Zakariya 7 - BIBELE Mahungu Lamanene

Ku titsona loku nga humiki embilwini a ku pfuni nchumu

¹ Hi lembe ra vumune ra ku fuma ka hosi Dariyosi, hi siku ra vumune ra n'hweti ya vu-9 (yi nga leyi vuriwaka Kislevhu), HOSI Xikwembu xi ndzi rhwexile mahungu.

² Vanhu va le Betele va rhumile Xaresere na Regemu-Meleke, ni vavanuna van'wana, leswaku va ya va ya kombela ku katekisiwa hi HOSI Xikwembu;

³ naswona va va lerisile ku ya vutisa vaprista lava tirhaka eTempeleni, va vutisa ni vaprofeta xivutiso lexi nge: “Xana ha ha fanele ku rila ni ku titsona swakudya hi n'hweti ya vu ntlhanu, ku fana ni leswi a hi endlisa swona emalembeni layo tala lama hundzeke xana?”

⁴ Kutani mahungu lawa HOSI ya matimba hinkwawo yi nga ndzi rhwexa wona

⁵ leswaku ndzi ma fikisa eka vaaki hinkwavo va tiko ni ka vaprista, hi lawa: “Hi n'hweti ya vuntlhanu ni ya vu-7, emalembeni ya 70 lama hundzeke, loko mi rila ni ku titsona swakudya, a mi nga endleli mina!

⁶ Hambiloko mi dya ni loko mi nwa, a mo endlela ku titsakisa ntsena!”

⁷ Marito lawa ma ha fana ni lawa HOSI Xikwembu xi ma twariseke hi milomo ya vaprofeta lavo rhanga; eminkarhini ya kona, vaaki va muti wa Yerusalema ni va swimitana leswi nga kusuhi, a va ha tele va tshamisekile; hambi va ri vanhu va le magangeni ni va le dzongeni a va ha tele.

⁸ Mina Zakariya, HOSI Xikwembu xa matimba hinkwawo xi tlhele xi ndzi lerisa

⁹ ku ya tivisa vanhu marito lama nge: “Loko mi avanyisa, avanyisani hi ntiyiso, kombisanani tintswalo ni rirhandzu;

¹⁰ mi nga xanisi tinoni ni lava pfumalaka vatswari, tsetselelani valuveri kumbe vapfumari, mi nga tshuki mi boha makungu ya ku onhelana.”

¹¹ Kambe vanhu va arile ku yingisa switsundzuxo leswi: Va swi be hi makatla, va tisiva tindleve leswaku va nga swi twi,

¹² va nonon'hwisa ni timbilu ta vona ti fana ni maribye. A va swi lavanga ku twa milawu ni marito ya HOSI ya matimba hinkwawo, hambileswi yi va rhumeleke swona hi Moya wa yona lowu fambiseke vaprofeta lavo rhanga. Hikokwalaho, HOSI ya matimba hinkwawo yi va hlundzukerile ngopfu,

¹³ kutani yi ku: “Ndzi va vitanile, kambe va arile ku yingisa; kwalaho loko va ndzi vitana, na mina ndzi arile ku va yingisa. Ndzi vula sweswo, mina HOSI ya matimba hinkwawo.

¹⁴ Kutani ndzi va hangalasele etinxakeni hinkwato leti a va nga ti tivi, kutani tiko leri ro saseka, leri va ri sukeleke, ri sala ri ri rhumbi, ku pfumaleka na munhu loyi a nga famba-fambaka eka rona.”