfumo wa yena wu ta nava ku suka eka lwandle rin'wana, ku ya fika eka lerin'wana; wu ta sukela enambyeni wa Yufrata, wu ya fika endzilekaneni wa tiko ra Egipta.”

Lava yisiweke evukhumbini, va ta ntshunxiwa

¹¹ Xikwembu xi ku ka Vaisraele: “Ndzi endlile ntwanano na n'wina lowu funghiweke hi ngati, hikokwalaho ndzi ta ntshunxa vanhu va n'wina lava khomiweke, ndzi ta va humesa evukhumbini bya vona lebyi fanaka ni khele ro pfumala mati.

¹² N'wina vabohiwa, mi nga lahlekeli hi ku tshemba, vuyani ekhokholweni ra n'wina, wu nga muti wa Yerusalema. Namuntlha ndzi tlhela ndzi mi tivisa leswaku ndzi ta mi tlherisela swilo swa n'wina kambirhi.

¹³ Ndzi ku kongile kukota vurha, we Yuda, kutani we Efrayimi, u nseve wa kona. Ndzi ta pfuxa tinhenha ta wena we Siyoni, ti ya lwa ni tinhenha ta Vagriki; evokweni ra mina mi ta fana ni fumu ra nghwazi.”

¹⁴ HOSI Xikwembu xi ta vonaka ehenhla ka valala, xi va tlhava hi miseve ya rihati. N'wini wa hinkwaswo ú ta chaya nanga, a ta hi xidzedze xa le dzongeni.

¹⁵ HOSI ya matimba hinkwawo yi ta hlayisa vanhu va yona; maribye ya xihangu ma ta hlula valala ma va heta, ma halata ngati ya vona kukota vhinyo, kukota ngati ya swifuwo emagandzelweni, leyi tataka nkambana, yi tsakamisa ni timhondzo ta alitari.

¹⁶ Hi siku ra kona, HOSI Xikwembu xi ta ponisa vanhu va xona, hikuva hi vona va nga ntlhambi wa xona; va ta vangama etikweni ra xona kukota maribye ya nkoka eharhini ya vuhosi.

¹⁷ Hakunene tiko ri ta saseka, ri tsakisa! Majaha ni vanhwana va ta kula va tsakile, hikuva va ta phameriwa swakudya ni swakunwa leswinene.